Mulimu U ni Omba-Ombile Mwa Miliko ya ka Kaufela

Taba ye kandekilwe ki bo Victoria Colloy

Dokota yo muñwi naa bulelezi bo ma kuli: “Ha ku sa na mo lu kona ku tuseza mwanaa mina. U ka tokwa ku itusisanga likota za ku zamaela ni ku tinanga lika ze tiisa mahutu mwa bupilo bwa hae kaufela.” Ne ni lobehile pilu luli! Kana ku na ni ze ne ni ka kona ku eza haiba ne ni si ke na zamaya?

NE NI pepilwe ka la November 17, 1949, mwa tolopo ya Tapachula, ili mwa Chiapas, kwa Mexico. Ne ni li mbututu ye tabile, ye na ni buikangulo bo bunde, mi nee li na mweli mwahalaa bana ba bane. Kono ha ne ni li wa likweli ze silezi, ka sipundumukela na tuhela ku hohoba ni ku shenya hande. Hasamulaho wa likweli ze peli ne ni sa koni ku shenya nihaiba hanyinyani. Madokota ba mwa sibaka sa luna ne ba komokisizwe hahulu ki taba ya kuli limbututu ze ñwi mwa Tapachula ne li na ni butata bo bu swana. Kacwalo, dokota yo muñwi wa za masapo ya naa zwa kwa Mexico City a taha ku to lu tatuba. Ne ku fumanwi kuli ne lu kula butuku bwa poliomyelitis, kamba polio.

Ha ne ni na ni lilimo ze taalu, ne ni pazuzwi hañata kwa linoka, kwa mañwele, ni kwa lingongo za kwa mahutu. Hasamulaho, liheta la ka la kwa bulyo la kala ku kula ni lona. Ha ne ni na ni lilimo ze silezi, na iswa kwa Mexico City kuli ni yo zwelapili ku alafiwa kwa sipatela sa banana. Bo ma ne ba beleka kwa famu ye ñwi mwa Chiapas, kacwalo ne ni ina ni bo kuku ba basali kwa Mexico City. Kono hañata ne ni banga mwa sipatela.

Ha ne ni li wa lilimo ze bato ba 8, ne se ni ezize zwelopili. Kono hasamulaho butuku bwa ka bwa totobela, mi hanyinyani-hanyinyani na tuhela nihaiba ku shenya. Cwale madokota ba bulela kuli ne ni ka tokwa ku itusisanga likota za ku zamaela ni ku tinanga lika ze tiisa mahutu mwa bupilo bwa ka kaufela.

Ha ne se ni li wa lilimo ze 15, ne se ni pazuzwi ha 25. Ne ni pazuzwi kwa mongola, kwa mahutu, kwa mañwele, kwa lingongo za kwa mahutu, ni kwa minwana ya kwa mahutu. Nako kaufela ha ne ni pazulwanga, hasamulaho ne ni tokwanga ku tanda nako kuli ni angulukelwe. Nako ye ñwi mahutu a ka naa beilwe mwa pulasita hasamulaho wa ku pazulwa. Ha ne ni zwisizwe mwa pulasita, ne ni na ni ku twaelisanga mahutu a ka, mi ku eza cwalo ne ku utwisa butuku.

Ne ni Omba-Ombilwe ha Buniti

Ha ne ni li wa lilimo ze 11, bo ma ne ba tilo pota ka nako ye ne ni angulukelwa hasamulaho wa ku pazulwa. Bo ma ne ba itutile kuli Jesu naa folisize bakuli mane ni ku tusa mutu ya naa omelezi luñañali kuli a kone ku zamaya. Ba ni fa magazini ya Tawala ya Mulibeleli, ye hatisizwe ki Lipaki za Jehova, ili mo ne ba itutile litaba zeo. Na pata magazini yeo kwatasaa musamo wa ka, kono zazi le  liñwi na i tonda. Manasi ne ba fumani magazini yeo mi ba i inga. Ba ni halifela kabakala ku bala magazini yeo.

Hasamulaho wa nako ye bato ba silimo, bo ma hape ba taha ku zwa kwa Chiapas ku to ni lekula. Ka nako yeo ne ba ituta Bibele ni Lipaki. Ne ba ni tiselize buka ye li Kuzwa Paradaisi ye Latehile ku ya Paradaisi ye Fumanwi—sinca. * Bo ma ba ni bulela kuli, “Haiba u bata ku to pila mwa lifasi le linca le li sepisizwe mo Jesu a ka ku folisa, u swanela ku ituta Bibele.” Kacwalo, ku si na taba ni twaniso ya bo kuku ba basali, na kala ku ituta Bibele ni Lipaki inze ni na ni lilimo ze bato ba 14. Ka silimo se ne si tatami, ne ni tokwiwa ku zwa mwa sipatela seo kakuli ne si li sa banana feela.

