Ħarsa Lejn id-Dinja
Fl-ewwel sena u nofs taʼ xogħol iebes biex it-traffikar tan-nies jiġi kontrollat, “il-pulizija Ċiniża ħelset 10,621 mara u 5,896 tifel u tifla li kienu nħatfu.” Xi 15,673 persuna suspettata kienu arrestati.—CHINA DAILY, IĊ-ĊINA.
“Fil-Kenja, iktar minn 1,000 għalliem tkeċċew mix-xogħol talli abbużaw sesswalment minn tfal bniet tal-iskola fl-aħħar sentejn. . . . Servizz kunfidenzjali bit-telefon madwar il-pajjiż kollu . . . wera li l-problema kienet iżjed mifruxa milli kien maħsub qabel.”—DAILY NATION, IL-KENJA.
Skont studju li sar, in-nies li użaw it-“tanning beds” għandhom 75 fil-mija taʼ riskju akbar li jkollhom il-melanoma minn dawk li qatt ma użawhom. Dawk li għal iktar minn 50 siegħa użaw xi apparat magħmul biex in-nies jismaru għandhom minn 2.5 sa 3.0 drabi iktar ċans li jiżviluppaw il-melanoma.—CANCER EPIDEMIOLOGY, BIOMARKERS & PREVENTION, L-ISTATI UNITI TAL-AMERIKA.
“Tmienja fil-mija biss [min-nisa Kanadiżi li jkunu se jiżżewġu] jaħsbu li tkun idea tajba li wieħed jastjeni mis-sess qabel iż-żwieġ,” u “74 fil-mija tal-koppji diġà jgħixu flimkien qabel jiżżewġu.”—WEDDINGBELLS, IL-KANADA.
Perikli Minn Ilma Mniġġes
Skont rapport maħruġ mill-Ġnus Magħquda, “illum iktar nies qed imutu b’ilma kontaminat u mniġġes milli bil-forom kollha taʼ vjolenza, inkluż il-gwerer.” Il-ĠM tirrapporta li żewġ miljun tunnellata taʼ skart—agrikolu u industrijali, kif ukoll tad-dranaġġ, u nibqgħu sejrin—qed jitbattlu kuljum fix-xmajjar u l-ibħra, u b’hekk ixerrdu mard u jagħmlu l-ħsara lis-sistemi ekoloġiċi. Iktar minn hekk, kull 20 sekonda, tifel jew tifla taħt il-ħames snin tmut b’mard li għandu x’jaqsam mal-ilma. Achim Steiner, direttur esekuttiv tal-Programm tal-ĠM għall-Ambjent, jgħid: “Jekk id-dinja trid timxi ’l quddiem, . . . irridu ningħaqdu biex bi sforz iktar responsabbli u iktar intelliġenti naraw kif se nimmaniġġaw l-iskart.”
Ikantaw Biex Terġaʼ Tiġihom il-Vuċi
Numru taʼ pazjenti li telqitilhom il-vuċi wara attakk taʼ puplesija ġew megħjunin biex jirkuprawha billi jkantaw. Xi newroloġi jinkuraġġixxu lill-pazjenti pupletiċi biex ikantaw dak li jkunu jridu jgħidu, billi jagħtu ritmu u melodija lill-ħsibijiet tagħhom. Il-kura, imsejħa terapija għall-intonazzjoni bil-kant, ġabet riżultati tajbin ħafna. Wara 15-il ġimgħa taʼ terapija, “il-pazjenti jitgħallmu bil-mod biex ibiddlu l-kliem li jkantaw fi kliem mitkellem,” jispjega The Wall Street Journal.
“Splużjoni taʼ Qerq fil-Klassi”
Fi stħarriġ li sar fuq 20,000 student tal-università tal-ewwel sena fil-Kanada, 73 fil-mija minnhom “ammettew li għamlu att serju jew iktar taʼ diżonestà akkademika f’xogħol miktub meta kienu fl-iskola sekondarja,” jgħid il-Kunsill Kanadiż tat-Tagħlim (CCL). Università minnhom irrapportat li każi taʼ qerq u taʼ li jintuża xogħol ħaddieħor żdiedu b’81 fil-mija bejn is-snin 2003 u 2006. Dr Paul Cappon, president tas-CCL, jgħid, “Fl-għaxar snin li għaddew, l-apparat b’teknoloġija għolja u li fih l-Internet għen biex ikun hemm splużjoni taʼ qerq fil-klassi.”