Bafsa ba a Botšiša

Ke ka Baka La’ng ke Swanetše go ya Dibokeng tša Bokriste?

NA O THABELA GO YA DIBOKENG TŠA BOKRISTE?

↓ ↓

EE AOWA

↓ ↓

SWARA BJALO O KA DIRA’NG KA TABA YEO?

BEIBELE e laela Bakriste gore ba bokane gotee bakeng sa borapedi. (Baheberu 10:25) Eupša go thwe’ng ge e ba o tšwafišwa ke go ba gona dibokeng? Go thwe’ng ge e ba o ikhwetša o nagana ka seo nkabego o se dira ge nkabe o le felotsoko—kae goba kae? Dira diphetogo ka go leka e nngwe goba tše dingwe tša ditšhišinyo tše di lego matlakaleng a latelago.

1. EBA GONA KA MEHLA

Lengwalo la motheo: “Ba bangwe ba tlogetše mokgwa wa go bokana bakeng sa borapedi, eupša ga se ra swanela go dira bjalo.”—Baheberu 10:25, Contemporary English Version.

Gore’ng o ka nyaka go dula o eya selong seo se o sa se thabelego? Ge re bea taba ye ka boripana, ke ka gobane ka go dira bjalo, o tla ithuta go se thabela! E nagane ka tsela ye: O ka ba sekgwari sa papadi bjang—gona o ka e thabela bjang—ge e le gore o itlwaetša ka sewelo? Go bjalo le ka diboka tša Bokriste. Ge o dula o eya go tšona, ke moo o tla ikwago gore o a agega moyeng. Ke moka seo se tla dira gore o se nyake go hlawa!—Mateo 5:3.

Maele: Ka morago ga seboka se sengwe le se sengwe, botša bonyenyane seboledi setee gore o thabetše eng polelong ya sona. Ngwala pukwaneng gore go ba gona dibokeng go go hotše ka eng. Le gona ka ge dikarolo tše dintši tša diboka di bolela ka bodiredi bja Bokriste, ipeele pakane ya go kaonefatša tsela yeo o bolelago le ba bangwe ka tumelo ya gago. Se se tla dira gore tsebišo yeo e ahlaahlwago dibokeng e go kgome kutšwanyana.

“Ke tlwaeditšwe go tloga bjaneng gore go ya dibokeng ga se taba ya boikgethelo. Le ge ke be ke sa le ngwana, ke be ke sa nke ke no foša diboka. Ke gotše le kgopolo yeo go fihla le lehono.”—Kelsey.

Therešo e sa fetogego: Bao ba bago gona dibokeng ka mehla ba di thabela kutšwanyana—e bile di ba hola kudu!

 2. HLWAYA TSEBE

Lengwalo la motheo: “Elang hloko kamoo le theetšago ka gona.”—Luka 8:18.

Banyakišiši ba re ge letšatši le sobela, motho o ba a lebetše 60 lekgolong ya dilo tšeo a di kwelego. Ge nkabe tšhelete ya gago e be e timela ka pela ka tsela yeo, na o be o tla fo phutha matsogo?

Maele: Dula le batswadi ba gago ditulong tša ka pele moo go ka se bego bonolo gore o šitišege. Ngwala dintlha. Le ge batho ba sa ithute dilo ka go swana, go ngwala dintlha go ka go thuša go tsepamiša kgopolo go seboledi—e bile dintlha tšeo di tla go thuša ge o šetše o di hlahloba ka morago.

“Nkile ka thatafalelwa ke go tsepamiša kgopolo dibokeng, eupša go šetše go le kaone ga bjale. Ke leka go gopola lebaka leo le dirilego gore ke tle mo. Ga e fo ba tlwaelo, go swana le go ya kerekeng. Ke ya dibokeng gore ke yo rapela le go ithuta—go yo tšea selo seo nka se dirišago bophelong.”—Kathleen.

Therešo e sa fetogego: Go ya dibokeng gomme wa se hlwaye tsebe go swana le go ya monyanyeng eupša wa se je selo.

 3. KGATHA TEMA

Lengwalo la motheo: “Motho o ithuta go yo mongwe, go fo swana le ge tšhipi e loutša tšhipi e nngwe.”—Diema 27:17, Good News Translation.

