Ua Fesili Mai Talavou

Aiseā e auai ai i sauniga faa-Kerisiano?

PE E TE FIAFIA I SAUNIGA FAA-KERISIANO?

IOE → IA FAAAUAU ONA FAI LE MEA O LOO E FAIA

LEAI → O LE Ā LA E MAFAI ONA E FAIA?

UA FAATONUINA Kerisiano i le Tusi Paia ia faapotopoto faatasi mo le tapuaʻiga. (Eperu 10:25) Ae faapefea pe afai e te lē fiafia e iai i inā? E faapefea pe afai o loo alu solo lou mafaufau i mea e mafai ona e faia pe ana faapea o loo e iai i se isi mea—i so o se nofoaga lava? Ia fai ni fetuutuunaʻiga, e ala i le faataʻitaʻi o se fautuaga pe sili atu o ni fautuaga o loo i itulau o mulimuli mai.

1. IA AUAI E LĒ AUNOA

Mau autū: “O nisi tagata ua fai ma masani le tuulafoaʻiina o sauniga mo tapuaʻiga, ae e lē tatau ona tatou faia lenā mea.”—Eperu 10:25, Contemporary English Version.

Aiseā e tatau ai ona e faia e lē aunoa se mea e foliga mai e te lē fiafia i ai? I se isi faaupuga faigofie, o le auala lenā o le a e fiafia ai e fai lenā mea! Seʻi manatu i le faataʻitaʻiga lenei: O le ā le tele e te lelei ai i se taaloga—ma o le ā le tele e te fiafia i ai—pe afai e seāseā e alu i toleniga? O le tulaga lava foʻi lenā e tasi e faatatau i sauniga faa-Kerisiano. O le tele e te auai ai, o le tele foʻi lenā o lou naunau e atiaʻe se faiā ma Ieova ma tapuaʻi atu iā te ia. O lenā auala o le a uunaʻia ai oe e auai e lē aunoa!—Mataio 5:3.

Fautuaga: Pe a māeʻa sauniga taʻitasi, ia faailoa atu i se tasi o failauga lou talisapaia o se manatu tāua mai i lana lauga. Ia tusi i se api se aogā se tasi na e maua ona o le auai i le sauniga. Ma talu ai o le tele o mea e talanoaina i sauniga e faatatau atu i le faiva faa-Kerisiano, ia fai ma ou sini le faaleleia o lou talanoa atu i isi e uiga i lou faatuatua. O le a atili ai ona aogā iā te oe mea o loo talanoaina i sauniga.

“Sa aʻoaʻoina aʻu mai lava a o oʻu laʻitiiti e faapea o sauniga e lē o se mea e faia i ai saʻu filifiliga. Ma e leʻi iai lava se taimi na ou manatu ai e misia se sauniga. O loo faaauau pea ona iā te aʻu lenā uiga seʻia oo mai lava i le taimi nei.”—Kelsey.

O le manatu autū: O i latou o loo auai e lē aunoa e sili atu ona olioli i sauniga ma maua le tele o aogā!

 2. IA UAʻI ATU

Mau autū: “Ia uaʻi atu i la outou faalogo.”—Luka 8:18.

Ua taʻua e tagata suʻesuʻe e faapea i le faaiʻuga o le aso, e masani lava ona galo i se tagata faalogologo i se lauga, le pe tusa o le 60 pasene o mea na ia faalogo i ai. Pe afai e vave ona leiloa faapena a tatou tupe, pe e tatou te lē faia ea se mea ina ia taumafai ai ia aua neʻi leiloa?

Fautuaga: Ia nonofo faatasi ma ou mātua i le pito i luma, lea e faaitiitia ai lou tosina atu i isi mea. Ia fai ni faamaumauga. Talu ai e eseese auala e aʻoaʻoina ai e tagata mea, o le faia o faamaumauga o le a e uaʻi totoʻa atu ai i le failauga—ma o le a sili atu ona aogā mo autaluga mulimuli ane.

“E masani lava ona faigatā ona ou uaʻi atu i taimi o sauniga, ae o lenei ua faaleleia lenā tulaga. Ou te taumafai e manatua le pogai o loʻu iai i inā. E lē na o se faiga masani e pei o le alu i le lotu. Ou te auai i sauniga ina ia tapuaʻi ma aʻoaʻo mai ai se mea—ia maua se mea tāua e mafai ona ou faatatauina i loʻu olaga.”—Kathleen.

O le manatu autū: O le auai i sauniga ae lē uaʻi totoʻa atu, e tai pei lava o le alu i se faigaʻai ae lē ʻai.

