Bafsa ba a Botšiša

Ke Eng Seo ke Swanetšego go se Tseba ka Mekgwa ya go Dira Bagwera ka Inthanete?—Karolo 1

“Ke na le bagwera dinageng tše dingwe gomme tsela e kaone ya go boledišana le bona ke ka mokgwa wa go dira bagwera ka Inthanete. Ke thabišwa ke gore ke kgona go boledišana le bona gaešita le ge ba le kgole kudu.”—Sue, 17. *

“Ke nagana gore go dira bagwera ka Inthanete ke go itshenyetša nako, ga go bontšhe gore motho o tshwenyega ka batho ba bangwe. Go boledišana le batho o ba lebeletše ka mahlong ke yona feela tsela ya go dira bagwera.”—Gregory, 19.

MANTŠUNG a lego ka mo godimo, ke afe ao a bonagalago a hlalosa tsela yeo wena o bonago taba ye ka yona? Go sa šetšwe gore ke afe, go na le selo se tee seo e lego therešo: Go gwerana le batho ka Inthanete go thomile go ata kudu. * Ela hloko se se latelago: Go tšere nywaga e 38 gore kgašo ya radio e fihlelele batho ba dimilione tše 50, gwa tšea nywaga e 13 gore kgašo ya thelebišene e fihlelele yona palo yeo, eupša gwa tšea feela nywaga e 4 gore Inthanete e fihlelele palo yeo. Batho ba dimilione tše 200 ba kgeregetše mokerong wa Inthanete wa go dira bagwera wa Facebook nakong ya dikgwedi tše 12 feela!

Swaya lefoko le le latelago gore ke therešo goba maaka:

Bafsa bao ba lego mahlalagading ke bona ba dirišago mekgwa ya go gwerana le batho ka Inthanete go feta batho ka moka. ․․․․․ Therešo ․․․․․ Maaka

Karabo: Maaka. Mo e ka bago peditharong ya batho bao ba dirišago mekero e tumilego ya go dira bagwera ka Inthanete ba na le nywaga e 25 goba go ya godimo. Ka 2009 palo e kgolo yeo e ilego ya oketšega mekerong ye e be e le ya batho ba nywaga ya ka godimo ga e 55!

Lega go le bjalo, bafsa ba dimilione ba diriša mekgwa ya go dira bagwera ka Inthanete, e bile ba bangwe ba bona se e le mokgwa o mokaone wa poledišano. Mofsa yo a lego mahlalagading yo a bitšwago Jessica, o re: “Ke ile ka tswalela akhaonto ya ka, eupša ka gapeletšega go e bula gape ka gobane ga go motho yo a bego a ikgokaganya le nna ka mogala. Okare batho ba a go lebala ge o sa diriše mokgwa wa go dira bagwera ka Inthanete!”

Ke’ng seo se dirago gore batho ba rate mokgwa wo wa go dira bagwera ka Inthanete? Karabo e bonolo, ke gore: Batho ba rata go ikgokaganya le ba bangwe. E bile mokgwa wa go dira bagwera ka Inthanete o reretšwe sona seo. Ela hloko gore gore’ng ba bantši ba ka lekega go diriša mokgwa wo.

1. O bonolo.

“Go ka ba thata go ikgokaganya le bagwera ba gago, eupša go ba bonolo ge e ba ka moka ga bona ba le Wepesaeteng e tee!”—Leah, 20.

 “Nka no ngwala selo se itšego gomme gwa ba bjalo ka ge eka ke rometše molaetša ka e-mail go bagwera ba ka ka moka ka nako e tee.”—Kristine, 20.

2. Kgateletšo ya dithaka.

“Ke dula ke hwetša melaetša ya gore ke ikgweranye le batho ba itšego, eupša ga ke na akhaonto, ka gona ke palelwa ke go ikgweranya le bona.”—Natalie, 22.

