Te Manako o te Pipiria

Koai ma te au Temoni?

IRINAKI te tangata o te au akonoanga tukeke i te au vaerua tupapaku, te vaerua kai kopapa mate (ghouls), vaerua viivii (goblin), vaerua manamana (genie), e te au temoni. Manako ratou e e au vaerua meitaki, me kore e au vaerua kino te reira. Tetai aronga kare e irinaki ana i roto i te au vaerua. Karanga ratou e e irinakianga pikikaa me kore e mea maani ua. Eaa ra ta te Pipiria e akakite maira?

Te apii maira te Pipiria e ko Tei Anga mai ia tatou, e Vaerua aia, e ko tana au mea mua i anga, e au vaerua ratou. (Ioane 4:24; Ebera 1:13, 14) Tetai katoa, te taiku maira te Pipiria i te au vaerua kino, tetai au taime e karanga ana ia ratou e e au temoni. (1 Korinetia 10:20, 21; Iakobo 2:19) Kare ra te reira e apii ana e na te Atua i anga i te temoni. Koai ma i reira ratou, e akapeea ratou te akamata mai anga?

“Au Angela i Rave i te Ara”

Te anga mai anga te Atua i te au mea vaerua, akariro aia ia ratou ei au rima rave meitaki ma te tikaanga kia iki e me ka rave i te meitaki me kore i te kino. Te mea taitaia ra, i muri ake i te angaia mai anga te tangata, e maata ua atu te au angera tei iki kia rave i te kino na te meameaau anga i te Atua.

Te vaerua mua e te mea kino rava atu tei meameaau kua riro mai ko Satani. “Kare aia i mou i te tuatua-mou,” i karanga ai a Iesu. (Ioane 8:44) Eaa tei akanauru ia Satani kia patoi i te Atua? Kua akamata aia i te morimori i te akamorianga tei tau anake ua no Tei Anga mai, e na te akariro anga iaia ei atua meameaau. Na roto i teia mataara kua akariro aia iaia uaorai ko “Satani,” te aiteanga “tei patoi.” Te au anere mataiti i muri mai, i mua ake i te Vai Tiruvi i te tuatau o Noa, kua piri atu tetai au angera kia Satani, kua akaruke i to ratou ngai i te rangi, kua akariro ia ratou ei tangata e kua noo ki te enua nei. (Genese 6:​1-4; Iakobo 1:13-15) Te tupu anga te Vai Tiruvi, ko “te au angela i rave i te ara” e tei akariro ia ratou ei tangata, kua oki akaou ki te ao vaerua. (2 Petero 2:4; Genese 7:17-24) Te tuatau tei aereia, kua kapikiia ratou e ko te au temoni.​—Deuteronomi 32:17; Mareko 1:34.

Teianei kua kite teia au angera akarongo kore ia ratou uaorai i roto i tetai turanga tuke takiri mei ta ratou i kite ana i mua ake i te meameaau anga. Te na ko ra a Iuda 6 e: “E te au angela katoa ko tei kore i akono i ta ratou orai taoonga ra, akaruke iora ra i to ratou nooanga tikai, ko tei tapekaia ïa e [te Atua] i te pirianganaoa matara kore ki raro ake i te poiri, e tae ua atu ki te akavaanga i te rā maata ra.” Ae, kare te Atua i akatika ia ratou kia noo akaou i to ratou turanga i te rangi i mua ana, mari ra kua tukuia ratou ki ‘te pirianganaoa o te poiri,’ e ngai akatutu ua, e kua tipu takiriia mei te marama pae vaerua.​—2 Petero 2:4.

