Tulog—Daw Ano ka Importante?

● Suno sa mga pagtuon sining karon lang, ang mga tawo sa North America nagatulog sing pito ukon pito kag tunga ka oras kada gab-i. * Ngaa importante ang tulog? Sa aton pagtulog, nagaagi kita sa ginatawag nga rapid eye movement kada 60-90 minutos sa bilog nga gab-i. Ang aton utok pinakaaktibo sa sini nga tion kag nagapati ang mga researcher nga ginakay-o sini ang iya kaugalingon. Ang pila ka eksperto nagasiling nga kon maisturbo kag makabugtaw ka sa sini nga tion, may daku ini nga epekto sa imo lawas. Maapektuhan man sini ang imo utok, gani indi mo mahatag ang imo pinakamaayo kag dali ka magmasakit.

May mga butang pareho sang caffeine, nga sa malip-ot nga tion makapugong sa kemikal nga naga-signal sa aton utok nga magtulog. Pero kon kulang sing tulog ang aton lawas, puede kita patulogon sang aton utok. Amo nga kon kaisa, nagakadukaan kita ukon ginatawag ini nga microsleeps. Suno sa magasin nga The Toronto Star, “ano man ang imo ginahimo, kon kulang sa tulog ang imo utok, nagaagi ini sa ginatawag nga first stage sang tulog sa sulod sang mga napulo ka segundo ukon sobra isa ka minuto.” Ibutang ta nga naga-drive ka sa kadasigon nga mga 50 kilometros kada oras kag nakadukaan ka sing napulo ka segundo. Sa sina nga tion, naka-drive ka na sing sobra 138 metros. Dugang pa, kon kulang ang aton tulog, nagahina man ang aton immune system, kay sa aton pagtulog ang aton lawas nagapagua sing T cells nga nagabato sa pathogens ukon mga virus. Kon nagatulog kita, ang aton lawas nagapagua man sang hormone nga leptin nga nagakontrol sa aton kaon. Gani, ang aton lawas nagakinahanglan sing tulog subong nga nagakinahanglan ini sing ehersisyo kag husto nga pagkaon.

Indi ka bala makatulog sing maayo bangod sa imo obra? May mga problema ka bala ukon ginakabalak-an amo nga indi ka makatulog? Ang maalam nga si Hari Solomon nagsiling anay: “Ang trabahador makatulog sing maayo bisan gamay ukon madamo ang iya pagkaon, pero ang manggaranon iya, sa sobra nga manggad, indi makatulog sing maayo.”—Manugwali 5:12, APD.

[Nota]