Nzyobaamba Bazyali

Kuti naa mujisi mwana wiiya cikolo cabana baniini, kweelede kuti mujisi buyumuyumu. Mucikozyanyo, mbuti mbomukonzya kuliyumya ciindi mwana naba aamacece? Ino mbuti mbomukonzya kumuyiisya mwanaanu kuzyiba cibi acibotu alimwi akumupa lulayo lweelela? Amubone bazyali bamwi mbobacikonzya kuzwidilila mumakani aaya.

MACECE

“Kuciindi eeci cikatazya, mwana uyanda buyo kupegwa kufwumbwa ncayanda. Oobu mbwaakali kucita mwaneesu. Ciindi notwatakali kumucitila nzyaakali kuyanda, wakali kwiile kusowaila buyo zyintu. Ooyu wakali mwaneesu wakusaanguna, aboobo twakanyina luzyibo kujatikizya bukkale buli boobu. Nokuba kuti bantu bakali kutwaambila kuti mbobabede bana aciimo eeci, kunyina nocakali kugwasya pe.”—Oobu mbobakaamba ba Susan, baku Kenya.

“Naakajisi myaka yobilo mwaneesu musimbi, wakali kwaalabana ansi, kulyuumputila mizinga kumwi kalila . . . Eelo cakali kunyemya kapati kaka! Kusola kubandika anguwe aciindi eeco tiicakali kukonzyeka. Aboobo mebo alimwi abalumi bangu twakali kumutola muŋanda, akumoongelezya kuti aleke kulila mpoonya alimvwa kabotu, tulabandika anguwe kujatikizya icali kumupa kulila. Mpoonya aleka kulila, umwi wesu wakali kuunka muŋanda akusola kumwaambila kuti ncaali kucita tiicali kabotu. Eeyi nzila yakabeleka kapati. Cimwi ciindi twakamumvwa kapaila kuli Jehova kulomba kulekelelwa. Mukuya kwaciindi, wakacileka kuba aamacece.”—Oobu mbobakaamba ba Yolanda, baku Spain.

“Bana balayanda kusola-sola zyintu kutegwa babone cikonzya kucitika. Kulekelela mwana kucita zyintu nzyomwakamukasya kulakonzya kumunyonganya. Twakazyiba kuti kutacinca-cinca lulayo ndotubapa bana, asyoonto-syoonto kulabagwasya kuzyiba kuti kulila takukonzyi kupa kuti bajane zyintu nzyobayanda.”—Oobu mbobakaamba ba Neil, baku Britain.

LULAYO

“Ciindi mwana natanakkwanya myaka yosanwe, cilakatazya kuzyiba kuti ulaswiilila naa pe. Iciyandika kapati nkwiinduluka zyintu nzyomumwaambila. Mweelede kwiinduluka-induluka kwaziindi zili mbozibede, kwiinda mukukankaizya nzyomwaamba.”—Oobu mbobakaamba ba Serge, baku France.

“Nokuba kuti bana besu bone bakakomena antoomwe, bakaliindene. Akati kabana boonse aaba ulajana kuti mwana umwi ulalila akaambo kakututyompya; aumwi ulayanda kusola-sola kucita zyintu kutegwa abone mbotukonzya kulimvwa tobazyali. Bana bamwi, ikubalanga buyo naa kubabwentela kwakali kugwasya, pele bamwi, ccita mane baumwa buya.”—Oobu mbobakaamba ba Nathan, baku Canada.

“Taciyandiki pe kuzumizya cintu ncomutayandi. Pele muzyali teelede kuba muntu uuyumya zyintu naa uutaswiilili. Zimwi ziindi, ciindi naalilekelela ncobeni mwana, tulimvwa kuti inga cagwasya kumulekelela.”—Oobu mbobakaamba ba Matthieu, baku France.

“Ndilasoleka kutabikka milawo minji, pele ndilabaambila kuti milawo misyoonto njindabikka taikonzyi kucincwa. Mwanaangu musankwa uujisi myaka yotatwe ulizyi cikonzya kumucitikila kuti walubizya, alimwi eeci cilamugwasya kuti kalilemeka. Masimpe ngakuti, ciindi nondikatede tandibikkili maano kukulubizya kwakwe. Pele akaambo kamilawo njindakabikka, ndilasolekesya kumulaya. Kutacinca milawo njomwakabikka kulayandika!”—Oobu mbobakaamba ba Natalie, baku Canada.

