Bafsa ba a Botšiša

Na ke Palelwa ke Selo se Sengwe le se Sengwe?

“Ke be ke dula ke nagana gore mogwera’ke o a mphala. Dilo ka moka di be di mo sepelela gabotse—o be a sa šome ka thata gore a di hwetše! Ke be ke dulela go ipotšiša gore nna ke hloma bjang. Se se dira gore ke inyatše kudu.”—Annette. *

NA GO ikwa o se na bokgoni go go thibela go dira dilo tše dingwe tše difsa? Na ka dinako tše dingwe batho bao o ba hlomphago bao ba sego ba ikemišetša go go kweša bohloko ba fela ba dira gore o ikwe o sa ikholofele? Na go nyamišwa ke dilo tšeo di kilego tša go palela go dira gore o thatafalelwe ke go leka gape? Ge e ba go le bjalo, o ka dira’ng gore o se ke wa hlwa o tshwenyega ka dilo tšeo di bego di go palela—e ka ba e le tšeo di bego di go palela e le ka kgonthe goba o fo ba o nagana gore di be di go palela?

O tla holega kudu ge o ka hwetša karabo ya potšišo yeo ya mafelelo ka ge bohle re fela re palelwa. (Baroma 3:23) Eupša batho bao ba sa hwego matwa ke bona ba ka kgonago go lebeletšana le dilo tšeo di kilego tša ba palela. Seo se bolela gore ba kgona go lebala tša nakong e fetilego gomme ba leka gape. Nakong e tlago, go na le kgonagalo e kgolo ya gore ba atlege! Ka gona anke re bone kamoo o ka kgonago go lebeletšana le ditlhohlo tše tharo—go palelwa mo go ka bago gona, go palelwa moo o inaganelago gona le go palelwa ga kgonthe.

GO PALELWA MO GO KA BAGO GONA → SEO SE KA DIREGAGO O nagana gore dilo di tlo hlakahlakana ke moka o phetha ka go tlogela go leka go dira selo se itšego, o nagana gore o ka se atlege.

Lemoga tlhohlo. Ka mo tlase, bea leswao le ✔ kgauswi le modiro wo o ka ratago go atlega go wona—eupša o nagana gore ruri o tlo go palela le ge o ka leka.

◯ Go emela ditumelo tša gago go bao o tsenago le bona ka klaseng

◯ Go dira kgopelo ya mošomo

◯ Go bolela pele ga batho

◯ Go bapala papadi e itšego

◯ Go opela goba go letša seletšwa se itšego

◯ Goba tše dingwe

Naganišiša ka yona. Ela hloko modiro wo o o kgethilego ka mo godimo gomme o nagane ka seo se ka diregago ka go araba dipotšišo tše di latelago:

‘Ke’ng seo nka ratago gore se direge?’

․․․․․

‘Ke’ng seo ke boifago gore se tla direga?’

․․․․․

Bjale ngwala lebaka le tee leo le dirago gore o leke go dira mošomo woo, go sa šetšwe gore o ka palelwa.

․․․․․

Mohlala wa ka Beibeleng. Ge Moshe a be a rongwa ke Jehofa Modimo gore a yo eta pele setšhaba sa Isiraele, sa pele seo a ilego a se nagana ke gore dilo di be di ka se sepele gabotse. O ile a  botšiša Modimo gore: “A re re bohle ga ba nkgolwe gomme ba gana tšeo ke ba botšago tšona, ke tla re’ng?” Ke moka o ile a thoma go nagana ka mafokodi a gagwe. O itše: “Ga se ka ka ka ba sekgwari sa go bolela. Ga ke tsebe gore ke tla ba botša ka reng.” Gaešita le ka morago ga gore Jehofa a mo holofetše go mo thuša, Moshe o ile a lopa ka gore: “Hle roma yo mongwe.” (Ekisodo 4:1, 10, 13, Contemporary English Version) Mafelelong Moshe o ile a amogela kabelo yeo ya gagwe gomme re a tseba gore go ile gwa direga eng. Moshe o ile a eta pele Baisiraele ka nywaga e 40 a hlahlwa ke Modimo.

Seo o ka se dirago. Kgoši Solomone o ngwadile gore: “Tšohle tšeo seatla sa gago se kgonago go di dira, di dire ka matla a gago ka moka.” (Mmoledi 9:10) Ka gona go e na le go dumelela go boifa go palelwa go go thibela go tšwela pele, leka kamoo o ka kgonago ka gona. O re’ng o sa nagane ka selo seo o ilego wa se dira gakaone kudu go feta kamoo o bego o naganne ka gona? O ithutile’ng ka wena selong seo o se dirilego ka katlego? Seo o ithutilego sona se ka go thuša bjang go fenya poifo le ge e le efe yeo o ka bago o na le yona gona bjale?

Tšhišinyo: Ge e ba go nyakega, kgopela motswadi goba mogwera yo a godilego ka tsebo gore a go fe ditšhišinyo tšeo di ka go thušago gore o ikholofele. *

GO PALELWA MOO O INAGANELAGO GONA → SEO O NAGANAGO GORE SE ILE SA DIREGA Ge motho yo mongwe a atlega go dira selo se sengwe, ge o mmapetša le wena o nagana gore o a go phala.

Lemoga tlhohlo. O ipapetša le mang, gona motho yoo o ile a fihlelela’ng seo se dirago gore o ikwe eka wena o fo palelwa?

