Ginpaumpawan Ako sang Dios sa Tanan Ko nga Kabudlayan

Panugiron ni Victoria Colloy

Ginsilingan sang doktor si Nanay: “Wala na kami sing mahimo pa sa bata mo. Kinahanglan na gid sia maggamit sing saklay kag brace sa batiis sa bilog niya nga kabuhi.” Naglalain gid ako! Maano na lang ako kon indi na ako makalakat?

NATAWO ako sang Nobiembre 17, 1949, sa Tapachula, Chiapas, Mexico. Ako ang kamagulangan sa apat ka kabataan. Palakadlaw ako kag mapagros nga bata. Pero sang anom ako ka bulan, gulpi lang nga wala na ako nagakamang kag nabudlayan na sa paggiho. Pagligad sang duha ka bulan, indi na gid ako makagiho. Nagapalibog ang mga doktor sa amon lugar kay ang iban nga lapsag may amo man sini nga mga sintoma. Gani gin-eksamin kami sang isa ka espesyalista sa tul-an nga naghalin pa sa siudad sang Mexico. Nahibaluan nga may ara kami poliomyelitis ukon polio.

Sang tatlo ako ka tuig, gin-operahan ako sa balikawang, tuhod, kag buko-buko. Sang ulihi, naapektuhan man ang akon abaga. Sang anom ako ka tuig, gindala ako sa siudad sang Mexico para bulngon sa ospital sang mga kabataan. Nagpauli si Nanay kag nag-obra sa uma sa Chiapas, gani nagpabilin ako kay Lola sa siudad sang Mexico. Pero nagabalikbalik ako pirme sa ospital.

Nag-ayo-ayo ang akon sitwasyon sang walo ako ka tuig. Pero sang ulihi naglala ini kag indi na gid ako makagiho. Nagsiling ang mga doktor nga kinahanglan ko na maggamit sing saklay kag brace sa batiis sa bilog ko nga kabuhi.

Sa edad nga 15 anyos, 25 ka beses na ako nga naoperahan sa taludtod, batiis, tuhod, bukobuko, kag sa mga tudlo sa tiil. Gina-rehab ako kada matapos ang akon operasyon. Pagkatapos sang isa sa mga operasyon, ginsemento ang akon batiis. Sang ginkakas na ang semento, dapat mag-exercise gid ako bisan grabe pa kasakit.

Matuod nga Paumpaw

Sang 11 anyos ako, ginbisitahan ako ni Nanay pagkatapos sang isa ko ka operasyon. Nakabasa sia sing magasin nga Ang Lalantawan, nga ginhimo sang mga Saksi ni Jehova. Natun-an niya diri nga gin-ayo ni Jesus ang mga masakiton kag ginpalakat pa gani ang mga paralitiko. Ginhatag niya ini sa akon kag gintago ko sa akon ulunan. Pero isa ka adlaw, nadula ini kay ginkuha sang mga nars. Gin-akigan nila ako kay nagabasa ako sini.

Pagligad sang isa ka tuig, nagbalik liwat si Nanay para makita ako. Sa sini nga tion, ginatun-an na sia sa Biblia sang mga Saksi. Ginhatagan niya ako sing libro nga From Paradise Lost to Paradise Regained. * Nagsiling si Nanay, “kon gusto mo makaistar sa  ginpromisa nga bag-ong kalibutan diin ayuhon ka ni Jesus, dapat magtuon ka sa Biblia.” Gani sang mga 14 anyos ako, nagtuon ako upod sa mga Saksi bisan pa indi gusto si Lola. Pagkasunod nga tuig, ginpahalin ako sa ospital kay indi na ako bata.

Pag-atubang sa mga Kabudlayan

Grabe gid ang akon kasubo. Nagpauli ako sa Chiapas sa akon mga ginikanan bangod sa pagpamatok ni Lola. Pero may mga problema man sa balay kay palahubog si Tatay. May mga tion nga daw gusto ko na lang mapatay. Napamensaran ko man nga mag-inom sing hilo. Pero samtang padayon ako nga nagatuon sa Biblia, nagbag-o ang akon pagtamod. Nagpahalipay sa akon ang promisa sang Biblia nga mangin paraiso ang duta.

Ginsugid ko sa iban ang matahom nga paglaum sa Biblia. (Isaias 2:4; 9:6, 7; 11:6-9; Bugna 21:3, 4) Sang Mayo 8, 1968, sa edad nga 18, nabawtismuhan ako subong isa ka Saksi ni Jehova. Halin sang 1974, sobra 70 ka oras kada bulan ang akon ginagamit sa pagsugid sa iban sang paglaum nga nagbulig sa akon nga padayon nga magkabuhi.

Makalilipay kag Mapuslanon nga Kabuhi

Sang ulihi, nagsaylo kami ni Nanay sa siudad sang Tijuana, malapit sa dulunan sang Mexico kag Estados Unidos. Nag-istar kami sa isa ka balay nga indi kami mabudlayan. Makalakatlakat ako sa balay gamit ang saklay kag brace. Kon magluto ako, manghugas, kag mamalantsa, nagapungko ako sa akon wheelchair. Kon magwali ako, nagasakay ako sa akon electric cart nga ginpasibu sa akon kinahanglanon.

Magluwas sa pagwali sa dalan kag sa mga balay, regular man ako nga nagakadto sa malapit nga ospital kag ginaistorya parte sa Biblia ang nagahulat nga mga pasyente. Pagkatapos sini, ma-drive naman ako sang akon electric cart pakadto sa merkado para maniendahan. Dayon mapuli ako para buligan si Nanay nga magluto kag manghimos sa balay.

Para may gastuhon kami, nagabaligya ako sang segunda-mano nga mga bayo. Maluya na subong si Nanay kay 78 anyos na sia kag katatlo na gin-atake sa tagipusuon. Ako ang nagabakal sang iya bulong kag pagkaon. Bisan indi maayo ang amon panglawas, ginatinguhaan gid namon nga makatambong sa mga miting sa kongregasyon. Nagawali naman subong ang sobra 30 ka tawo nga akon gintun-an sa Biblia sa sulod sang mga tinuig.

Sigurado gid ako nga maabot ang tion nga matuman ang ginpromisa sang Biblia nga sa bag-ong kalibutan sang Dios, “ang piang magalumpat subong sang usa.” Pero subong, naumpawan ako sa ginasiling sang Dios: “Dili ka mahadluk, kay ako nagaupud sa imo, dili ka magkahangawa, kay ako ang imo Dios; palig-onon ko ikaw, buligan ko ikaw, alay-ayon ko ikaw sang too nga kamut sang akon pagkamatarung.”—Isaias 35:6; 41:10. *

[Mga Nota]

[Retrato sa pahina 12]

May brace ako sa batiis sang pito ako ka tuig

[Retrato sa pahina 13]

Kon magwali, nagasakay ako sa electric cart nga ginpasibu sa akon kinahanglanon