IL-​PROFEZIJA tal-​Bibbja turi li d-​dinja preżenti dalwaqt se titneħħa u minflokha se jkun hawn dinja ġdida li se jistabbilixxi Alla. Iktar minn hekk, id-​dinja l-​ġdida se jkollha gvern wieħed biss—is-​Saltna t’Alla b’Ġesù Kristu bħala Sultan. (Rivelazzjoni 11:15) Is-​Saltna t’Alla kif se telimina l-​inġustizzja? Se tagħmel dan b’żewġ modi.

1. Is-​Saltna t’Alla se telimina l-​ħakma tal-​bniedem li hi inġusta u li mhix kapaċi tmexxi. Danjel 2:44 jgħid: “Fi żmien dawn is-​slaten [gvernijiet], l-​Alla tas-​sema jwaqqaf saltna . . . Hi se tfarrak u ttemm dawn is-​saltniet kollha [tal-​bnedmin], u hi tibqaʼ wieqfa għal dejjem.”

2. Is-​Saltna t’Alla se teqred lin-​nies mill-​agħar u se ssalva lin-​nies ġusti. Salm 37:10 jgħid: “Ftit ieħor biss, u l-​ħażin ma jkunx iktar.” Vers 28 jgħid: “Ġeħova jħobb il-​ġustizzja, u lil-​leali tiegħu ma jitlaqhomx. Għal dejjem se jkunu mħarsin.”

Dawn il-​“leali” se jesperjenzaw it-​twettiq taʼ stqarrija li għamel Ġesù fit-​talba mudell tiegħu. Hemmhekk qal: “Ħa tiġi saltnatek. Ħa jkun li trid int, kif fis-​sema, ukoll fuq l-​art.” (Mattew 6:10) X’inhi r-​rieda t’Alla għall-​art?

Meta s-​Saltna t’Alla Taħkem l-​Art . . .

Il-​korruzzjoni u l-​moħqrija se jispiċċaw. Dwar Ġesù Kristu, Ebrej 1:9 jgħid: “Int ħabbejt il-​ġustizzja, u bgħadt il-​ksur tal-​liġi.” Bħala Ħakkiem verament ġust, Ġesù “se jeħles lill-​fqir li jgħajjatlu għall-​għajnuna, u lill-​magħkus u lil kulmin m’għandux min jgħinu. . . . Mill-​moħqrija u mill-​vjolenza se jifdilhom ruħhom, u demmhom ikun prezzjuż f’għajnejh.”—Salm 72:12-​14.

Kulħadd se jkollu bl-​abbundanza. “L-​art infisha se tagħti l-​prodott tagħha; Alla, Alla tagħna, se jberikna.” (Salm 67:6) “Se jkun hemm ħafna qmuħ fuq l-​art; fuq il-​qċaċet tal-​muntanji jkun hemm iżżejjed.” (Salm 72:16) Ġesù b’miraklu temaʼ lil eluf taʼ nies f’daqqa—ħarsa bil-​quddiem taʼ dak li se jwettaq permezz tas-​Saltna t’Alla.—Mattew 14:15-​21; 15:32-​38.

Il-​ġustizzja mhix se tiġi mfixkla mil-​limitazzjonijiet tal-​bnedmin. ‘M’hemm l-​ebda ħolqien li hu moħbi quddiem Alla, imma kollox hu għeri u mikxuf beraħ quddiem dak li rridu nagħtuh kont.’ (Ebrej 4:13) Dwar Ġesù naqraw: “Mhux se jiġġudika biss fuq dak li jara b’għajnejh, lanqas ma jwiddeb sempliċement skond dak li jismaʼ b’widnejh. U bis-​sewwa jiġġudika lill-​batuti, u b’mod rett jagħti twiddib għan-​nom tal-​ġwejdin taʼ l-​art.”—Isaija 11:3, 4.

 Il-​Ħakma tas-​Saltna Qorbot!

Il-​kundizzjoni tad-​dinja li dejjem sejra għall-​agħar turi li qorob it-​tmiem tagħha. Salm 92:7 jgħid: “Meta n-​nies mill-​agħar jinbtu bħall-​ħaxix u dawk kollha li jipprattikaw il-​ħsara jiffjorixxu, dan ikun biex jinqerdu għal dejjem.” Kif tistaʼ tevita li jkun ħaqqek id-​diżapprovazzjoni t’Alla u tkun fost dawk li hu se jsalva? Ġesù Kristu qal: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.”—Ġwanni 17:3.

Tixtieq tikseb dan l-​għarfien prezzjuż? Jekk iva, bħal Heide, Dorothy, u Firuddin, li ssemmew qabel, għala ma tiddiskutix dan max-​Xhieda taʼ Ġeħova? Huma se jieħdu pjaċir iwieġbu l-​mistoqsijiet tiegħek mingħajr ħlas u bl-​ebda obbligu.

[Kaxxa/Stampa f’paġna 9]

META L-​ĦAJJA NFISHA TIDHER LI HI INĠUSTA

Meta Emily, li tgħix fl-​Istati Uniti, kellha sebaʼ snin, it-​tobba sabu li kellha l-​lewkimja. Waqt li ħbiebha kellhom jittrattaw maʼ riħ jew influwenza li qabdithom darba kultant, Emily ilha tissaporti snin sħaħ taʼ kura medika intensa, inkluż il-​kimoterapija. Hi tgħid, “Il-​lewkimja hi tal-​biżaʼ!”

Għalkemm il-​ħajja tagħha żgur li mhijiex kollha ward u żahar, Emily ma qatgħetx qalbha mill-​ħajja. Minflok, hi tħares ’il quddiem lejn iż-​żmien meta, taħt is-​Saltna t’Alla, “ħadd minn min jgħammar hemmhekk ma jgħid: ‘Jien marid.’” (Isaija 33:24) Emily tgħid: “L-​iskrittura favorita tiegħi hi Marku 12:30 li tgħid: ‘Ħobb lil Ġeħova Alla tiegħek b’qalbek kollha u b’ruħek kollha u b’moħħok kollu u b’saħħtek kollha.’ Meta nitlob lil Ġeħova, hu jsaħħaħni. Jien nirringrazzja lil Ġeħova talli tani lill-​familja tiegħi, il-​kongregazzjoni tiegħi, u t-​tama taʼ ħajja taʼ dejjem f’Ġenna tal-​art fid-​dinja l-​ġdida. Din it-​tama tgħidx kemm għenitni!”

[Stampi f’paġni 8, 9]

Taħt is-​Saltna t’Alla, l-​umanità kollha se tgawdi abbundanza taʼ ikel, kif ukoll ġustizzja vera u ħajja bla preġudizzju