KUTACINCA-CINCA MILAWO

“Kulibonya kuti bana basyoonto balafwambaana kuzyiba ciindi bazyali babo nobacita cintu ciimpene ancobakabaambila.”—Oobu mbobakaamba ba Milton, baku Bolivia.

“Zimwi ziindi mwanaangu wakali kundibuzya mubuzyo omwe munzila ziindene-indene kuyanda kubona naa ndilapa bwiinguzi bukozyenye. Ikuti mebo ndamwaambila cintu cimwi, mpoonya abalo banyina bamwaambila cintu ciimpene ancondamwaambila, ulakonzya kubona mbuli kuti tatucizyi ncotwaamba, mpoonya inga waleka kutuswiilila.”—Oobu mbobakaamba ba Ángel, baku Spain.

“Zimwi ziindi tiindakali kubikkila maano kukulubizya kwamwanaangu ikuti kandikkomene, pele ikuti wabisya kanditakkomene, ndakali kumusubula. Ndakazyiba kuti eeci cilapa buyo kuti aindile kulubizya.”—Oobu mbobakaamba ba Gyeong-ok, baku Korea.

“Cilayandika kapati kubana kuzyiba kuti cintu cibi sunu, ncibi lyoonse.”—Oobu mbobakaamba ba Antonio, baku Brazil.

“Ikuti bazyali kabacinca-cinca, bana babo balakonzya kubona kuti tabasyomeki, akuti kufwumbwa zyintu nzyobacita, balazicita kweelana ambobabuka buzuba oobo. Pele kuti bazyali lyoonse kabacita zyintu kweelana ambobaamba, bana bayoozyiba kuti cibi, ncibi lyoonse. Eeyi nenzila iitondezya kuti bazyali balabakwabilila alimwi akubayanda bana babo.”—Oobu mbobakaamba ba Gilmar, baku Brazil.

“Bana balakonzya kulubizya acaali ikuti bazyali kababalendekezya—kwaambisya ciindi nokuli bantu. Ikuti kuzwa kumatalikilo bwiinguzi bwangu mbwakuti peepe, mwana weelede kubona kuti zyoonse nzyatiilombe tandikoozizumina pe.”—Oobu mbobakaamba ba Chang-seok, baku Korea.

“Bazyali boonse bobile beelede kuzuminana akwaamba cintu comwe. Mebo abakaintu tulabandika kusaanguna tolikke, kutegwa tuzuminane acintu comwe. Ibana balakonzya kuzyiba ikuti bazyali babo kabataambi cintu comwe, alimwi eeci cilakonzya kupa kuti batazimvwi nzyobaamba bazyali babo.”—Oobu mbobakaamba ba Jesús, baku Spain.

“Ikuti mwana kazyi kuti bazyali bakwe bacitila antoomwe zyintu alimwi tabakonzyi kucengwa, ulimvwa kukwabililwa. Ulizyi cikonzya kumucitikila ikuti kabamvwida bazyali bakwe alimwi acikonzya kumucitikila ikuti katabamvwidi.”—Oobu mbobakaamba ba Damaris, baku Germany.

“Mebo abakaintu bangu, tulacibona kuti kutacinca-cinca nzyotwaamba alimwi cibikkilizya akucita cintu cibotu ncotwakamusyomezya mwaneesu. Kucita boobu kupa kuti mwaneesu katusyoma kapati.”—Oobu mbobakaamba ba Hendrick, baku Germany.

“Ikuti bapati bamulimo kabacinca-cinca nzyondeelede kucita amulimo, inga ndanyongana. Oobu mbocibede akubana. Balimvwa kukwabililwa ikuti baizyiba milawo alimwi akuti taikacinci pe. Alimwi beelede kuzyiba cikonzya kucitika akaambo kakutamvwida bazyali akuti cinooli boobo lyoonse.”—Oobu mbobakaamba ba Glenn, baku Canada.