“Ge ke botša batho gore nna ke bone go le kaone gore ke se be le akhaonto, ba ntomolela mahlo eka ba re: ‘O a gafa na?’”—Eve, 18.

3. Kgateletšo ya mekero ya ditaba.

“Go na le selo se sengwe seo mekero ya ditaba e tutueletšago batho go se dumela, sa gore ge o sa ikgokaganye le batho, o ka se be le bagwera. E bile go se be le bagwera go dira gore bophelo bo tšwafiše. Ka gona ge o sa diriše mekgwa ya go dira bagwera ka Inthanete, o bonagala o se selo.”—Katrina, 18.

4. Sekolo.

“Barutiši ba ka ba diriša mekgwa ya go dira bagwera ka Inthanete. Ba bangwe ba re ngwalela melaetša ba re botša gore re tlo ngwala neng molekwana. Goba ka mohlala, ge ke sa kwešiše dipalo, ke kgona go ngwalela morutiši wa ka molaetša Wepesaeteng ya gagwe gomme a kgona go nthuša go rarolla bothata bjoo gona mo Inthaneteng.”—Marina, 17.

5. Mošomo.

“Batho bao ba tsomago mešomo ba diriša mekgwa ya go dira bagwera ka Inthanete gore ba ikgokaganye le ba bangwe. Ka dinako tše dingwe se se ba thuša go hwetša mošomo.”—Amy, 20.

“Ke diriša mokgwa wa go dira bagwera ka Inthanete go phetha mošomo wa ka. Se se dira gore bareki ba kgone go bona mediro e mefsa ya bokgabo yeo ke e dirilego.”—David, 21.

Na le wena o swanetše go diriša mokgwa wa go dira bagwera ka Inthanete? Ge e ba o dula ka gae, batswadi ba gago ke bona ba swanetšego go go direla phetho. * (Diema 6:20) Ge e ba batswadi ba gago ba sa nyake o e diriša, o swanetše go dumelelana le bona.—Baefeso 6:1.

Ka lehlakoreng le lengwe, batswadi ba bangwe ba dumelela bana ba bona bao ba godilego ka tsebo gore ba diriše mekgwa ya go dira bagwera ka Inthanete—gomme ba dula ba hlahloba tsela yeo ba e dirišago ka yona. Ge e ba batswadi ba gago ba dira bjalo, na o nagana gore ba tsenatsenana le ditaba tša gago? Ga go bjalo! Mokgwa wa go dira bagwera ka Inthanete ke sedirišwa se matla gomme ke mo go swanetšego gore batswadi ba gago ba tshwenyege ka tsela yeo o o dirišago ka yona. Therešo e ka se fetogego ke gore mokgwa wa go dira bagwera ka Inthanete—go swana le mokgwa o mongwe le o mongwe wa go diriša Inthanete—o na le dikotsi tša wona. Ge e ba batswadi ba gago ba go dumelela go diriša mokgwa wo, o ka phema bjang dikotsi tša wona?

Go Otlela Gabotse

Go diriša Inthanete go ka swantšhwa le go otlela koloi. Mohlomongwe o ka ba o lemogile gore ga se batho ka moka ba ba nago le mangwalo a go otlela bao ba otlelago gabotse. Ge e le gabotse, batho ba bantši ba dirile dikotsi tše dikgolo ka baka la go se šetše goba go hlokomologa dilo.

Go bjalo le ka batho bao ba dirišago Inthanete. Re ka re ba bangwe ba otlela gabotse; ba bangwe ba otlela bošaedi. Ge e ba batswadi ba gago ba go dumelela go diriša mokgwa wa go dira bagwera ka Inthanete, ba a go bota gore o ka phema mekgwa e kotsi ya go diriša Inthanete. Ka gona, o bonagala o le mootledi wa mohuta mang? Na o bonagala o “lota bohlale le tlhaologanyo”?—Diema 3:21.

