Is-Sistema tan-Navigazzjoni tal-Fekruna tal-Baħar
Ġiet Disinjata?
● Xi riċerkaturi jiddeskrivu l-vjaġġ li tagħmel il-fekruna tal-baħar mill-post fejn tkun tgħix sax-xatt fejn tbejjet bħala “wieħed mill-iktar atti meraviljużi fost l-annimali.” Għal għaxriet taʼ snin, dan ir-rettili qanqlilhom il-kurżità.
Ikkunsidra: Darba f’perijodu bejn sentejn u erbaʼ snin, il-fekruna titlaʼ fuq ix-xatt biex tbid il-bajd tagħha—li jgħoddu mal-mija f’bejta waħda—u taħbihom fir-ramel. Ladarba jkunu faqqsu, il-fkieren żgħar jerħulha għal ġol-oċean. Imbagħad jibdew vjaġġ li jgħaġġeb u li b’kollox jistaʼ jkopri distanza taʼ xi 12,900 kilometru. Snin wara, il-fkieren nisa, li issa jkunu kibru, jerġgħu jmorru lura biex ibidu l-bajd tagħhom stess—fl-istess medda taʼ xatt fejn kienu faqqsu huma!
Kif isibu triqithom il-fkieren tal-baħar? “Jidher li qishom wirtu xi ħaġa ġo fihom li tiġbidhom lejn il-bajja fejn twieldu,” jgħid il-bijologu Kenneth Lohmann, mill-Università tan-North Carolina fl-Istati Uniti, li kien kwotat fin-National Geographic News. Ir-riċerka turi li l-fekruna tistaʼ tiddetermina fejn qiegħda billi ssib eżatt l-angolu u l-intensità tal-qawwa manjetika tal-art. Din l-abbiltà tal-għaġeb tgħin lil dawn il-fkieren żgħar u bla difiża biex jibdew il-vjaġġ tagħhom taʼ 12,900 kilometru madwar l-Atlantiku, “u dan jagħmluh waħedhom, mingħajr ma jsegwu fkieren oħrajn,” jgħid Lohmann.
Int x’taħseb? Il-kapaċità li għandha l-fekruna tal-baħar biex issib triqitha ġiet b’kumbinazzjoni jew ġiet disinjata?
[Kaxxa f’paġna 17]
FATTI INTERESSANTI
● Wara li tbid u taħbi l-bajd tagħha, il-fekruna tħalli l-bejta.
● Biex toħroġ mill-bajda li tkun fiha, il-fekruna tuża sinna speċjali msejħa karunkula, li mbagħad taqaʼ.
● Il-fkieren tal-baħar jgħaddu 90 fil-mija taʼ ħajjithom fl-oċean.
[Sors tal-Istampa f’paġna 17]
© Masa Ushioda/WaterF/age fotostock