Ka ku ya ka Bibele

Libaka ha mu Swanela ku Tokomela Lipulelo za Mina

Mueteleli wa naha ye ñwi u kopana ni musali-muhulu yo muñwi. Ba ambolisana ka likute ni musali-muhulu yo. Mi hasamulaho wa fo, mueteleli yo ka ku sa lemuha kuli maikrofoni ne i si ka timiwa kale, u biza musali-muhulu yo kuli ki ya ngangatezi toho, mi u bilaela kuli makwambuyu ba hae ne ba sa swaneli ku lumeleza musali-muhulu yo ku ba bukaufi. Batu ba mwa naha ba komokiswa ni ku bilaezwa ki mo mueteleli yo a bizelize musali-muhulu yo. Mueteleli yo u sinyeha libizo, mi u luza liketisa ze ne bile teñi hasamulaho wa mazazi a 8 ku zwa fo.

HA KU na mutu ya kona ku tokomela lilimi la hae ka nzila ye petehile. (Jakobo 3:2) Nihakulicwalo, taba ye ne ezahezi ye bulezwi fahalimu i bonisa kuli lipulelo za luna li kona ku ama ba bañwi. Lika ze mu bulela ni mo mu li bulelela li ama hahulu libubo la mina, musebezi o mu eza mwa bupilo, mane hamohocwalo ni za ku kondisa bulikani bwa mina ni ba bañwi kamba ku tokwa.

Kono kana mwa ziba kuli lipulelo za mina li peta ze ñata? Bibele i talusa kuli lipulelo za mina li bonisa ba bañwi se mu li sona mwahali, li patulula mo mu inezi luli. Jesu naa ize: “Mulomo u buleliswa ki se si tezi mwa pilu.” (Mateu 12:34) Bakeñisa kuli lipulelo za mina li bonisa maikuto ni minahano ya mina, ili lika ze bonisa kuli mu batu ba ba cwañi, ki kwa butokwa ku nyakanga ze mu bulela ka tokomelo. Kana Bibele ya kona ku mi tusa? Ha mu nyakisise litaba ze latelela.

Mwa ku Bela ni Lipulelo ze Nde

Mutu u kalanga ku nahana a si ka bulela kale nto ye ñwi. Kuli mu kone ku ba ni lipulelo ze nde, mu tokwa ku ba ni munahanelo o munde. Mu lemuhe mo ku itusiseza Linzwi la Mulimu ku amela mihupulo ya mina, ili nto ye kona ku mi tusa ku ba ni lipulelo ze nde.

Mu taze pilu ya mina ka lika ze nde. Bibele i talusa lika ze nde zeo ka ku bulela kuli: “Linto kaufela ze li za niti, kaufela ze kutekeha, kaufela ze lukile, kaufela ze kenile, kaufela ze na ni libubo le linde, kaufela ze na ni swanelo, ni ze lukela ku lumbwa, ibe zona ze mu nze mu hupula.”—Mafilipi 4:8.

Ku utwa kelezo ye nde yeo ku ka mi tusa ku ambuka mihupulo ye fosahezi. Mu hupule kuli minahano ya mina i susuezwanga hahulu ki lika ze mu bona ni ze mu bala. Kacwalo, kuli mu ambuke mihupulo ye maswe ni ye masila, mu tokolomohe lika ze maswe. Ku eza cwalo ku tokwa kuli mu ambuke linzila za ku itabisa ka zona ze ama mifilifili ni maswaniso a mapunu. (Samu 11:5; Maefese 5:3, 4) Mwa sibaka sa ku isa mamelelo ya mina kwa lika ze cwalo, mu nahanange lika ze kenile ni ze li ze nde. Bibele ya kona ku mi tusa ku eza cwalo. Ka mutala, mu bale Liproverbia 4:20-27; Maefese 4:20-32; ni Jakobo 3:2-12. Mu bone mo ku itusiseza likuka ze mwa mañolo ao ku kona ku mi tuseza ku ba ni lipulelo ze nde. *

