Ino Ncinzi Ciyoocinca?

“Cisi tacikooyoobweza ipanga lyakulwisya cisinyina”

“Takukooyooba naba omwe akati kabantu banyika uuamba kuti, Ndaciswa.”

“Lufwu talukooyoobako limbi.”

TWAAMBO tuli atala aawa tulakkomanisya kapati. Pele masimpe ngakuti twaambo toonse ootu tuyoozuzikizyigwa. Nkaambo nzi? Nkaambo kakuti ootu tatuli twaambo twakucengeezya ntobaamba basitwaambo twacisi ibatajisi nguzu zyakucinca zyintu zicitika munyika. Muciindi caboobo, zisyomezyo izyaambwa atala aawa zizwa mu Bbaibbele *

Bantu banji bayeeya kuti Bbaibbele ndibbuku lyakaindi linyina mpindu mazubaano. Sena andinywe mbomuyeeya oobu? Ikuti naa mbomuyeeya oobo, mweelede kulanga-langa makani aalembedwe mu Bbaibbele. Masimpe ngakuti, Bbaibbele ndebbuku lisalala lilikke lipandulula matalikilo aabantu kuzwa kaindi. Alimwi lilapandulula makani aaya aatobela:

● Musyobo wabantu mbuwakanjila mucibi.—Baloma 5:12.

● Leza mbwaakabikka bubambe bwakufwutula bantu.—Johane 3:16.

● Mfwulumende mbozyaalilwa kucinca zyintu munyika.—Jeremiya 10:23.

● Kaambo ncotweelede kusyoma zisyomezyo zya Leza kuti zilakonzya kucita oobo.—Joshua 23:14.

Sena ncobeni Leza uyoogwisya nzala, nkondo, kuciswa, alimwi alufwu? Zyintu eezyi tazikatazyi kusyoma kuti kamutusyoma twaambo ootu tutobela:

1. Leza ngowakatulenga.

2. Ulatulanganya.

3. Ulijisi nguzu zyakucinca nyika.

4. Ulikanzide kucinca nyika.

Sena kuli twaambo tukonzya kutupa kutuzumina twaambo ootu tone? Basikumwaya bamagazini eeyi, Bakamboni ba Jehova, balamutamba kuti mujane bwiinguzi nobeni kwiinda muciiyo ca Bbaibbele.

Ndiza mulijisi Bbaibbele, pele tamulibali-bali pe, naa tamulibalili limwi buya. Nokuba kuti bantu banji balabala Bbaibbele, baamba kuti cilabakatazya kulimvwisya. Ikuti naa mbocibede oobo akulindinywe, mulakonzya kulomba ciiyo ca Bbaibbele citabbadelelwi kuli Bakamboni ba Jehova bakubusena nkomukkala. Bantu banji munyika yoonse bagwasyigwa abubambe oobu. Ino ciiyo ca Bbaibbele cicitwa buti?

Nsondo ansondo, Bakamboni ba Jehova kakunyina kubbadelwa balakonzya kunoomuswaya kuŋanda yanu naa abusena mpomuyanda kuti kamwiiya Bbaibbele ambabo. Ibubambe bwakwiiya Bbaibbele buli boobu bulakonzya kumugwasya kujana bwiinguzi kumibuzyo mbuli yakuti: Nkaambo nzi ncotupenga? Nkaambo nzi mfwulumende zyabantu ncozyaalilwa kucinca bukkale bwamunyika? Ino Bwami bwa Leza ninzi, alimwi mbuti mbobuyoozuzikizya zyintu ncozyaalilwa mfwulumende zyabantu?

Ikuti kamuyanda makani manji aajatikizya mbomukonzya kugwasyigwa kuciiyo ca Bbaibbele, mulakonzya kubalomba Bakamboni ba Jehova naa kulomba kwiinda mukubelesya Web site ya www.pr418.com. Mulakonzya kulembela kukkeyala iili mumagazini eeyi apeeji 5.

[Bupanduluzi buyungizidwe]