Faiga Amiotonu i le Pulega a le Malo o le Atua

UA FAAALIA i valoaga o le Tusi Paia ua toeitiiti ona suia lea o lenei faiga o mea, i se malo fou o le a faavaeina e le Atua. E lē gata i lea, o lenā lalolagi fou o le a tasi le pulega—o le Malo o le Atua, lea e avea ai Iesu Keriso ma Tupu. (Faaaliga 11:15) E faapefea ona aveesea e le Malo o le Atua faiga lē tonu? E lua auala o le a faataunuuina ai.

1. O le a tafiesea e le Malo o le Atua pulega lē tonu ma le lē taulau a tagata. Ua taʻua i le Tanielu 2:44: ʻO aso o ia malo, o le a faatūina ai e le Atua o le lagi o le malo. O le a ia tuʻimomomoina ma faaumatia malo uma a tagata, ae e tumau lea malo e faavavau.’

2. O le a faaumatia e le Malo o le Atua ē amioleaga ae faasaoina ē amiotonu. Ua faapea mai le Salamo 37:10: “Ua toeitiiti lava ona lē toe iai lea o le tagata amioleaga.” Fai mai le fuaiupu e 28: “Auā e fiafia Ieova i le faamasinogatonu, e na te lē tuua foʻi o ē e faamaoni iā te ia. E leoleoina i latou i aso uma lava.”

O le a iloa e tagata “faamaoni” le faataunuuga o le fetalaiga a Iesu i lana tatalo faataʻitaʻi. Sa ia faapea mai: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) O le ā le finagalo o le Atua mo le lalolagi?

Pe a Pule le Malo o le Atua i le Lalolagi . . .

O le a faaiʻuina faiga faapiʻopiʻo ma le sauā. Ua taʻua i le Eperu 1:9 e faatatau iā Iesu: “Ua e fiafia i le amiotonu a ua e ʻinoʻino i le solitulafono.” I le avea ai ma Tupu amiotonu, o le a ʻlaveaʻi e Iesu le tagata mativa o loo tagi mai mo se fesoasoani, atoa foʻi ma lē ua mafatia ma lē ua leai sona fesoasoani. E laveaʻiina e ia i latou mai i le pule sauā ma faiga sauā, e tautele foʻi lo latou toto i lana silafaga.’—Salamo 72:12-14.

O le a fau ma soloi meataumafa. “E fua mai lava e le laueleele ona fua; e faamanuia foʻi i matou e le Atua, o lo matou Atua.” (Salamo 67:6) “O le a tele saito i le laueleele; o le a fau ma soloi i tumutumu o mauga.” (Salamo 72:16) Na fafagaina faavavega e Iesu le faitau afe o tagata i se taimi—ua faaāta mai ai mea o le a faataunuuina e le malo o le Atua.—Mataio 14:15-21; 15:32-38.

O le a lē aafia le faamasinoga tonu ona o vaivaiga o tagata. ʻE leai foʻi se foafoaga e lilo i le silafaga a le Atua, ae e taatitia fua mai mea uma, ma ua matuā faaalia mea uma i luma o lana silafaga, o lē e ao ona tatou tali atu i ai.’ (Eperu 4:13) E tatou te faitau e uiga i le Keriso: “O le a lē faamasino e ia e tusa ma mea e vaai i ai ona mata, e lē aʻoaʻi atu foʻi e tusa ma mea e faalogo i ai ona taliga. E faamasino e ia ma le amiotonu ē ua faatauvaa, e aʻoaʻi atu foʻi e ia ma le amio saʻo ina ia maua aogā e tagata agamalu o i le lalolagi.”—Isaia 11:3, 4.

 Ua Lata Ona Pule le Malo!

O le faateteleina o tulaga leaga ua oo iai le lalolagi, ua faamaonia ai le lata tele mai o lona iʻuga. Ua faapea mai le Salamo 92:7: “Pe a tupu olaola o ē e amioleaga e pei o le vao ma fuga mai i latou uma o ē e faia mea e tigā ai, ina ia faaumatia i latou e faavavau.” E faapefea ona e ʻalofia mea e inosia e Ieova ma faatasi ma ē e na te faasaoina? Na fetalai Iesu: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.

Pe e te naunau mo lenā malamalamaga tāua? Afai o lea, i le pei o Heide, Dorothy, ma Firuddin ia na muaʻi taʻua, aiseā e lē talanoaina ai le mataupu ma Molimau a Ieova? O le a latou fiafia e tali au fesili e aunoa ma se totogi pe tauanau oe e fai se mea.

[Pusa/Ata i le itulau 9]

LE AUALA E ONOSAIA AI SE OLAGA E FOLIGA MAI E LĒ TONU

O Emily, o lē e nofo i le Iunaite Setete, na maua i le maʻi o le leukemia ina ua fitu ona tausaga. A o feagai ana uō ma le fulū e masani ai, na onosaia e Emily i le tele o tausaga togafitiga faigatā faafomaʻi, e aofia ai le togafitiga e taʻu o le chemotherapy. Ua ia faapea mai, “Ou te fefe i lenei maʻi o le leukemia!”

E ui ina tauivi Emily ma lenei faigatā ogaoga i lona olaga, ae e leʻi mou atu ai lona faamoemoe. Nai lo o lea, o loo ia faatalitali i le taimi o le pulega o le Malo o le Atua, “e lē fai mai foʻi se tasi ua nofo ai: ʻOu te maʻi.’” (Isaia 33:24) Ua faapea mai Emily: “O le mau e sili ona ou fiafia i ai o le Mareko 12:30: ʻIa e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.’ Pe a ou tatalo iā Ieova, e na te faamalosia aʻu. Ou te faafetai iā Ieova ona o loʻu aiga ma laʻu faapotopotoga, ma le faamoemoe o le ola e faavavau i le Parataiso i le lalolagi fou. O lenei faamoemoe ua fesoasoani tele iā te aʻu.”

[Ata i le itulau 9]

I le pulega o le Malo o le Atua, o le a olioli tagata uma i le anoanoaʻi o taumafa, faapea le faamasinoga tonu ma se olaga e aunoa ma le faailoga tagata