“Tei Pikikaa i to te ao Katoatoa”

Noatu kua araiia kia kore e akariro akaou ia ratou ei tangata, te vai nei rai te mana maata e te akakeuanga ririnui o te au temoni ki runga i te manako e te oraanga o te tangata. Ae, te riro nei rai a Satani e tona au nuku temoni, ei “pikikaa i to te ao katoatoa nei.” (Apokalupo 12:9; 16:14) Akapeea ra? Maataanga o te taime na “te tuatua [apiianga a] te au demoni.” (1 Timoteo 4:1) Teia au apiianga pikikaa, te au tu tikai e raveia ana i roto i te akonoanga, kua riro ei akapoiri i te manako o te mirioni ua atu kia kore e kite i te tuatua mou no runga i te Atua. (2 Korinetia 4:4) Ka akamanako ana i tetai au akaraanga.

● Te apiianga e te ora nei rai tei mate. Na roto i te au turuma, te tangianga reo, e te au ravenga pakari, e akavare ana te au temoni i te tangata kia irinaki e ka rauka ia ratou te  komunikeiti ki tei mate. Tetai katoa, ka riro teia akavareanga kikite ei akanauru i te tangata kia irinaki e ka ora atu te meta i muri ake i te mate anga te kopapa. Inara, te akakite tika ua maira te Pipiria e: “Kare ra a te aronga i mate ra e tuatua i kitea.” (Koheleta 9:​5, 6) I te mea tei ‘raro ratou i te ngai muteki,’ kare e rauka ia ratou te akapaapaa i te Atua.​—Salamo 115:17. *

● Ngere i te au turanga tau. “Te vai ua nei rai to te ao ravarai i raro ake i taua vaerua kino ra,” i karanga ai a 1 Ioane 5:19. Te taangaanga nei a Satani e tana au temoni i to ratou mana na roto i te nuti e tetai atu au mataara i te akatotoa i te irinakianga kino, e kia tuku ua atu te tangata ki te au anoano kikino o te kopapa. (Ephesia 2:​1-3) No reira te au tu tau kore ravarai, kapiti mai te au peu ainga viivii, i pararauare ei teia tuatau. E manako katoaia ana taua tu ra e e mea noa ua, kareka te au turanga Pipiria e manakoia ana e kua piro me kore e manako papakitai.

● Akatotoaanga i te purepure. Kua aravei te apotetoro ko Paulo i tetai tamaine tavini tei uruia e te “demoni purepure,” tana e taangaanga ana kia rauka te ‘apinga maata na tona au pu.’ (Angaanga 16:16) I te mea kua kite aia e no te temoni te mana o taua tamaine ra, kare a Paulo i akarongo kiaia. Tetai, kare aia i inangaro te akamareka kore atu i te Atua, tei manako i te au tu purepure ravarai​—kapiti mai i te akara etu e te pati tauturu ki te au vaerua kino​—ei mea viivii.​—Deuteronomi 18:​10-12.

Paruru ia Koe Mei te au Temoni

Akapeea koe te paruru anga ia koe mei te au vaerua kino? Te pau maira te Pipiria: “E kauraro atu kotou i te Atua. E patoi atu i te diabolo, e nana e rere ke atu.” (Iakobo 4:7) Te akono ra tatou i taua akauenga ra me aru tatou i te au apiianga a te Pipiria, te puka tapu okotai rai e akakite atea ua maira ia Satani, te au temoni, e ta ratou au “ravenga pakari.” (Ephesia 6:11; 2 Korinetia 2:11) Te akakite katoa maira te Pipiria kia tatou e ka takore takiriia te au vaerua kino, kapiti mai te aronga pouroa tei patoi i te Atua. (Roma 16:20) “Na te aronga tiratiratu oki e noo i te enua, e te aronga apa kore te ka akatinamouia ki reira,” i karanga ai a Maseli 2:21.

[Tataanga Rikiriki i Raro]

I MANAKO ANA AINEI KOE?

● Na te Atua ainei i anga i te au temoni? ​—2 Petero 2:4.

● Ka rauka ainei ia koe te tuatua ki tei mate?​—Koheleta 9:​5, 6.

● Akapeea koe me paruru ia koe mei te au temoni?​—Iakobo 4:7.

[Tutu i te kapi 17]

Titau ana te au temoni i te akanauru i te manganui