Gikan sa Among mga Magbabasa

Mga Batan-on Nangutana . . . Unsaon Nako Paghimong Makalingaw ang Pagbasa sa Bibliya? (Abril 2009) Ako 24 anyos nga asawa ug inahan, ug naglisod ko sa pagpadayon sa akong pagbasag Bibliya. Akong gisunod ang mga sugyot niini nga artikulo, ug akong gigamit ang panid nga guntingon. Maghinamhinam na ko sa pagbasag Bibliya. Akong nakita nga nagkaharmonya ang mga asoy diha sa mga basahon niini. Karon mag-enjoy na ko sa pagbasag Bibliya. Daghang salamat!

K. T., United States

Basahon nga Imong Masaligan—Bahin 6 (Abril 2011) Ang artikulong “Ang Roma sa Kasaysayan sa Bibliya” miingon: “Unsay nahitabo sa Jerusalem? Ubos sa pagpanguna ni Vespasian ug sa iyang anak nga si Tito, ang Romanong kasundalohan namalik—nga nianang panahona 60,000 na ang gidaghanon.” Sa ato pa, si Vespasian ug Tito maoy nanguna sa kasundalohan sa dihang nag-atake sa Jerusalem. Apan sumala sa mga libro sa kasaysayan, si Vespasian didto sa Roma niadtong panahona.

J. O., Australia

Ang “Pagmata!” nagtubag: Sumala sa librong “Josephus—The Essential Writings,” ni Paul L. Maier, “si Tito kalit nga miabot gikan sa Alexandria uban sa Ika-Kinse nga dibisyon sa kasundalohan, ug miduyog kang Vespasian nga iyang amahan didto sa Ptolemais, kinsa naghulat uban sa Ika-Lima ug Ika-Napulo nga dibisyon.” Dugang pa, ang “Encyclopedia of the Roman Empire,” ni Matthew Bunson, nag-ingon bahin kang Vespasian: “Uban sa iyang anak nga si Tito, iyang gisumpo ang Hudiyohanong Rebelyon ug nangandam sa pagsulong sa templo sa Jerusalem niadtong tuig 68 sa dihang iyang nabalitaan nga si Nero napildi ug gipulihan ni Galba. . . . Sa tinghunlak sa tuig 70, siya miabot sa Roma.” Busa morag magkauban si Vespasian ug Tito sa sinugdanan sa pag-atake sa Jerusalem. Apan mibalik si Vespasian sa Roma ug si Tito maoy iyang gibinlan sa pagpanguna.

Makataronganon ba ang Imong mga Tumong? (Pebrero 2011) Sa dihang naghatag ug mga pananglitan sa dili-makataronganong mga tumong, gilakip niini nga artikulo ang “kabantog, bahandi, hingpit nga kapikas, o hingpit nga panglawas.” Nganong gilakip ang “hingpit nga kapikas”? Nganong ang pagpangitag kapikas ‘dili man makataronganon’ nga tumong?

S. K., United States

Ang “Pagmata!” nagtubag: Ang artikulo wala mag-ingon nga dili makataronganon nga tumong ang pagminyo. Hinunoa, ang gihisgotan niini mao ang pagpangitag “hingpit nga kapikas.” Sa konteksto niini, ang “hingpit” nga kapikas nagtumong sa kapikas nga walay ikasaway, o negatibong kinaiya. Kawang lang ang pagpangitag kapikas nga sama niini tungod sa duha ka rason: Una, walay tawo nga sama niini. (Roma 3:23) Ikaduha, ang pagpangita ug sama niini nga kapikas nakasentro sa kon unsay makuha nimo sa kaminyoon imbes kon unsay imong ikahatag niini. Busa dunay mga minyo nga dili makataronganon ug tumong kay buot nila nga mausab ang ilang kapikas aron mosibo sa ilang gipangandoy nga “hingpit” nga kapikas. Sa kasukwahi, ang lig-ong kaminyoon gilangkoban ug duha ka tawo kinsa modawat sa ilang mga dili kahingpitan apan andam gihapon ‘moantos sa usag usa ug kinabubut-on nga magpasaylo sa usag usa.’—Colosas 3:13.