Stret Fasin Taem Gavman Blong God i Rul

PROFET tok blong Baebol i soemaot se God bambae i mekem wol ya i kam niuwan. Niufala wol ya bambae i gat wan gavman nomo, hemia Kingdom blong God we Jisas Kraes i King blong hem. (Revelesen 11:15) ?Kingdom ya bambae i mekem wanem blong tekemaot ol fasin we oli no stret? Bambae hem i mekem tufala samting ya:

1. Bambae hem i finisim ol gavman blong man we oli mekem i no stret. Daniel 2:44 i talem se: “Long taem blong ol king ya [ol gavman blong man], God ya we i stap long heven bambae i stanemap wan king . . . Bambae hem i save flatemgud paoa blong ol narafala king [blong wol], nao bambae hem i rul oltaem gogo i no save finis.”

2. Bambae hem i spolem ol man nogud mo i sevem ol stret man. Ol Sam 37:10 i talem se: “Bambae i no longtaem, ol man nogud oli lus.” Vas 28 i talem se: “Hae God i laekem ol fasin we i stret, mo i no save lego ol stret man ya we tingting blong olgeta i stap strong long hem. Hem bambae i stap lukaot gud long olgeta gogo i no save finis.”

“Ol stret man ya we tingting blong olgeta i stap strong” long God, bambae oli luk we ol tok blong Lodsprea i kamtru. Jisas i talem se: ‘Mifala i wantem we kingdom blong yu i kam, mo we olgeta man long wol oli wokem olgeta samting we yu yu wantem, olsem olgeta long heven oli stap wokem.’ (Matiu 6:10) ?God i wantem we olgeta man long wol oli mekem wanem?

Taem Kingdom Blong God i Rulum Wol . . .

Bambae i no moa gat man we i mekem kruked fasin mo i strong tumas long narafala. Hibrus 1:9 i tokbaot Jisas Kraes, i talem se: “Yu yu laekem ol fasin we i stret, be ol fasin we i nogud yu agens long olgeta.” Bambae Jisas i rul long fasin we i stret gud. Bambae hem i ‘sevem ol puaman, mo bambae i stap givhan long olgeta we oli sot long ol samting, mo i no gat man blong lukaot long olgeta. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.’—Ol Sam 72:12-14.

Olgeta man bambae oli gat plante kakae. ‘God i blesem yumi, i mekem we graon blong yumi i givim plante kakae.’ (Ol Sam 67:6) “Bambae i gat plante kakae long ples ya, we bambae ol hil oli fulap gud long hem.” (Ol Sam 72:16) Taem Jisas i stap long wol, hem i mekem merikel blong givim kakae long plante taosen man wantaem. Hemia i soemaot wanem bambae hem i mekem taem hem i rul long Kingdom blong God.—Matiu 14:15-21; 15:32-38.

Bambae man i no moa blokem stret fasin. ‘I no gat wan samting nating long wol ya we i save haed long fes blong hem. Olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.’ (Hibrus 4:13) Baebol i tokbaot Jisas se: ‘Sipos hem i jajem man, bambae hem i no save luk long ol samting ya nomo we ol man oli save luk, bambae hem i no save tingbaot ol samting ya nomo we ol man oli stap talem. Bambae hem i stretem bisnes blong ol man, mo bambae i mekem long fasin we i stret olgeta. Bambae hem i mekem rod blong ol puaman oli save kasem ol samting we oli gat raet blong kasem.’—Aesea 11:3, 4.

 !Klosap Nao Kingdom Bambae i Rul!

Taem ol trabol i stap kam antap moa long wol, samting ya i soemaot se en i klosap. Ol Sam 92:7 i talem se: “Hae God, ol man nogud oli save gru kwik olsem rabis gras, olgeta evriwan we oli stap mekem ol fasin nogud oli save win long plante samting, be bambae yu yu spolemgud olgeta.” ?Yu yu mas mekem wanem blong God i glad long yu, nao i sevem yu? Jisas i talem se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

?Olsem wanem? ?Yu yu wantem kasem ol nambawan save ya blong God mo Jisas? Sipos yes, yu mas storian wetem ol Witnes blong Jehova, olsem Heide, mo Dorothy, mo Firuddin oli bin mekem. Ol Witnes bambae oli glad blong ansarem ol kwestin blong yu, we yu no pem mo oli no fosem yu blong mekem wan samting.

[Bokis/Foto blong pija long pej 9]

LAEF OLSEM I NO STRET NATING

Wan gel long Amerika, nem blong hem Emily, i kasem sik ya lukimia taem hem i gat seven yia. Ol fren blong hem oli kasem ol smosmol sik nomo, be plante yia nao Emily i kasem bigfala tritmen mo ol strong meresin. Hem i talem se: “!Sik ya i mekem mi mi fraet!”

?I stret we Emily i kasem strong sik ya? Nogat. Nating se i olsem, tingting blong hem i no foldaon. Hem i stap tingbaot taem ya we Kingdom blong God bambae i rul, nao ‘bambae i no moa gat man we i save talem se hem i sik.’ (Aesea 33:24) Emily i talem se: “Vas we mi laekem moa, hemia Mak 12:30 we i talem se: ‘Yufala i mas lavem Hae God ya we i God blong yufala long olgeta hat blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala.’ Taem mi mi prea long Jehova, hem i mekem mi mi strong. Mi talem tangkiu long Jehova from famle blong mi, mo from kongregesen, mo from promes blong laef we i no save finis long Paradaes long wol. Promes ya i givhan long mi bigwan.”

[Tok blong pija long pej 9]

Taem Kingdom blong God i rul, bambae i gat plante kakae, mo stret fasin, mo man i no agensem narafala