Mauntat Bala ang Terorismo?

‘KINAHANGLAN panikasugan gid naton nga bag-uhon ang tagipusuon kag ang hunahuna.’ Amo ini ang konklusion sa 20 ka tuig nga pagtuon sa personalidad sang ginakabig nga mga terorista.

Pero, ano ang makapabag-o sa tagipusuon kag hunahuna sang mga tawo nga tama ka bayolente kag gusto gid magtimalos?

Ang Libro nga Makapabag-o sa Tagipusuon

Sang dekada 1990, gin-usisa ni Hafeni ang iya mga ginapatihan kag nagbakal sing Biblia. Nagsiling sia: “Gin-una ko basa ang Ebanghelyo [ang tulun-an sang Mateo, Marcos, Lucas, kag Juan], nga nagasugid parte sa kabuhi ni Jesus. Samtang ginabasa ko ini, nanamian gid ako sa personalidad ni Jesus. Kaayo sa iya kag wala sia sing ginapasulabi. Nalipay gid ako sa sini.”

Nagsiling pa gid si Hafeni: “Nakabulig gid sa akon ang Binuhatan 10:34 kag 35 nga mahangpan ang ginabatyag sang Dios.” Nagsiling ini: “Ang Dios wala sing ginapasulabi, apang sa  tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”

“Nakahinakop ako,” siling ni Hafeni, “nga ang mga tawo mismo ang responsable sa pag-ilinaway sang mga tribo, pungsod, kag rasa. Narealisar ko nga mapabag-o sang Biblia ang hunahuna sang mga tawo, kag ang pinakaimportante amo ang maayo nga kaangtanan sa Dios. Mas importante ini sangsa makig-away para sa tribo, rasa, ukon kolor.”

Si Joseba, nga ginsambit sa una nga artikulo, amo ang lider sang gamay nga grupo nga nagplano sa pagbomba sa estasyon sang pulis. “Pero antes sini,” paathag ni Joseba, “gin-aresto ako kag ginpriso sing duha ka tuig.” Sang ulihi, ang iya asawa nga si Luci nagtuon sa Biblia upod sa mga Saksi ni Jehova. Wala madugay, nag-entra man si Joseba sa sini nga pagtuon.

Nagsiling si Joseba: “Samtang nagadamo ang akon natun-an parte kay Jesus, mas gusto ko sia ilugon. Natandog gid ako sa iya ginhambal nga, ‘Ang tanan nga nagagamit sang espada mapatay sa espada.’ Matuod gid ini.” (Mateo 26:52) Nagsiling sia: “Ang pagpatay nagadabok lang sa kaakig kag pagtimalos sang pamilya. Nagaresulta lamang ini sa kasakit kag wala gid sing kaayuhan.” Ginbag-o ni Joseba ang iya panghunahuna.

Napamatud-an nanday Hafeni kag Joseba nga mapabag-o sang Biblia ang kabuhi sang tawo. Nagsiling ang Biblia nga “ang pulong sang Dios buhi kag gamhanan” kag mahibaluan sini ang “mga tinutuyo sang tagipusuon.” (Hebreo 4:12) Ang gahom sang Pulong sang Dios nagbulig sa madamo nga magbag-o. Pero may pamatuod bala nga nahiusa sa bilog nga kalibutan ang mga nagasunod sa ginatudlo sang Biblia?

Paghiliutod nga Base sa Gugma

Sang nagtambong si Hafeni sa pagtilipon sang mga Saksi ni Jehova, natandog gid sia kay  nakita niya nga nahiusa sila. “Nalipay gid ako sa pagtupad sa puti nga mga tawo,” siling niya. “Wala gid ako maghunahuna nga tawgon ko nga utod ang isa ka puti. Nagbakod ang akon pagpati nga matuod ang relihion sang mga Saksi kay nagahigugmaanay sila bisan lainlain ang ila rasa. Nahiusa man sila, nga amo gid ang handum ko halin pa sang una.”