․․․․․

Naganišiša ka yona. Na ruri go atlega ga motho yoo go bontšha gore wena o a palelwa? Ka mo tlase, ngwala ka selo seo se sa tšwago go direga, bjalo ka moleko wa sekolong, moo o ilego wa ŠOMA GABOTSE eupša motho yo mongwe a ilego a go phala.

․․․․․

Bjale ngwala lebaka leo le dirilego gore o katane ka tsela ye.

․․․․․

 Mohlala wa ka Beibeleng. Kaine o be a “tuka bogale” ge go be go bonala gore Jehofa o rata ngwanabo Abele. Jehofa o ile a lemoša Kaine ka lehufa la gagwe, eupša o ile a ba a bontšha gore o holofela gore Kaine a ka fetoga ge e ba a rata. Jehofa o itše go yena: “Na nka se go phagamiše ge o ka fetoga wa dira botse?” *—Genesi 4:6, 7.

Seo o ka se dirago. Go e na le go ‘tsoša phenkgišano’—gaešita le ge e fo ba ka kgopolong ya gago—reta ba bangwe ge ba atlega. (Bagalatia 5:26; Baroma 12:15) Le gona lemoga dilo tšeo wena o ka kgonago go di fihlelela eupša o se ke wa ikgantšha. Beibele e re: “Anke yo mongwe le yo mongwe a hlahlobe ditiro tša gagwe gomme o tla ba le lebaka la go hlalala ka yena ka noši.”—Bagalatia 6:4.

GO PALELWA GA KGONTHE → SEO SE ŠETŠEGO SE DIRAGETŠE O nagana ka selo seo se ilego sa go palela gomme wa kwa eka ga go thuše selo go leka go atlega.

Lemoga tlhohlo. Ke selo sefe seo se go paletšego seo o kwago bohloko ge o nagana ka sona?

․․․․․

Naganišiša ka yona. Na selo seo o ngwadilego ka mo godimo gore se a go palela se tloga se bontšha gore o palelwa ke selo se sengwe le se sengwe? Ka mohlala, ge e ba o na le mafokodi a itšego, na se se bolela gore go padile ka wena? Goba na se e fo ba pontšho ya gore o hloka thušo? Ge e ba o ile wa wa o bapala papadi e nngwe, o tla amogela thušo ya motho yo a nyakago go go tsoša. Go re’ng o sa dire dilo ka tsela ye ge o nyaka go lebeletšana le dilo tšeo di go paletšego? Ngwala ka mo tlase leina la motho yo o ka bolelago le yena ge o na le mathata. *

․․․․․

Mohlala wa ka Beibeleng. Ka dinako tše dingwe, moapostola Paulo o ile a nyamišwa ke mafokodi a gagwe. O ngwadile gore: “Joo, nna motho wa madimabe.” (Baroma 7:24, CEV) Lega go le bjalo, go molaleng gore Paulo o ile a lemoga gore go se phethagale ga gagwe ga go bolele gore o napile o paletšwe. O ngwadile gore: “Ke lwele ntwa e botse, ke feditše go kitima lebelo, ke bolokile tumelo.”—2 Timotheo 4:7.

Seo o ka se dirago. Go e na le go fo nagana ka diphošo tšeo o ilego wa di dira, nagana le ka dilo tše dibotse tšeo o di kgonago. Jehofa le yena o nagana ka dilo tše dibotse tšeo o kgonago go di dira. Beibele e re: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.”—Baheberu 6:10; Psalme 110:3.

Gopola se: Ga go motho yo a phethagetšego. Ka moka ga rena re fela re palelwa ke dilo tše dingwe. Ge o ka ithuta go se hwe matwa, o tla ba le matla a nyakegago ao a tla go thušago ge o godile. Diema 24:16 e re: “Moloki le ge a ka wa gašupa, o tla tsoga gape.” Wo ke mohuta wa motho yo o ka bago yena!

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa Wepesaeteng ya www.watchtower.org/ype

[Mengwalo ya tlase]

[Box/​Pictures on page 15]

SEO DITHAKA TŠA GAGO DI SE BOLELAGO

“Ge o ka dulela go dira dilo tšeo o di kgonago feela—ge e ba o sa leke dilo tše dingwe ka ge o tšhaba gore o tla palelwa—gona o a ithopa.”

“O ka ithuta diphošong tša gago gomme wa katanela go kaonefatša, goba o ka lebelela gore go padile kae gomme wa ikhomotša. Go ya ka gore o kgetha go ba motho wa mohuta mang.”

“Ge e ba ke tseba gore selo se sengwe se ka mpalela, ke dira metlae ka selo seo. Go kaone gore ke sege go e na le go hlwa ke selekegile. Ge o ka dulela go inyakela dilo tše dikgolo kudu, o ka se tsoge o thabile.”

[Diswantšho]

Andrea

Trenton

Naomi

[Lepokisi go letlakala 16]

KE KA BAKA LA’NG O SA BOTŠIŠE BATSWADI BA GAGO?

Ge le be le lekana le nna, ke dilo dife tšeo di ilego tša le nyamiša? Le ile la lebeletšana bjang le tšona? Na le sa fela le lebeletšana le dilo tšeo?

․․․․․

[Seswantšho go letlakala 16]

Motho yo a sa hwego matwa o a tsoga ge a be a wele—o amogela thušo ge e ba e nyakega