Sam Nius Blong Wol

Long Brasil, plante studen we oli gat 10 yia kasem 13 yia (17 pesen), oli raf long ol narafala long skul, no ol narafala oli raf long olgeta.—O ESTADO DE SÃO PAULO, BRASIL.

Ol pikinini we oli no gat 12 yia yet, oli gat ol sik olsem hae blad presa, ol gris long string blong blad mo hat, ston long kidni, mo olkaen sik blong leva. ?From wanem oli kasem ol sik ya? Oli sidaon oltaem be oli no mekem eksasaes, oli kakae ol samting we i gat plante gris mo suga long hem, mo oli fatfat tumas.—ABC, SPEN.

Gavman blong Yunaeted Stet i mekem wan ripot long saed blong ol pikinini we oli bon long yia 2008 long ol famle we oli no rij tumas. Mane we oli spenem long ol pikinini ya go kasem we oli gat 18 yia, hem i “samwe long 20 milian vatu (from we praes blong ol samting i go antap, naoia mane ya i jenis i kam samwe long 27 milian vatu).”—DIPATMEN BLONG AGRIKALJA LONG YUNAETED STET.

Oli No Moa Save Olsem Wanem Blong Pleplei

Folem wan stadi we i kamaot i no longtaem, plante papa mama long Briten (20 pesen), oli no moa save “olsem wanem blong pleplei wetem pikinini.” Mo plante moa bakegen (33 pesen) oli talem se oli les blong pleplei wetem pikinini, sipos no oli bisi tumas mo oli no save wanem blong mekem. Wan dokta we i stadi long tingting blong man, nem blong hem Tanya Byron, i tokbaot trabol ya se: “I gat fo stamba samting we i save mekem se papa mama i harem gud blong pleplei wetem pikinini. Pleplei i mas mekem se pikinini i lanem sam niufala save, i lanem blong mekem sam samting wetem han blong hem, i lanem blong soemaot ol gudfala fasin long ol narafala mo blong storian wetem olgeta.” Plante papa mama (33 pesen), oli pleplei long ol kompiuta gem wetem pikinini blong olgeta. Be bighaf blong ol yangfala oli wantem moa blong pleplei long ol kompiuta gem ya, olgeta nomo. Bighaf blong ol pikinini we oli gat 5 yia kasem 15 yia, oli laekem blong pleplei afsaed wetem papa mama blong olgeta, long ol pleplei olsem futbol. Mo tu, oli laekem blong sidaon kwaet wetem papa mama blong plei kad no narafala samting olsem.

Ridim Stori Long Pikinini Bifo We i Slip

Wan kampani blong Intenet i wantem givhan long ol papa we oli bisi tumas, blong oli ridim stori long pikinini blong olgeta bifo we oli slip. Wan niuspepa blong Sydney (Daily Telegraph) i talem se: “Kompiuta i rikodem voes blong ol papa we oli stap ridim wan stori, mo i ademap miusik mo sam narafala noes long hem, nao i sanem samting ya i go long pikinini long imel.” Be ol man we oli stadi long fasin fren blong ol man, oli gat tu tingting long saed blong rod ya. Dokta Richard Fletcher, long Yunivesiti blong Newcastle, Ostrelia, i stadi long ol famle. Hem i talem se: “Wan samting we i givhan bigwan long papa blong i fren gud wetem pikinini, hemia taem hem i rid long pikinini.” Taem papa i rid long pikinini, tufala i storian gud, papa i putum han blong hem i goraon long pikinini, mo tufala i laf. Dokta Fletcher i talem se ol imel oli no save tekem ples blong ol gudfala samting we i kamaot, taem papa i sidaon wetem pikinini blong hem mo i rid long hem.