Nagsiling si Jesus nga makilala ang iya matuod nga mga sumulunod kon “maghigugmaanay” sila. (Juan 13:34, 35) Wala man si Jesus nag-entra sa kinagamo sa pulitika kag ginsilingan niya ang iya mga disipulo: “Kamo indi bahin sang kalibutan.” (Juan 6:15; 15:19; Mateo 22:15-22) Ang tanda sang matuod nga Cristiano halin sang una amo ang gugma kag pagpabilin nga neutral.

Pag-aplikar sang Gintudlo ni Jesus

Paano maghigugmaanay ang mga tawo bisan pa lapnag ang terorismo nga nagapabahinbahin sa ila? Kon magkinagamo bangod sa pulitika, mas apinan pa sang isa ang iya rasa, pungsod, ukon tribo.

Halimbawa, sang 1914, ang pagpangapin ni Gavrilo Princip sa iya tribo amo ang rason kon ngaa ginpatay niya si Archduke Francis Ferdinand, ang manunubli sa trono sang Austria kag Hungary. Si Princip miembro sang organisasyon nga Black Hand, nga suno sa konstitusyon sini mas pilion nila ang “rebulosyon imbes nga . . . repormasyon” para matuman ang ila mga handum. Bangod sini, nag-ilinaway ang mga pungsod nga nagapangangkon nga mga Cristiano. Nagresulta ini sa Bug-os Kalibutan nga Inaway I kag kamatayon sang minilyon ka soldado nga nagasunod kuno kay Jesus, ang “Principe sang Paghidait.”—Isaias 9:6.

Pagkatapos sang inaway, ginpakalain sang kilala nga lider sang relihion nga si Harry Emerson Fosdick ang mga lider sang nagapangangkon nga Cristiano kay wala nila gintudluan ang ila mga miembro nga ilugon si Jesus. “Ginhanas naton ang mga tawo para sa inaway,” siling niya. “Ginhimo naton ang mga soldado nga aton mga baganihan kag ginpakabit pa gani naton ang mga bandera sa inaway sa sulod sang simbahan.” Naghinakop si Fosdick: “Gindayaw naton ang Prinsipe sang Paghidait, pero ginhimaya man naton ang inaway.”

Sa pihak nga bahin, ang pagtuon nga ginpagua sang 1975 nagsiling: “Wala gid nangin bayolente ang mga Saksi ni Jehova kag nagpabilin sila nga neutral nga mga Cristiano sa duha ka daku nga inaway sa kalibutan kag sa pagbanggianay sang mga militar sa tion sang ‘Cold War.’” Bisan pa ginmaltrato kag ginpriso ang mga Saksi, “wala gid sila nagbalos.” Ang pagtuon naghinakop: “Ang mga panudlo sang mga Saksi ni  Jehova nabase sa ila pagpati nga ang Biblia pulong sang Dios.”

Kapuslanan sa Pagsunod sa mga Panudlo sang Biblia

Ang anay primer ministro sang Belgium ginhatagan sang iya kaingod sing libro nga Ang Pinakabantog nga Tawo nga Nagkabuhi, nga nagasugid parte sa kabuhi ni Jesus. Natandog gid sia sa iya nabasa. “Kon mangin interesado lamang ang mga tawo sa Ebanghelyo kag iaplikar ang mga prinsipio nga gintudlo ni Jesucristo,” sulat niya sa iya kaingod, “indi amo sini ang aton kahimtangan subong.”

“Indi na naton kinahanglan ang Konseho para sa Seguridad,” padayon niya, “madula man ang mga terorista, [kag] bayolente nga mga buhat.” Pero nagsiling sia: “Damgo lamang ini tanan.” Pero damgo lang gid bala ini? Bisan pa lapnag ang bayolente nga mga buhat subong, madamo ang nabuligan sang Biblia nga untatan ini, kag dulaon ang ila aligutgot bangod sa dinekada nga pagpamatay nga ila nasaksihan.

