Baebol i Talem Wanem

?Hu i Save Stretem Ol Trabol Long Wol?

“Ol man oli wantem we ol lida blong kantri blong olgeta oli givim ol gudfala ansa long ol kwestin blong olgeta. Oli wantem we oli faenem rod blong winim ol trabol. Oli no wantem we ol lida oli traehad smol nomo, mo oli mekem eskius.”—BAN KI-MOON WE HEM I SEKRETARI-JENEROL BLONG YUNAETED NESON.

BAEBOL i talem se long taem blong yumi, “laef long wol ya bambae i kam strong tumas.” (2 Timoti 3:1) Oltaem yumi harem nius blong ol bigfala faet, wok blong ol teroris, ol kantri oli no moa gat mane, mo ol samting we i stap spolem wol.

?Olsem wanem? ?Ol samting oli save kamgud? ?Ol gavman blong man oli save stretem ol trabol long wol? ?Yumi save trastem hu blong i givhan long yumi?

?Wanem Tingting Blong Plante Man Long Ol Kantri?

Plante man oli talem se God i stap givhan long kantri blong olgeta. Long ol seremoni we ol man Amerika oli mekem, oli talem bakegen mo bakegen wan promes blong sapotem kantri blong olgeta. Long promes ya, oli talem se ‘God i stap lidim kantri blong olgeta.’ Mo oli raetem long mane blong Amerika tu se, “Yumi Trastem God.”

Nating se i olsem, plante man Amerika oli no bilif long God. Samting ya i sem mak long plante narafala kantri tu we oli talem se God i stap givhan long olgeta. Ol man we oli bilif long God, olgeta tu oli gat defdefren tingting long kwestin ya se: ?God i stap givhan long ol kantri no nogat?

● Sam man oli talem se God i no mekem wan samting nating blong givhan long ol kantri. Hem i letem man nomo i rulum man bakegen.

● Sam narafala oli talem se God i stap yusum ol gavman blong man, mo se hem i save blesem wok we oli mekem blong traem stretem ol trabol long wol.

?Olsem wanem long yu? ?Yu tu yu gat tingting olsem?

Tingbaot: Sipos faswan long tufala tingting ya i tru, hemia i min se yumi stap long bigfala trabol we i no gat wan long yumi i save winim. Sipos seken tingting ya i tru, yumi mas tingbaot kwestin ya se: ‘?God i laekem wan kantri moa i bitim narafala kantri?’ Traem tingbaot tu kantri we tufala i faet agensem tufala. Bifo we tufala i faet, tufala wanwan i prea blong God i mekem se kantri blong olgeta i win. Long tingting blong yu, ?God i stap long wanem saed? ?Yu ting se hem i stap long wan saed, no nogat?

?Wanem Tijing Blong Baebol?

1. God i no mekem man blong i rulum man bakegen. Baebol i talem se: “I no gat man i save kam bos long laef blong hem.” (Jeremaea 10:23) Ol samting we i hapen long ol yia we oli pas, i soemaot se tok ya i tru. Ol gavman blong man oli no mekem wol blong yumi i kam gud moa, nating sipos ol lida oli gat ol gudfala tingting we oli wantem mekem i kamtru. Samting we i hapen i defren olgeta. “Sam man oli gat paoa, mo ol narafala man oli stap aninit long olgeta, oli stap harem nogud.”—Prija 8:9.

2. God i stap tingbaot yumi. God i stap luk ol samting we oli hapen long yumi, mo hem i sore long yumi. Bambae hem i mekem wan samting blong givhan long yumi. ?Bambae hem i mekem samting ya olsem wanem? Bambae hem i yusum Kingdom blong hem, we ‘bambae i rul oltaem gogo i no save finis.’—Daniel 2:44.

3. Kingdom blong God hem i gavman blong God. Plante milian man oli talem Lodsprea bakegen mo bakegen. Taem oli mekem olsem, oli prea  from Kingdom blong God. Oli askem long God wetem fulhat blong olgeta se: ‘Plis yu mekem Kingdom blong yu i kam. Plis yu mekem se samting we yu yu wantem i kamaot long wol, olsem we i kamaot long heven finis.’ (Matiu 6:10) Yu luk. I no long heven nomo we Kingdom blong God bambae i mekem wok blong hem. Kingdom ya bambae i mekem se samting we God i wantem i kamaot long wol tu.

4. God nomo i save stretem ol trabol, mo bambae hem i yusum Kingdom blong hem blong mekem olsem. Sipos yu no bilivim samting ya, yu traem tingbaot ol tijing ya blong Baebol.

● God i mekem fas man mo woman we tufala i stret olgeta, mo i putum tufala i stap long wan kwaet ples.—Jenesis 1:27-31.

● Nating se i gat plante trabol long wol, be God i no fogetem plan we hem i gat fastaem.—Ol Sam 37:11, 29.

● God i mekem sam samting finis, blong wol ya mo ol man oli save kam olsem hem i wantem fastaem.—Jon 3:16.

?Olsem wanem? ?Yu yu wantem save moa long Kingdom blong God mo ol samting we bambae hem i mekem blong stretem ol trabol long wol ya? Ol Witnes blong Jehova we oli wokem buk ya, oli glad blong givhan long yu. Nekis taem oli kam long haos blong yu, i gud yu storian wetem olgeta long ol kwestin ya:

● ?Wanem ya Kingdom blong God?

● ?Kingdom ya bambae i jenisim wanem samting long wol?

● ?Kingdom blong God bambae i mekem ol jenis ya wetaem mo olsem wanem?

?YU YU BIN TINGBAOT?

● ?From wanem ol gavman blong man oli no naf blong mekem wol i kam gud?—Jeremaea 10:23.

● ?God i mekem wanem samting finis blong soemaot se hem i stap tingbaot yumi?—Jon 3:16.

● ?Kingdom blong God bambae i mekem wanem i kamaot long wol mo ol man?—Ol Sam 37:11, 29.

[Tok blong makem poen long pej 27]

?Ol gavman blong man oli save stretem ol trabol long wol? ?Yumi save trastem hu blong i givhan long yumi?