Peeji 2

Kukomezya Bana Munzila Iikonzya Kuyoobagwasya Baakukomena

Ciindi bazyali nobalanga mwanaabo muvwanda, kuli cintu comwe ncobatasyomi kuti inga cacitika. Babona mbuli kuti mwanaabo uyoozumanana kali muvwanda. Pele masimpe ngakuti, mukuya kwaciindi mwana ooyo ulakomena akuba muntu mupati walo uuyoolikkalila kumbele. Oobu mboceelede kuba, nkaambo Ibbaibbele lyaamba kuti ‘mwaalumi uyoosiya bausyi abanyina.’ (Matalikilo 2:24) Kaambo aaka kalabikkilizya amukaintu.

Nokuba boobo, mubuzuba oobo mwana nazwa aŋanda kutegwa akalikkalile, bazyali banji balalibilika. Balalibuzya kuti, ‘Sena ndakamukomezya kabotu mwana ooyu? Sena uyoocikonzya kulibelekela, kubamba ŋanda alimwi akubelesya kabotu mali?’ Alimwi mubuzyo uumbi uuyandika kapati ngwakuti, ‘Sena mwana ooyu uyoopona kweelana abukkale mbondakamuyiisya?’—Tusimpi 22:6; 2 Timoteyo 3:15.

Eeyi Sinsimuka! yaalubazu ilatondezya mbuli malailile aamu Bbaibbele mbwaakonzya kugwasya bazyali kukomezya bana muziimo ziindene-indene.