Tu Tau Tikai Raro i to te Atua Kavamani

AKAARI maira te Pipiria e kua vaitata teia ao i te monoia e tetai mea ou ta te Atua ka akanoo. Tetai katoa, e tai rai kavamani o taua ao ou ra​—ko te Patireia o te Atua, ko Iesu Karaiti te Ariki. (Apokalupo 11:15) Ka akapeea te Patireia o te Atua me takore i te tu tau kore? E rua ana nga mataara ka rave i te reira.

1. Ka takore te Patireia o te Atua i te tutaraanga tau kore e te marikoanga kore a te tangata. Te karanga ra a Daniela 2:44 e: “I te au rā o taua au ariki ra [au kavamani], e akatupu ei te Atua no te rangi i tetai basileia, . . . e riro na te reira e akapueurikiriki e e akapou i taua au basileia katoa ra [a te tangata], e ka vai rai te reira e tuatau ua atu.”

2. Ka takore te Patireia o te Atua i te aronga kino e ka akaora i te aronga tuatua tau. Te karanga ra a Salamo 37:10 e: “E roa poto ake, e kare ua te tangata kino ra.” Te na ko ra te irava 28 e: ‘E mea inangaro oki na Iehova te tuatua-tau, kare oki aia e akaruke i tona aronga tiratiratu ra. E vai rai ratou e tuatau ua atu.’

Ka kite taua ‘aronga tiratiratu ra’ i te akatupuanga o tetai tuatua a Iesu i roto i tana pure akaraanga. Akakite aia e: “Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:10) Eaa to te Atua anoano no te enua?

Me Tutara te Patireia o te Atua i te Enua Nei . . .

Ka ope te angaanga pikipikikaa e te takinga kino. No runga ia Iesu Karaiti te karanga ra a Ebera 1:9 e: “I inangaro koe i te tuatua-tika, e te rikarika ra koe i te kino.” Ei Tutara tau tikai, ka ‘akaora a Iesu i tei putaua me kapiki mai; e tei akaaka, e kare ona e tauturu. . . . Ka akaora aia i to ratou vaerua i te takinga-kino e te rotoriri, e to ratou toto, ka riro ïa ei mea apinga nana.’​—Salamo 72:12-14.

E maata te kai na te katoatoa. “Ei reira e ua maata mai ei te enua, e na te Atua, na to tatou uaorai Atua, e akameitaki mai ia tatou nei!” (Salamo 67:6) “E manga sitona okotai rima i ki i te enua nei, i runga i te take o te au maunga ra.” (Salamo 72:16) Kua angai temeio a Iesu i te tauatini ua atu i tetai taime​—te akatutu maira i tana ka rave na roto i te Patireia o te Atua.​—Mataio 14:15-21; 15:32-38.

Kare te tu tau e takinoia e te tu ara ua o te tangata. ‘Kare rava e mea ngaro i te Atua: te vai ua nei ra te au mea katoa ma te maeu rava ki mua i tona mata, tei iaia te tuatua ia tatou nei.’ (Ebera 4:13) No runga ia Karaiti, ka tatau tatou e: “Kare aia e akava ua i ta ona mata i akara ra, kare katoa e akatika ua i ta ona taringa i akarongo ra: I te tuatua-tika ra ka akava mai ei aia i te aronga ao ra, e akatika oki aia ma te tuatua-tau, no te aronga maru o te enua nei.”​—Isaia 11:3, 4.

 Vaitata te Tutaraanga Patireia!

Te akaari maira te turanga kino o teianei ao e te vaitata maira tona openga. “Me tupu te aronga kino mei te ngangaere, e me ruperupe katoa te aronga i rave i te kino ra; i ruperupe ïa, kia tipu akaruke takiri roaia ra,” i karanga ai a Salamo 92:7. Akapeea e rauka ai ia koe te kopae i to te Atua mareka kore, e kia piri ki te aronga tana ka akaora? Akakite a Iesu Karaiti e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

Te inangaro ra ainei koe i taua kite puapinga maata ra? Me koia ia, mei ia Heide rai raua ko Dorothy e Firuddin, tei taikuia i mua ake, kore ei koe e uriuri i te reira ki te Au Kite o Iehova? Ka rekareka roa ratou i te pau i taau au uianga e kare e mea e umuumuia atu mei ia koe.

[Pia/​Tutu i te kapi 9]

ME KARE TE ORAANGA E TAU ANA

Ko Emily, e noo ana aia i Marike, e itu rai ona mataiti kua kitea mai e e maki rukimia tona. Noatu e tu ana tona au oa i te vuru, kareka a Emily, roa te au mataiti i tona akakoromaki anga i te au rapakauanga ngata, tei kapiti mai te kemoterepi. “E mea vinivini tikai te maki rukimia!” i nana ai.

Noatu te ngata maata i tona oraanga, kare a Emily i tuku i te au. Mari ra, te tapapa ra aia i te tuatau i raro i te Patireia o te Atua e ‘kore ei to reira e karanga e, kua maki au.’ (Isaia 33:24) “Taku irava inangaro roa atu,” i na Emily ei, “ko Mareko 12:30: ‘E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.’ Me pure au kia Iehova, e akamaroiroi ana aia iaku. Akameitaki au ia Iehova no toku pamiri, toku putuputuanga, e te manakonakoanga no te oraanga mutu kore i roto i te Parataito i te ao ou. Riro tikai teia manakonakoanga ei tauturu iaku.”

[Au Tutu i te kapi 8, 9]

Raro i te Patireia o te Atua, e maata te kai na te tangata, pera katoa te tu tau e te oraanga kare e akavaavaa