Peesi Ua

‘Ohake ha Fānau Fua Fatongia

Ngalingali ko e me‘a fakamuimui taha ia ‘oku fakakaukau ki ai ‘a e ongo mātu‘á ko ‘ena sio ki he‘ena ki‘i tama toki fanau‘i fo‘ou mahu‘ingá. Ka ko ha fo‘i mo‘oni faingofua ia: Faifai atu pē ko e ki‘i valevale ko iá ‘e tupu hake ‘o hoko ko ha talavou te ne mo‘ui ‘iate ia pē. Ko e tu‘unga eni na‘e ‘uhinga ki aí, he ‘oku pehē ‘i he Tohi Tapú “‘e tukuange ‘e he tangata ‘ene tamai mo ‘ene fa‘e.” (Sēnesi 2:24) Ko hono mo‘oní, ‘e lava ke lea‘aki ‘a e me‘a tatau ki ha finemui.

‘Ikai ko ia pē, ‘i ha ‘aho fakafiefia mo fakamamahi ‘i he taimi ‘oku mavahe ai mei ‘api ha foha pe ‘ofefine ‘oku ‘osi fu‘u lahi, ‘oku loto-mo‘ua e ngaahi mātu‘a tokolahi. ‘Na‘á ma ‘ohake lelei ‘ema ki‘i tamá?’ ko ‘ena fifilí ia. ‘Te ne malava ke nofo ma‘u ‘i ha ngāue, tokanga‘i lelei ha ‘apaatimeni, pea mo‘ui ‘i ha patiseti?’ Ko e me‘a ‘oku toe mahu‘inga angé, ‘‘E kei mo‘ui‘aki ‘e he‘eku ki‘i tamá ‘a e ngaahi ‘ulungaanga na‘á ma feinga ke fakahūhū kiate iá?’—Palōveepi 22:6; 2 Tīmote 3:15.

Ko e ‘īsiu makehe ko eni ‘o e ‘Ā Hake! ‘e fakahaa‘i ai e anga hono lava ke tokoni‘i ‘e he fale‘i ‘a e Tohi Tapú ‘a e ongo mātu‘á ‘i he tu‘unga taki taha ‘o e tupu hake ‘ena ki‘i tamá.