Mo ne ni Talimanezi ni Matata

Na lembwala hahulu. Kabakala twaniso ya bo kuku ba basali, ne ni na ni ku kuta ku yo pila ni bashemi ba ka kwa Chiapas. Kono kwa ndu ne ku na ni matata bakeñisa kuli bo ndate ne li macakolwa. Ka nakonyana ne ni sa boni kuli ni pilelañi. Na hupula za ku nwa mulyani kuli ni ipulaye. Kono ku zwelapili ku ituta Bibele kwa ni tusa ku cinca mubonelo wa ka. Sepiso ya Bibele ya paradaisi ya fa lifasi ne i ni tahiselize tabo.

Na kala ku bulelela ba bañwi ka za sepo ye nde yeo ye mwa Bibele. (Isaya 2:4; 9:6, 7; 11:6-9; Sinulo 21:3, 4) Mafelelezo na kolobezwa sina yo muñwi wa Lipaki za Jehova ka la May 8, 1968, inze ni na ni lilimo ze 18. Ku zwa ka 1974 ni tandanga lihora ze fitelela 70 ka kweli inze ni taluseza ba bañwi sepo ye ni susuelize ku zwelapili ku pila.

Ni Bile ni Bupilo bo Bunde, bo bu Tabisa

Nako ha ne inze i ya, na ni bo ma lwa tutela kwa tolopo ya Tijuana, ili ye kwatuko ni museto wa Mexico ni United States. Na ni bo ma lu pila hamoho mwa sibaka se si lu tusa ku ina hande ku likana ni miinelo ya luna. Ni sa kona ku zamaya-zamaya mwa ndu ka ku itusisa likota za ka za ku zamaela ni lika ze tiisa mahutu, mi ni itusisanga sipula sa mawili ha ni apeha, ha ni tapisa libyana za ka, ni ha ni haina. Mwa bukombwa bwa ka, ni itusisanga kamota ka malaiti ka ka ni tusa hande mwa muinelo wa ka.

Kwandaa ku taluseza ba bañwi lituto za Bibele mwa makululu ni mwa mandu a bona, ni yanga kwa sipatela se si li bukaufi ku yo ambolisana litaba za mwa Bibele ni batu ba ba fumanehanga fande ili ba ba libelela likalafo. Ha ni fezanga ku ambola ni batu bao, ni matelanga kwa musika mwa kamota ka ka ku yo leka lika ze lu tokwa, kihona ni kutela kwa ndu ku yo tusa bo ma ku apeha ni ku eza misebezi ya fa lapa.

Kuli lu fumane masheleñi a ku itusisa, ni lekisanga liapalo ze itusisizwe. Bo ma se ba na ni lilimo ze 78 mi ha ba sa kona ku eza lika ze ñata bakeñisa kuli butuku bwa bona bwa pilu se bu shangumukile halalu. Kacwalo ni bonanga teñi kuli ba nwa mulyani ni ku ca lico ze swanela. Ku si na taba ni kuli ha lu na buikangulo bo bunde, lu likanga ka taata ku fumaneha kwa mikopano ya puteho. Batu ba ba fitelela 30 be se ni itutile ni bona Bibele mwa lilimo ze fitile ni bona se ba abananga mwa bukombwa bwa Sikreste.

Ni na ni buikolwiso bwa kuli sepiso ye mwa Bibele ye, i ka talelezwa kwapili, ye li: “[Mwa lifasi le linca la Mulimu] ya toza u ka tula sina lizwii.” Kono ka nako ya cwale, Linzwi la Mulimu li ni omba-omba kuli: “Si sabi kakuli ni na ni wena. Si bilaeli kakuli ki Na Mulimu wa hao. Ni ka ku fa maata, e, ni ka ku tusa; e, ni ka ku tiisa ka lizoho la ka la bulyo la niti ya ka.”—Isaya 35:6; 41:10. *

[Litaluso za kwatasi]

[Siswaniso se si fa likepe 31]

Inze ni tinile lika ze tiisa mahutu ka nako ye ne ni na ni lilimo ze supile

[Siswaniso se si fa likepe 32]

Mwa bukombwa, ni itusisanga kamota ka malaiti ka ka ni tusa hande mwa muinelo wa ka