Ang Pagtamod sang Biblia

Magasuod Ka Bala sa Dios Kon Paantuson Mo ang Imo Kaugalingon?

ANG kalabanan wala nanamian sa ideya nga sakiton mo ang imo kaugalingon. Pero ang mga tawo nga nagapaantos sang ila kaugalingon pareho sang pagpenitensia, sobra nga pagpuasa, kag pagsuksok sang magaras kag makatol nga bayo, ginakabig nga mga diosnon. Wala lamang ini ginahimo sang una. Suno sa mga report sining karon lang, bisan gani ang kilala nga mga lider sang relihion nagapenitensia man.

Ngaa ginahimo ini sang iban? Suno sa humalambal sang isa ka organisasyon nga nagapangangkon nga Cristiano, “ang pagpaantos sa kaugalingon isa ka paagi nga ginaupdan mo si Jesucristo sa iya mga pag-antos para maluwas kita sa sala.” Amo sini ang pagpati sang mga lider sang relihion, pero amo man bala sini ang ginatudlo sang Biblia?

Palanggaa ang Imo Lawas

Wala ginatudlo sang Biblia nga simbahon naton ang Dios paagi sa pagpaantos sa aton kaugalingon. Kundi, ginapalig-on kita nga atipanon ini. Sang ginlaragway sang Biblia ang pagpalangga sang bana sa iya asawa, ginpaanggid ini sa pag-atipan niya sa iya lawas. Ini nagsiling: “Ang mga bana dapat maghigugma sang ila asawa subong sang ila kaugalingon nga lawas . . . Wala sing tawo nga nagadumot sang iya kaugalingon nga unod; kundi ginapakaon kag ginapalangga niya ini, subong sang ginahimo ni Cristo sa kongregasyon.”—Efeso 5:28, 29.

Ano ang pulos sang sugo nga higugmaon mo ang imo asawa subong sang imo kaugalingon nga lawas kon ginasakit mo ang imo kaugalingon sa pagsimba sa Dios? Maathag nga dapat palanggaon sang mga nagasunod sa prinsipio sang Biblia ang ila lawas. Ining nagakaigo nga pagpalangga sa kaugalingon dapat man ipakita sa imo asawa ukon bana.

Madamo sing prinsipio sa Biblia nga nagapalig-on nga palanggaon naton ang aton lawas. Halimbawa, ginapakita sini nga mapuslanon ang nagakaigo nga pag-ehersisyo. (1 Timoteo 4:8) Ginasugid man sini nga may pila ka pagkaon nga makabulong kag may malain nga epekto ang indi husto nga pagkaon. (Hulubaton  23:20, 21; 1 Timoteo 5:23) Ginapalig-on man sini nga atipanon naton ang aton panglawas para mangin mapagsik kita. (Manugwali 9:4) Kon ginapalig-on sang Biblia nga halungan naton ang aton panglawas, ngaa abi halitan naton ini?—2 Corinto 7:1.

Dapat Bala Ilugon sang mga Cristiano ang Pag-antos ni Jesus?

May mga organisasyon nga nagapalig-on gihapon sang pagpenetensia kay ginasunod kuno nila ang pag-antos ni Jesus kag sang iya mga sumulunod. Pero ang pag-antos sang mga alagad sang Dios nga mabasa sa Biblia, indi sila ang naghimo. Ginsambit sang mga manunulat sang Biblia ang pag-antos ni Cristo para palig-unon sila nga batason ang mga paghingabot, indi nga sila ang magpaantos sa ila kaugalingon. Gani, ang mga nagapaantos sang ila kaugalingon wala nagailog kay Jesucristo.

Para iilustrar: Imadyina nga ang imo abyan ginsakit kag ginpakahuy-an sang isa ka akig nga grupo. Natalupangdan mo nga kalmado lang sia kag wala gid nagbalos. Kon gusto mo sia ilugon, sakiton mo bala kag pakahuy-an ang imo kaugalingon? Siempre indi, kay daw pareho lang nga gin-ilog mo ang ginhimo sang nagsakit sa iya. Para mailog sia, likawan mo nga magbalos kon matabo man ini sa imo.

Gani, kon paantuson sang mga sumulunod ni Cristo ang ila kaugalingon, daw pareho lang nga ginailog nila ang ginhimo sang mga nagpaantos kag nagpatay kay Jesus. (Juan 5:18; 7:1, 25; 8:40; 11:53) Kon hingabuton sila, dapat ilugon nila si Jesus nga kalmado kag wala nagbalos.—Juan 15:20.

Pagpatiko sa Kasulatan

Bisan antes pa sang panahon sang mga Cristiano, ang Kasulatan nga ginasunod sang mga Judiyo sa ila pagkabuhi kag pagsimba nagadumili sa pagsakit sa kaugalingon. Halimbawa, ginadumilian sang Kasuguan ang mga Judiyo nga pilason ang ila kaugalingon, bisan pa ginahimo ini sang iban nga pungsod. (Levitico 19:28; Deuteronomio 14:1) Kon indi gani gusto sang Dios nga pilason ang aton kaugalingon, ano pa ayhan kon latiguhon naton ini? Maathag nga ginapakita sang Biblia nga ang hungod nga pagsakit sa aton kaugalingon sa bisan ano nga paagi, wala nagapahalipay sa Dios.

Subong nga luyag sang isa ka pintor nga halungan ang iya obra, luyag man sang aton Manunuga nga si Jehova nga Dios nga halungan naton ang aton lawas nga iya gintuga. (Salmo 139:14-16) Ang pagsakit sa kaugalingon wala nagapasuod sa aton sa Dios. Kundi, ginapakalain kag ginapatiko sini ang panudlo sang Ebanghelyo.

Paagi sa balaan nga espiritu, ginbuyagyag ni apostol Pablo ang makapabug-at nga mga doktrina sang tawo: “Kon hunahunaon ta, daw husto man ang ila mga pagtudlo parte sa pagsimba nga ila naluyagan, parte sa pagpaubos kag pagpenitensia sa lawas. Pero ang matuod, ina nga mga butang indi gid makabulig sa aton sa pagpugong sang lawasnon nga mga kailigbon.” (Colosas 2:20-23, APD) Ang pagsakit sa kaugalingon indi gid makabulig para mangin suod kita sa Dios. Sa baylo, ang matuod nga pagsimba nga ginapatuman sang Dios, makapaumpaw, mahapos, kag mamag-an.—Mateo 11:28-30.

NAMANGKOT KA BALA?

● Paano ginatamod sang Dios ang lawas sang tawo?—Salmo 139:13-16.

● Kon sakiton mo ang imo lawas, mabatuan mo bala ang imo malain nga mga handum?—Colosas 2:20-23.

● Makapabug-at bala ukon mapintas ang matuod nga pagsimba?—Mateo 11:28-30.

[Blurb sa pahina 11]

Maathag nga ginapakita sang Biblia nga ang hungod nga pagsakit sa aton kaugalingon sa bisan ano nga paagi, wala nagapahalipay sa Dios

[Retrato sa pahina 10]

Isa ka deboto nagaluhod pasaka sa isa ka simbahan

[Credit Line]

© 2010 photolibrary.com