Sehlogong se re tla hlahloba dikarolo tše pedi tša mekgwa ya go dira bagwera ka Inthanete tšeo o swanetšego go di hlokomela kudu—ditaba tša gago tša khupamarama le nako ya gago. Sehlogong se se latelago sa “Bafsa ba a Botšiša” sa Phafoga! ye re tla hlahloba botumo bja gago le bagwera ba gago.

DITABA TŠA GAGO TŠA KHUPAMARAMA

Mohlomongwe ge o nagana ka mekgwa ya go dira bagwera ka Inthanete, o ka ba o sa nagane gore  seo se ka akaretša ditaba tša gago tša khupamarama. Ge e le gabotse, na morero wa wona ga se go ikgweranya le batho? Ka gona, go se be šedi go ka feleletša ka masetlapelo.

Ka mohlala, a re re o swere tšhelete e ntši kudu. Na o tla e bontšha motho yo mongwe le yo mongwe ge o dutše o sepela mo tseleng le bagwera ba gago? Seo e tla be e le bošilo—o tla ba o ipiletša mathata a le kgole! Ge eba o le bohlale, o tla uta tšhelete yeo moo e ka se bonwego.

A re re ditaba tša gago tša khupamarama ke tšhelete. O dutše o naganne ka seo, lebelela lelokelelo leo le lego ka mo tlase gomme o swaye dilo tšeo o bego o ka se ikwe o lokologile go di bontšha motho yo o sa mo tsebego.

․․․․․ aterese ya mo ke dulago

․․․․․ e-mail ya ka

․․․․․ moo ke tsenago sekolo

․․․․․ dinako tšeo ke lego ka gae ka tšona

․․․․․ dinako tša ge go se motho ka gae

․․․․․ dinepe tša ka

․․․․․ tsela yeo ke lebelelago dilo ka yona

․․․․․ dilo tšeo ke di ratago

Gaešita le ge o ka ba o rata batho kudu, mohlomongwe o tla dumela gore go na le dilo tše dingwe go tše di lego ka mo godimo tšeo di sa swanelago go bontšhwa motho yo mongwe le yo mongwe. Eupša bafsa ba bantši—le batho ba bagolo—ba ile ba ikhwetša ba boditše batho bao ba sa ba tsebego ditaba tše bjalo! O ka phema bjang dikotsi tše bjalo?

Ge e ba batswadi ba gago ba go dumelela go diriša mekgwa ya go dira bagwera ka Inthanete, o swanetše go tlwaelana gabotse le melawana ya yona ya tšhireletšego—gomme o e diriše. O se ke wa tlogelela wepesaete ye ya go dira bagwera ka Inthanete e laola ditaba tša gago tša khupamarama. Therešo ke gore, mathomong ge o e diriša e ka dumelela batho ba bantši go bona le go ngwala dilo tše itšego Wepesaeteng ya gago go feta kamoo o lemogago ka gona. Le ke le lengwe la mabaka ao a dirilego gore ngwanenyana yo a bitšwago Allison a beakanye kamoo Wepesaete ya gagwe e šomago ka gona gore e be feela bagwera ba gagwe ba paale bao ba ka bonago dilo tšeo a di ngwalago. O re: “Ba bangwe ba bagwera ba ka ba na le bagwera bao nna ke sa ba tsebego gomme ke be ke sa nyake gore batho bao ke sa ba tsebego ba bale ditaba tša ka.”

Gaešita le ge o bolela feela le bagwera ba gago ba paale, o swanetše go ba šedi. Corrine wa nywaga e 21 o re: “O ka lemalela go dula o lebelela seo bagwera ba gago ba se ngwadilego, ka gona wa thoma go ngwala ditaba tše dintši ka wena tšeo o sa swanelago go di bolela.”

