Pakari no te Ngakau e te Kopapa Maroiroi
Pakari no te Ngakau e te Kopapa Maroiroi
“Tei te maki kore o te ngakau, ko to te kopapa ïa ora.”—MASELI 14:30.
“E meitaki to te ngakau rekareka mei te vairakau ra.”—MASELI 17:22.
● Na te Ariki ko Solomona i tuatua i tera au tuatua mama ua e te pakari, no runga i to Iseraela mei te toru tauatini mataiti i topa. * E tika ainei ra te reira? Eaa ra ta te vairakau o teia tuatau e akakite maira?
Me akaaiteia te ngakau mako kore ki te ngakau riririri, akakite te Journal of the American College of Cardiology e: “Te akaari maira te au kimikimianga ou e e pirianga kino to te riririri e te makitakita, ki te CHD [maki pukuatu].” No reira kua akakite te Journal e: “Ko te paruru e te rapakau te ka puapingaia, ka o mai . . . te au rapakauanga e te au vairakau pae kopapa, pera katoa rai te pae manako i te akaaere i te tu riririri e te makitakita.” Aiteanga, ka akatupu mai te ngakau maki kore i te oraanga kopapa maroiroi, mei ta te Pipiria e akakite ra.
Ka akatupu te ngakau rekareka i te au tu meitaki mei te reira. Akakite a Dr. Derek Cox, e opita i te pae rapakau i Tekotia, i roto i tetai ripoti a te BBC News e: “Me mataora koe, papu e a te tuatau ki mua kare koe makimaki mei te aronga mataora kore rai.” Akakite katoa taua ripoti ra e: “Te aronga mataora e paruruanga maata atu to ratou mei te maki pukuatu e te maki akangoru.”
Eaa ra te pakari o Solomona—eiaa to etai atu aronga tata Pipiria—i tau ei no to tatou nei tuatau? Mama ua te pauanga. “Kua oronga mai te Atua i te karape, e te kite, kia Solomona, e mea maata roa.” (1 Ariki 4:29) Tei puapinga atu, kua rekotiia taua pakari ra i roto i te reo maramarama ua kia puapingaia te katoatoa. E kare e tutaki!
Kore ei koe e akariro i te tatau putuputu i te Pipiria ei tuanga maata no toou oraanga? Mei te mirioni ua atu tei kite i te rekareka maata, ‘kia o mai te pakari ki roto i to ngakau na, e kia riro te kite ei mea mataora i to vaerua ra; Na te akono meitaki e tapapa ia koe i reira; e na te kite e tiaki ia koe.’ (Maseli 2:10, 11) Kare ainei tera i te mea pumaana?
[Tataanga Rikiriki i Raro]
^ para. 4 Te kupu “ngakau” i roto i te Pipiria, e taiku putuputu ana te reira i te tu tangata katoa o roto ake, kapiti mai tona manako ngakau.
