Tinuod nga Hustisya Ubos sa Kagamhanan sa Diyos

ANG Bibliya nagtagna nga ang kalibotan karon hapit nang pulihan ug bag-ong kalibotan sa Diyos. Niana nga bag-ong kalibotan usa lang ang kagamhanan​—ang Gingharian sa Diyos diin si Jesu-Kristo mao ang Hari. (Pinadayag 11:15) Sa unsang paagi wagtangon sa Gingharian sa Diyos ang inhustisya? Himoon kini sa duha ka paagi.

1. Wad-on sa Gingharian sa Diyos ang walay hustisya ug walay katakos nga pagmando sa tawo. Ang Daniel 2:44 nag-ingon: “Sa mga adlaw nianang mga haria [mga gobyerno] ang Diyos sa langit magatukod ug usa ka gingharian . . . Kini magadugmok ug magatapos niining tanang gingharian [sa tawo], ug kini mobarog hangtod sa panahong walay tino.”

2. Laglagon sa Gingharian sa Diyos ang daotan ug luwason ang mahigugmaon sa hustisya. Ang Salmo 37:10 nag-ingon: “Sa dili na madugay, ug ang daotan mawala na.” Ang bersikulo 28 nag-ingon: “Si Jehova mahigugmaon sa hustisya, ug dili niya pagabiyaan ang mga maunongon kaniya. Sila pagabantayan hangtod sa panahong walay tino.”

Matagamtam sa “mga maunongon” ang katumanan sa giingon ni Jesus diha sa iyang sulondang pag-ampo. Siya nag-ingon: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Unsay kabubut-on sa Diyos alang sa yuta?

Kon ang Gingharian sa Diyos Magmando sa Yuta . . .

Ang korapsiyon ug pagdaogdaog mawala na. Bahin kang Jesu-Kristo, ang Hebreohanon 1:9 nag-ingon: “Gihigugma mo ang pagkamatarong, ug gidumtan mo ang pagkamalapason.” Ingong matarong nga Magmamando, si Jesus ‘magaluwas sa kabos nga nagatuaw alang sa tabang, ingon man sa sinakit ug si bisan kinsa nga walay magtatabang. . . . Gikan sa pagpanglupig ug sa kapintasan tubson niya ang ilang kalag, ug ang ilang dugo bililhon sa iyang mga mata.’​—Salmo 72:​12-14.

Ang pagkaon dagaya na. “Ang yuta magapatungha gayod sa iyang bunga; ang Diyos, ang atong Diyos, magapanalangin kanato.” (Salmo 67:6) “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.” (Salmo 72:16) Milagrosong gipakaon ni Jesus ang libolibong tawo sa usa ka higayon​—pamatuod sa iyang mahimo ubos sa Gingharian sa Diyos.​—Mateo 14:​15-21; 15:​32-38.

Ang hustisya dili na mababagan sa limitasyon sa tawo. “Walay linalang nga dili dayag sa iyang panan-aw, apan ang tanang butang hubo ug binuksan sa mga mata niya nga kaniya manubag kita.” (Hebreohanon 4:13) Bahin kang Kristo, kini ang atong mabasa: “Siya dili mohukom sumala sa makita lamang sa iyang mga mata, ni mobadlong sumala sa butang nga nadungog lamang sa iyang mga dalunggan. Ug uban sa pagkamatarong siya magahukom sa mga timawa, ug uban sa katul-id siya magabadlong sa mga maaghop sa yuta.”​—Isaias 11:​3, 4.

 Duol Na ang Gingharian sa Diyos!

Ang nagkagrabeng kahimtang karon nagpakita nga duol nang matapos kining kalibotana. Ang Salmo 92:7 nag-ingon: “Sa dihang ang mga daotan manurok ingon sa katanoman ug molambo ang tanang mamumuhat sa butang nga makadaot, kini mao nga sila pagalaglagon hangtod sa kahangtoran.” Unsay imong himoon aron dili masuko ang Diyos kanimo ug aron ka maluwas? Si Jesu-Kristo miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Gusto ka bang masayod nianang bililhon nga kahibalo? Kon gusto ka, sama kang Heide, Dorothy, ug Firuddin, pangutan-a ang mga Saksi ni Jehova bahin niini. Sila malipay sa pagtubag sa imong mga pangutana nga walay bayad o obligasyon.

[Kahon/Hulagway sa panid 9]

KON ANG KINABUHI DAW DILI MAKATARONGANON

Si Emily, nga taga-United States, nadayagnos nga dunay leukemia sa siyete anyos pa. Ang iyang mga higala takboyan ug panalagsang ubo ug sip-on, apan si Emily intawon nag-antos sa daghang tuig sa pagpatambal, lakip niini ang chemotherapy. Siya miingon: “Kuyaw kaayo ang leukemia!”

Bisag naglisod siya tungod sa iyang sakit, wala gyod siya mawad-ig paglaom. Hinunoa, naghulat siya sa panahon dihang ubos sa Gingharian sa Diyos, “walay pumoluyo nga moingon: ‘Ako masakiton.’” (Isaias 33:24) “Ang akong paboritong teksto,” matod pa ni Emily, “mao ang Marcos 12:30: ‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.’ Kon moampo ko kang Jehova, iya kong lig-onon. Nagpasalamat ko kang Jehova sa paghatag kanakog pamilya, kongregasyon, ug paglaom nga mabuhi sa walay kataposan diha sa Paraiso sa bag-ong kalibotan. Kini nga paglaom nakatabang kaayo nako.”

[Mga hulagway sa panid 8, 9]

Ubos sa Gingharian sa Diyos, ang tanang katawhan makabatog dagayang pagkaon, tinuod nga hustisya, ug kinabuhing walay pagpihig