Si Andre nga ginsambit sa una nga artikulo, diutayan lang mapatay sang bomba nga nagpatay sa pila niya ka abyan. Ini nga bomba ginbutang sang isa ka militante nga grupo. Nagtuon si Andre sa Biblia kag ginsunod ang laygay sini nga ‘magpatawad sing kinabubut-on.’ (Colosas 3:13) Pagligad sang pila ka tuig sa tapos sang pagpamomba, si Hafeni nangin miembro sini nga grupo. Pero sang ulihi, ginsunod man niya ang mga prinsipio sang Biblia kag nag-untat sa pagkabayolente. (Salmo 11:5) Subong, pareho na sila nga mga Saksi ni Jehova kag magkaupod nga nagatrabaho sa opisina sang translation sang mga Saksi sa isa ka pungsod sa Aprika.

Masaligan nga Palaabuton

Narealisar sang minilyon sa bilog nga kalibutan nga ang pagtuon sa Biblia nagapabakod sang ila pagsalig sa isa ka maayo nga palaabuton. Halimbawa, isa ka adlaw, ginsugid ni Andre sa ila kaingod ang promisa sang Biblia parte sa matarong nga bag-ong kalibutan. (Isaias 2:4; 11:6-9; 65:17, 21-25; 2 Pedro 3:13) Hinali lang nag-abot ang mga soldado kag ginpalibutan ang balay kag nagmando kay Andre nga magua para imbestigahon. Sang nahibaluan nila nga manunudlo sia sing Biblia kag nanamian gid ang iya kaingod sa iya mensahe, naghalin ang mga soldado.

Ginpaathag ni Andre nga magapasilabot ang Dios sa mga nagakatabo sa mga tawo, pareho sang ginhimo niya sang adlaw ni Noe, sang “naglapnag ang pagpamigos” sa duta. (Genesis 6:11, Biblia sang Katilingban sang mga Kristiano, BKK) Ginlaglag sang Dios ang mga tawo sadto paagi sa anaw kag ginluwas ang mahidaiton nga si Noe kag ang iya pamilya. “Kaangay sang panahon ni Noe,” siling ni Jesus, “[amo] man sini ang matabo sa presensia sang Anak sang tawo.”—Mateo 24:37-39.

Si Jesus, ang “Anak sang tawo,” amo ang ginpili sang Dios nga magagahom sa iya gobierno sa langit nga ginatawag Ginharian sang Dios. (Lucas 4:43) Sa ulihi, pangunahan niya ang mga anghel para dulaon ang pagkabayolente sa duta. Subong Hari sa langit, si Jesus ‘wala sing pinilian kag paluntaron niya ang paghidait.’ Amligan niya ang iya mga sakop “gikan sa kapintas kag bayolente nga kamatayon.”—Salmo 72:7, 14, Contemporary English Version, CEV.

Pagkatapos sini, masaksihan sang tanan nga matarong nga sakop sang langitnon nga Hari ang paghimo sa duta nga isa ka mahidaiton nga paraiso. (Lucas 23:42, 43) “Ang paghidait kag hustisya,” siling sang Biblia, “magaluntad sa kabukiran kag kabakuluran.”—Salmo 72:1-3, CEV.

Indi ka bala malipay nga mag-istar sa kalibutan nga ginagamhan sini nga hari? Sigurado gid nga wala na didto sing terorismo.

[Blurb sa pahina 7]

Napamatud-an nanday Hafeni kag Joseba nga mapabag-o sang Biblia ang kabuhi sang tawo

[Blurb sa pahina 9]

‘Kon iaplikar sang mga tawo ang mga prinsipio nga gintudlo ni Jesucristo, indi amo sini ang aton kahimtangan subong. Indi na naton kinahanglan ang Konseho para sa Seguridad, madula man ang mga terorista, kag bayolente nga mga buhat.’—Anay primer ministro sang Belgium

[Retrato sa pahina 8]

Ang pag-aplikar sa mga prinsipio sang Biblia nagbulig kanday Hafeni kag Andre nga higugmaon ang isa kag isa