 3. IA FAI SE SAO

Mau autū: “E aʻoaʻoina e le isi tagata mea mai i le isi tagata, e pei lava ona faamaʻai e le uʻamea le uʻamea.”—Faataoto 27:17, Good News Translation.

I le avea ai o se talavou, e te faatinoina ai se matafaioi tāua i sauniga faa-Kerisiano. Ia aua lava neʻi manatu faatauvaa i le tāua o lou auai ma le faia o se sao i sauniga, e tusa po o le faia o se tali i mataupu o fesili ma tali, po o le auaufaatasi foʻi ma isi aumea talitonu.

Fautuaga: Ia fai ma ou sini le faia o se sao i taimi e taulima ai mataupu o fesili ma tali. Ia tauofo e fesoasoani atu i le galuega faamamā, po o isi galuega e manaʻomia ona faia a o leʻi amata pe māeʻa foʻi sauniga. Ia taumafai e fai se talanoaga ma se tasi e lē masani ona e maua se avanoa e talanoa i ai.

“A o oʻu talavou, na ou faaavanoa atu aʻu ina ia feaveaʻia maikorofoni, ma faatulaga lelei le pulelaa i taimi o sauniga. O le mauaina o na tiute tauave na ou lagona ai e manaʻomia aʻu, ma ua faamalosia ai aʻu ina ia iai i inā ma ia aua neʻi tuai. Na fesoasoani lenā e faalolotoina ai loʻu talisapaia o mea faaleagaga.”—Miles.

O le manatu autū: Aua neʻi tau ina saofaʻi i le sauniga—ia fai se sao! O le avea o sē e auai ma fai se sao e sili atu ona tauia nai lo o le tau ina matamata.

E maua nisi mataupu faa-Peretania o le faasologa, “Ua Fesili Mai Talavou” i le Initaneti i le www.watchtower.org/ype

[Pusa/Ata i le itulau 11]

UA VALAAULIA OE!

Pe e te fia

● Aʻoaʻoina le upu moni e faatatau i le Atua?

● Avea ma se tagata e sili ona lelei?

● Maua ni uō e sili ona lelei?

E mafai ona fesoasoani sauniga a Molimau a Ieova iā te oe ina ia faia na mea—ma isi mea! I vaiaso taʻitasi, e faalua ona faapotopoto Molimau a Ieova i o latou Maota mo Sauniga mo le tapuaʻiga. E leai ni peleti e aoina, ma e talia ma le māfana ē e asiasi mai.

Aua neʻi e misia! O Maota mo Sauniga e lē pei o isi falesā na e auai ai. I sauniga a Molimau a Ieova, e faamatilatila ai aʻoaʻoga faale-Tusi Paia, ma o le a e aʻoaʻoina ai auala e mafai ona fesoasoani ai le Afioga a le Atua iā te oe, ina ia maua se olaga e sili ona lelei!—Teuteronome 31:12; Isaia 48:17.

Sai—Ina ua ou ulu atu mo le uluaʻi taimi i le Maota mo Sauniga, na faateʻia aʻu ona e leai ni faatusa, e leai se tasi e laʻei e pei o se faifeʻau, ma e leai se isi na fai mai iā te aʻu mo se tupe. Sa faafeiloaʻi aʻu e tagata uma, ma na ou lagona le saogalemu. Sa faigofie ona malamalama ma talafeagai mea na talanoaina i le sauniga. O le upu moni lenei sa ou saʻilia!

Deyanira—O le 14 o oʻu tausaga na ou muaʻi alu ai i se sauniga a Molimau a Ieova. Sa vave ona faafeiloaʻi aʻu e tagata uma. E foliga mai sa tāua tele iā i latou loʻu iai i inā, ma na latou fiafia moni iā te aʻu. Ona o lenā mea lelei na ou tofo muamua i ai, ou te leʻi matamuli ai e toe auai i sauniga!

[Pusa/Ata i le itulau 12]

Vaai po o ā mataupu o le a talanoaina i le sauniga e sosoo ai a le faapotopotoga. Filifili se vaega se tasi o le polokalame e te fiafia i ai ma . . .

ʻOTI, FAI NI KOPI MA TEU

Faatumu faamatalaga o loo mulimuli mai a o leʻi auai i le sauniga.

Matua o le vaega:

․․․․․ ․․․․․

⇩

Manatu ou te manaʻo e iloa e faatatau i lenei mataupu:

․․․․․

Faatumu faamatalaga o loo mulimuli mai pe a uma ona faia le mataupu.

Manatu na ou aʻoaʻoina:

․․․․․

⇩

Manatu e mafai ona ou taʻu atu i le failauga sa ou fiafiai ai i lana mataupu:

․․․․․