Dula o gopola gore ge e le ka Inthanete, ga se ka mehla ditaba di dulago e le khupamarama. Ka baka la’ng? Gwenn Schurgin O’Keeffe o ngwadile ka pukung ya gagwe ya CyberSafe gore: “Diwepesaete tše dikgolo di boloka difaele tša ditaba tša tšona.” O oketša ka gore: “Dilo tšeo re di ngwalago moo ga di hwelele. Re swanetše go di tšea e le tšeo di tla dulelago moo sa ruri ka gobane go ka ba go na le kopi ya tšona kae kae; ge e ba re ka re di napile di hweletše, re tla ba re iphora.”

NAKO YA GAGO

Go swana le ditaba tša gago tša khupamarama, nako ya gago le yona e ka swantšhwa le tšhelete e ntši. Ka gona, ka tsela e itšego, o swanetše go diriša nako ya gago ka bohlale. (Mmoledi 3:1) E bile yeo ke e nngwe ya ditlhohlo tše dikgolo ge go tliwa mokgweng le ge e le ofe wa go diriša Inthanete, go akaretša le mokgwa wa go dira bagwera ka Inthanete. *

“Gantši ke be ke ipotša gore: ‘Ke ya go tsena go yona ka metsotswana feela.’ Eupša go fele iri ke dutše moo Inthaneteng.”—Amanda, 18.

“Ke be ke lemaletše mokgwa wo. Nako le nako ge ke fihla gae ke etšwa sekolong, ke be ke fetša diiri tše dintši ke lebelela seo batho ba bangwe ba se ngwadilego dilong tša ka gomme ke lebelela le seo ba se ngwadilego dilong tša bona.”—Cara, 16.

“Ke be ke kgona go tsena Wepesaeteng ye ke diriša mogalatheka, ka gona ke be ke tsena go yona ge ke eya sekolong, ge ke le sekolong le ge ke eya gae ke etšwa sekolong. Ke moka ge ke fihla gae, ke be ke eya  khomphutheng ya ka. Ke be ke tseba gore ke e lemaletše, eupša ke be ke sa nyake go kgaotša!”—Rianne, 17.

Ge e ba batswadi ba gago ba go dumelela go diriša Wepesaete ya go dira bagwera ka Inthanete, nagana ka nako yeo o bonago e le ya maleba gore o ka e fetša o le moo ka letšatši. Ke moka o itlhokomele. Ka kgwedi, ngwala nako yeo o e feditšego o le Wepesaeteng ya go dira bagwera ka Inthanete ke moka o bone ge e ba o e diriša go ya kamoo o ipeetšego nako ka gona. Gopola gore nako ya gago e swana le tšhelete. Ka gona o se ke wa dumelela mokgwa wa go dira bagwera ka Inthanete o go hlohlora seo re ka rego ke tšhelete ya gago. Ge e le gabotse, go na le dilo tše dingwe mo bophelong tšeo di lego bohlokwa kudu!—Baefeso 5:15, 16; Bafilipi 1:10.

Bafsa ba bangwe ba ile ba gata megato ya go kgonthišetša gore ba laola nako ya bona. Ka mohlala, ela hloko dipego tše di latelago:

“Ke ile ka tswalela akhaonto ya ka gomme ka ba le nako e ntši. Ke ile ka ikwa ke lokologile! Moragonyana mo ke ile ka bula akhaonto yeo gape, eupša ga bjale ke kgona go e laola. Ka dinako tše dingwe go feta matšatši ke se ka ya go yona. Ke fela ke e lebala ka makga a mantši. Ge e ba nka buša ka palelwa ke go laola mokgwa wo wa go dira bagwera ka Inthanete, ke tla fo tswalela akhaonto ya ka.”—Allison, 19.

“Ke ile ka kgaotša go diriša mekgwa ya go dira bagwera ka Inthanete, moo ke ilego ka tswalela akhaonto ya ka ka dikgwedi tše mmalwa ke moka ka e bula gape. Ke dula ke dira bjalo nako le nako ge ke lemoga gore ke fetša nako e ntši kudu ke le go yona. Ga bjale ga ke sa ikwa ke e rata kudu go swana le peleng. Ke e diriša ge ke na le lebaka la go dira bjalo ke moka ka tšwa go yona.”—Anne, 22.