Ka ge o le mofsa, o kgatha tema e bohlokwa dibokeng tša phuthego. O se ke wa nagana gore ga go bohlokwa gore o gona le gore o tšea karolo, e ka ba e le ka go araba nakong ya karolo ya dipotšišo le dikarabo goba ka go gwerana le badumedigotee le wena.

Maele: Ipeele pakane ya go araba bonyenyane gatee nakong ya karolo ya dipotšišo le dikarabo. Ithaopele go thuša ka go hlwekiša goba ka mošomo o mongwe wo o swanetšego go dirwa pele, nakong goba ka morago ga diboka. Thoma poledišano le motho yo gantši o sa hwetšego sebaka sa go boledišana le yena.

“Ge ke be ke le nywageng ya magareng ya mahlalagadi, ke ile ka ithaopela go swara dimaekrofouno le go beakanya sethala dibokeng. Go rwala maikarabelo a bjalo go ntirile gore ke ikwe ke le bohlokwa gomme go ile gwa ntutueletša go ba gona le go fihla ka nako. Seo se ile sa nthuša go kgahlegela dilo tša moya kutšwanyana.”—Miles.

Therešo e sa fetogego: O se ke wa fo dula—eba le seo o se dirago! Ka mehla go kgatha tema go putsa go feta go fo ba mmogedi.

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa Wepesaeteng ya www.watchtower.org/ype

[Lepokisi/Diswantšho go letlakala 11]

O A LALETŠWA!

Na o ka rata

● Go ithuta therešo ka Modimo?

● Go ba motho yo mokaone?

● Go hwetša bagwera ba babotse?

Diboka tša Dihlatse tša Jehofa di ka go thuša go dira dilo tšeo—le go feta moo! Dihlatse tša Jehofa di kopana gabedi ka beke bakeng sa borapedi Diholong tša tšona tša Mmušo. Ga go ntšhiwe dikoleke gomme baeng ba dula ba amogelwa ka diatla tše pedi.

O se ke wa hlawa! Diholo tša Mmušo ga di swane le dikereke tšeo o kilego wa ya go tšona. Dibokeng tša Dihlatse tša Jehofa, go bolelwa kudu ka thuto ya Beibele gomme o tla ithuta kamoo Lentšu la Modimo le ka go thušago gore o be le bophelo bjo bokaone kudu!—Doiteronomio 31:12; Jesaya 48:17.

Sai—La mathomo ge ke be ke tsena ka Holong ya Mmušo, ke ile ka makatšwa ke gore go be go se na diswantšho, go be go se na motho yo a bego a apere diaparo tša boruti e bile ga go na motho yo a ilego a mpotša gore ke ntšhe tšhelete. Bohle ba ile ba nkamogela gomme ka ikwa ke le gae ga mahlaku. Go be go le bonolo go kwešiša seo se bego se ahlaahlwa dibokeng tšeo e bile se be se kwagala. Ye ke therešo yeo e bego e le kgale ke e nyaka!

Deyanira—Ke be ke na le nywaga e 14 ge ke be ke thoma go ya dibokeng tša Dihlatse tša Jehofa. Bohle ba ile ba nkamogela ke sa tsena. Go bonagala eka ba be ba tloga ba thabetše gore ke tlile moo gomme ba bontšha gore ruri ba a nkgahlegela. Ka baka la seo ke ilego ka se bona letšatšing la mathomo, ga sa nka ka swabišwa ke go boela!

[Lepokisi go letlakala 12]

Hwetša seo go tla bago go bolelwa ka sona dibokeng tše di latelago tša phuthego. Kgetha karolo e tee lenaneong yeo e go kgahlago ke moka . . .

SEGA O KGOMARETŠE

Tlatša dikarolo tše di Tlatša dikarolo tše di

latelago pele ka morago ga ge

o eya dibokeng. karolo yeo e phethilwe.

Seboka: Seo ke ithutilego sona:

․․․․․ ․․․․․

⇩ ⇩

Seo ke nyakago go Seo nka botšago seboledi

se tseba sebokeng se: gore ke se thabetše

ka karolo ya sona:

․․․․․ ․․․․․