 Majwi aakwelelezya sikubala aali apeeji 8

“Iiyi wanu aabe Iiyi, a Peepe wanu aabe Peepe.”—Jakobo 5:12

 Kabbokesi/Zifwanikiso izili apeeji 9

MAKANI AAJATIKIZYA MUKWASYI

Kuba Amwana Kamutalibambilide—Mbotwakacikonzya Kucinca

Akaluulwa aba Tom alimwi aba Yoonhee Han

Ba Tom: Twakajisi buyo myezi iili cisambomwe kuzwa nitwakakwatana aba Yoonhee, ciindi nibakazyiba kuti balimitide. Aboobo, tiindakali kulitondezya kuti ndakalilibilikide, nkaambo ndakali kuyanda kubayumya-yumya bakaintu bangu akuti bazyibe kuti ndilababikkila maano. Pele mumoyo ndakalilibilikide kapati!

Ba Yoonhee: Ndakalityompedwe kapati—alimwi akuyoowa! Ndakali kulila kapati; tiindakalibambilide, alimwi ndakali kulitenga kuba muzyali.

Ba Tom: Andime ndakali kulitenga kuba muzyali! Pele nitwakamana kubandika abamazyali bamwi, twakazyiba kuti kuba amwana kamutalibambilide tiikwakatalikila alindiswe. Alimwi eeci, cakatugwasya kubona lukkomano bamazyali bamwi ndobakajana akaambo kakwiitwa kuti baama naa kuti bataata. Asyoonto-syoonto, bukandu alimwi akulitenga zyakamana, muciindi caboobo, twakaba aabulangizi.

Ba Yoonhee: Ciindi Amanda naakazyalwa, kwakaba buyumuyumu bumwi. Kwasondo zili mbozide, cakali kutwaalila koona akaambo kakuti Amanda wakali kulila kapati. Ndakali kwaalilwa kulya, calo cakapa kuti kandilimvwa kugonkelwa kapati. Kumatalikilo, tiindakali kuyanda kusangana abantu. Pele ndakayeeya kuti kulyaandaanya abantu tiicakali kukonzya kugwasya. Aboobo ndakali kujana ciindi cakuba abamatumbuma. Eeci cakandigwasya kubandika penzi lyangu kuli bamwi ibakajisi bukkale mbuli bwangu.

Ba Tom: Ndakasoleka kapati m,kubona kuti bubambe bwesu bwamumukwasyi tiibwanyonganyizyigwa. Mucikozyanyo, mbwanga tuli Bakamboni ba Jehova, mebo abakaintu bangu, twakazumanana kujanika kumiswaangano alimwi akuunka mumulimo wakukambauka. Alimwi ikuti kamuli aamwana kuli zyintu zinji ziyandika mali, alimwi zimwi zilayandika aciindi ncomwatali kuyeeyela. Twakabikkila maano kutegwa katuula buyo zyintu kweelana amali ngotwakajisi nkaambo tiitwakali kuyanda kunjila muzikwelete, calo cakali kukonzya kuyungizya kulibilika.

Ba Yoonhee: Kumatalikilo, ndakali kuyeeya kuti kwiinka mumulimo wamumuunda amwana muniini tiikwakeelede, mbwanga bana baniini, balanyonganya. Pele masimpe ngakuti, bantu balakkomana kubona bana baniini. Kuyeeya kuli boobo, kwakandigwasya kuti ndizumanane kuba musungu mumulimo wamumuunda alimwi akumulanga munzila yeelede mwanaangu.

Ba Tom: Ibbaibbele lyaamba kuti bana “ndukono luzwa kuli Jehova” alimwi “mbulumbu.” (Intembauzyo 127:3) Kuli ndime, majwi aaya atondezya kuti mwana, ncipego ciyandika kapati. Mbubwenya mbuli cipego cili coonse, muntu ulakonzya kulisalila: Ikucinyonyoona naa kucibamba kabotu. Ndaiya kuti ciimo aciimo camwana mbwayaabukomena ciliindene, aboobo ndeelede kubikkila maano kumuyiisya muciimo cili coonse. Nkaambo kuti naa ciindi eeci cainda, kunyina nondiya kumuyiisya alimwi.

Ba Yoonhee: Zimwi ziindi, buumi bulatugambya, alimwi akuti kuba amwana kamutalibambilide tacili cintu cibi cigambya. Amanda lino ujisi myaka iili cisambomwe, alimwi ndilikkomene kuba anguwe.

[Cifwanikiso]

Ba Tom aba Yoonhee alimwi amwanaabo, Amanda