Tabakgolo

Go na le selo se sengwe ka mokgwa wa go dira bagwera ka Inthanete seo o swanetšego go se ela hloko. Gore o kgone go se kwešiša, bea leswao le ✔ kgauswi le mokgwa woo o bonago o wela go wona.

Ge e le gabotse mokgwa wa go dira bagwera ka Inthanete ke . . .

(A) ․․․․․ kgwebo.

(B) ․․․․․ lekgotla la bagwera.

(C) ․․․․․ mokgwa wa go ithabiša.

Karabo e nepagetšego ke efe? Go sa šetšwe gore o dumela seo goba go se bjalo, yeo e nepagetšego ke Karabo A. Selo se segolo ka mokgwa wa go dira bagwera ka Inthanete ke kgwebo. Morero wa yona ke go dira tšhelete, kudukudu ka tša papatšo. Babapatši ba lebelela Wepesaete e le bohlokwa kudu ge batho bao ba e dirišago ba oketšega le gona batho bao ba ngwala ditaba tše itšego e bile ba di abelana le ba bangwe. Go ba gona, ge motho a fetša nako e ntši a le Diwepesaeteng tše, o tla lebelela dipapatšo tše dintši.

Go tseba seo go go thuša go lemoga gore mokgwa wa go dira bagwera ka Inthanete ga o lahlegelwe ke selo—le gona babapatši ba holega kudu—ge o abelana tsebišo ya gago le batho ba bantši goba ge e ba o fetša nako e ntši o le go yona. Ka gona, ge e ba o diriša mokgwa o itšego wa go dira bagwera ka Inthanete, leka ka mešegofela go šireletša ditaba tša gago tša khupamarama gomme o hlokomele le nako yeo o e fetšago o le go yona.

SEHLOGONG SE SE LATELAGO SA “BAFSA BA A BOTŠIŠA” . . .

Mokgwa wa go dira bagwera ka Inthanete o ka kgoma botumo bja gago le ditlwaelano tša gago le batho. Go anegelwa ke go tingwa.

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa Wepesaeteng ya www.watchtower.org/ype

[Mengwalo ya tlase]

[Ntlhakgolo go letlakala 17]

Go tšere nywaga e 38 gore kgašo ya radio e fihlelele batho ba dimilione tše 50

[Ntlhakgolo go letlakala 17]

Ka ngwaga o tee feela, Wepesaete ya go dira bagwera e lego Facebook e kgeregetšwe ke batho ba fetago dimilione tše 200

[Lepokisi go letlakala 19]

KE KA BAKA LA’NG O SA BOTŠIŠE BATSWADI BA GAGO?

Boledišana le batswadi ba gago mabapi le ditaba tša sephiri tšeo go ka boledišanwago le ba bangwe ka tšona Inthaneteng. Ke dilo dife tšeo go lego kaone gore e be khupamarama, gona ka baka la’ng? Ke tsebišo efe yeo go ka bago kotsi ge e ka pharwa Wepesaeteng le ge e le efe? Le gona, kgopela batswadi ba gago gore ba go eletše gore o ka lekalekanya bjang dipoledišano tša Inthaneteng le tšeo o di dirago ge o na le batho ba bangwe. Ke diphetogo dife tšeo ba bonago go nyakega gore di dirwe?

[Seswantšho go letlakala 18]

Dilo tšeo o di dirago mokgweng wa go dira bagwera ka Inthanete e ka fo se be sephiri go etša ge o nagana

[Seswantšho go letlakala 19]

Nako e swana le tšhelete. Ge e ba o ka e fetša lefelong le tee, o ka se be le e lekanego mohlang o e nyaka