Mu kete manzwi a mina ka tokomelo. Liñolo la Liproverbia 12:18 li bulela kuli: “Yo muñwi ha bulela, manzwi a hae a taba sina mukwale; kono mulomo wa ya butali u wisa pilu.” Haiba mu lemuha kuli manzwi a mina hañata a ‘tabanga’ ba bañwi kwa pilu kamba ku ba utwisa butuku, mu ka eza hande ku ezanga buikatazo bwa ku nahana pili mu si ka bulela kale. Mu mamele kelezo ye nde hahulu ye fumaneha kwa Liproverbia 15:28, ye li: “Pilu ya mutu ya na ni  niti i ikupula kalabo; kono mulomo wa ya maswe u tahisa ze maswe.”

Mu like ku itomela sikonkwani. Mwa kweli ye tatama, mu ikatulele ku sa bulelanga nto ya pili ye taha kwa pilu ya mina, sihulu ha mu halifisizwe. Mwa sibaka sa ku ezanga cwalo, mu hupulange mañolo a bonisizwe mwa taba ye, mi mu ezange buikatazo bwa ku bulela ka butali, ka lilato, ni ka ku wa pilu. (Liproverbia 15:1-4, 23) Kono ku eza feela cwalo ha ku si ka likana.

Mu lapele ku Mulimu kuli a mi tuse. Yo muñwi wa bañoli ba Bibele naa lapezi kuli: “Manzwi a mwa mulomo wa ka, ni minahano ya mwa pilu ya ka, ibe zo ka amuhela Muñaa Bupilo.” (Samu 19:14) Mu zibise Jehova Mulimu ka za takazo ya mina ya ku bulelanga ka nzila ye mu tabisa ni ye katulusa ba bañwi. Liñolo la Liproverbia 18:20, 21 li bulela kuli: “Mutu a kuliswe ki ze zwa mwa mulomo wa hae. Lifu ni bupilo li mwa maata a lilimi.”

Mu itusise Linzwi la Mulimu sina siiponi. Bibele i swana sina siiponi se mu kona ku itatuba ka sona. (Jakobo 1:23-25) Ka mutala, ha mu nze mu nahanisisa likuka za Bibele ze talu ze latelela, mu ipuze kuli, ‘Kana mubulelelo wa ka ni mo ni zibahalela za lumelelana ni sikuka se?’

“Kalabo ye bunolo i kuyula buhali; kono linzwi le li utwisa butuku li zusa buhali.” (Liproverbia 15:1) Kana mu bulelanga ka ku wa pilu ni ka kozo?

“Ku si ke kwa zwa linzwi le li maswe mwa milomo ya mina, kono ku zwe taba ye nde feela, ye tusa ku yahisa, kuli i batiseze ba ba i utwa sishemo.” (Maefese 4:29) Kana lipulelo za mina za yahisanga batu be mu inzi ni bona?

“Mubulelelo wa mina ibe o na ni musa kamita, o lungilwe lizwai, kuli mu zibe mo mu lukela ku alabela mutu kaufela.” (Makolose 4:6) Kana mwa likanga ku bulela ka musa ni ka nzila ye tahisa kuli ba bañwi ba fumane bunolo ku utwa ze mu bulela, niha mu li mwa miinelo ye taata?

Ha mu lukisa mafosisa e mu bona mwa siiponi, mu ka ba ya kateleha ku ba bañwi mi mu ka ikutwa hande ni ku fita. Mu ka tuseha ka nzila ye swana haiba mu kondolokisa lipulelo za mina ka ku talima mwa siiponi sa swanisezo, lona Linzwi la Mulimu.

[Litaluso za kwatasi]

KANA MU KILE MWA IPUZA KULI:

● Lipulelo za ka li bonisañi?—Luka 6:45.

● Ni swanela ku bulelanga cwañi ku ba bañwi?—Maefese 4:29; Makolose 4:6.

● Ki lika mañi ze tusa ze ni kona ku eza kuli ni kondolokise lipulelo za ka?—Samu 19:14; Mafilipi 4:8.

[Siswaniso se si fa likepe 25]

Ze lu bulela li ama libubo la luna ni silikani sa luna ni ba bañwi