Baebol i Talem Wanem

?Wanem Samting We Ol Papa Mama Oli Stap Traehad From?

?YU YU wantem se yangfala blong yu i kam wanem kaen man? Yu jusum wan long trifala ya.

A. Hem i kam olsem yu.

B. Hem i kam wan stronghed we i mekem samting we i defren olgeta long yu.

C. Hem i kam wan bigman we i gat ol gudfala fasin mo i mekem ol waes desisen.

Maet sam papa mama oli jusum C, be fasin we oli mekem long pikinini blong olgeta, i soemaot se oli jusum A. Oli traem fosem yangfala blong olgeta blong i folem fasin blong olgeta. Olsem nao, maet oli talem long hem wanem wok we hem i mas jusum. ?Be wanem frut i kamaot from? Taem papa mama i letem hem i fri smol blong mekem samting we hem i wantem, hem i no moa folem tingting blong tufala. Samting we i narakaen se, plante papa mama we oli jusum A, pikinini blong olgeta i mekem samting we B i talem.

Bos Fulwan Long Pikinini —?From Wanem Rod Ya i No Wok?

Yu yu wantem se yangfala blong yu i kam wan bigman we i gat gudfala fasin, mo i save mekem ol waes desisen. ?Be yu mas mekem wanem? Wan samting we yu mas save long hem se, pikinini bambae i no kam wan bigman olsem sipos yu bos fulwan long hem. ?From wanem? Tingbaot tufala risen ya.

1. Bos fulwan long pikinini i no laenap wetem tijing blong Baebol. Taem Jehova God i mekem ol man, hem i letem olgeta oli jusum rod we oli wantem folem. Hem i letem olgeta oli jusum samting we oli wantem, nating se i gud no i nogud. Tingbaot Ken bifo. Hem i kros long brata blong hem, Ebel, nao i wantem kilim hem i ded. Jehova i talem long hem se: “Sipos fasin blong yu i stret, bambae mi mi glad long yu, be fasin blong yu i no stret. Mo from samting ya, sin blong yu i olsem wan wael anamol we i stap klosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.”—Jenesis 4:7.

Taem Jehova i givim ol klia advaes long Ken, hem i no fosem hem blong i obei long advaes ya. Ken i mas jus sipos hem i wantem winim kros blong hem, no nogat. ?Yumi lanem wanem? Yumi lanem se, Jehova i no traem blong bos fulwan long ol man, ale yu tu, yu no mas traem blong bos fulwan long yangfala blong yu. a

2. Bos fulwan bambae i mekem pikinini i stronghed. Yu tingbaot se wan bisnesman i traem fosem yu blong pem olting blong hem. Moa we hem i traehad, moa we yu yu strong blong agensem hem. Nating sipos yu nidim olting blong hem, be yu yu harem nogud long fasin blong hem. Yu wantem ronwe nomo.

Hemia i sem mak taem yu traem blong fosem yangfala blong yu blong i folem ol fasin, bilif, mo ol samting we yu traehad from. ?Bambae hem i glad blong folem? !Maet nogat! Fasin blong yu i save mekem yangfala i kam stronghed, nao i no moa laekem ol rul we yu yu stap folem. Taem papa mama i traem blong bos fulwan long yangfala, plante taem rod ya i no wok. ?Long taem olsem, yu yu save mekem wanem?

Taem yangfala blong yu i smol yet, maet yu fosem hem blong folem ol fasin we yu yu tinghae long hem. Be naoia we hem i kam yangfala, i nogud yu traem bos fulwan long hem. I moa gud yu givhan long hem blong i luksave from wanem i waes blong mekem samting we i stret. Olsem nao, sipos yu yu wan Kristin, yu soemaot long hem se taem hem i folem ol loa blong God, bambae hem i harem gud long laef blong hem.—Aesea 48:17, 18.

Sipos yu wantem se yangfala blong yu i folem ol loa blong God, yu mas soemaot eksampol long saed ya. Yu mas gat ol gudfala fasin we yu wantem se hem tu i gat. (1 Korin 11:1) Yu mas mekem yangfala i save gud wanem ol fasin we yu yu jusum blong folem long laef blong yu. (Ol Proveb 4:11) Sipos yangfala blong  yu i stat blong lavem God mo ol loa blong hem, bambae hem i mekem ol waes desisen, nating se yu yu no stap klosap long hem.—Ol Sam 119:97, Filipae 2:12.

Yu Tijim Hem Blong i Save Mekem Gud Wok

Pej 2 blong magasin ya i tokbaot se, yangfala i “mas aot long papa mo mama blong hem.” Maet yu luk se dei ya i kam hareap tumas. (Jenesis 2:24) Yu we yu wan papa no wan mama, yu wantem meksua se yangfala blong yu i naf gud blong mekem ol wok we hem i mas mekem blong lukaot gud long hem wan, taem hem i kam bigwan. Yu traem tingbaot sam wok we yu save givhan long hem blong lanem, naoia we hem i stap yet wetem yu.

Ol Wok Long Haos. ?Olsem wanem? ?Yangfala blong yu i save kuk? ?Wasem mo aeanem klos blong hem? ?Klinim rum blong hem mo putum ol samting long stret ples blong olgeta? ?Lukaot gud long wan trak mo riperem ol smosmol samting? Sipos wan boe no wan gel i lanem blong mekem ol wok ya, bambae hem i naf blong lukaot long haos mo famle blong hem taem hem i kam bigwan. Aposol Pol i talem se: “Yufala i save finis we mi mi stap hadwok long han blong mi nomo, blong kasem olgeta samting we mi wetem ol fren blong mi, mifala i sot long hem.”—Ol Wok 20:34.

Joen Gud Wetem Ol Narafala. (Jemes 3:17) ?Olsem wanem? ?Yangfala blong yu i joen gud wetem ol narafala? ?Hem i save stretem rao long kaen mo kwaet fasin? ?Yu yu trenem yangfala blong yu blong i soemaot respek long ol man, mo blong i mekem pis taem i gat wan rao? (Efesas 4:29, 31, 32) Baebol i talem se: “Yufala i mas ona long olgeta man.”—1 Pita 2:17.

Yusum Gud Mane. (Luk 14:28) ?Yu yu save givhan long yangfala blong yu blong i lanem wan wok, i mekem plan se bambae i yusum mane blong hem olsem wanem, mo i no mekem kaon? ?Yu yu trenem hem blong i putum gud mane blong hem blong pem ol samting we i nidim, mo blong i no westem mane blong hem olbaot? ?Yu yu trenem hem blong i harem gud long smol samting we i gat finis? (Ol Proveb 22:7) Pol i raetem se: “Sipos yumi gat kakae blong yumi mo klos blong yumi, hemia i naf, yumi save harem gud.”—1 Timoti 6:8.

Ol yangfala we oli lanem blong folem ol gudfala fasin mo we oli lanem blong mekem sam wok, oli rere gud from taem ya we oli kam bigman. !Papa mama blong olgeta oli kasem samting we oli stap traehad from!—Ol Proveb 23:24.

[Futnot]

?YU YU BIN TINGBAOT?

● ?Yu we yu wan papa no wan mama, wanem samting we yu yu stap traehad from?—Hibrus 5:14.

● ?Bambae yangfala blong yu i mekem wanem wok taem hem i kam bigman?—Josua 24:15.

[Tok blong pija long pej 25]

?Yu yu wantem se yangfala blong yu i kam wanem kaen man?

Hem i kam olsem yu . . .

Hem i wan stronghed . . .

Hem i gat gudfala fasin mo i mekem ol waes desisen