“Ang mga tawo nangayog mga tubag gikan sa ilang mga lider. Sila gustog tinuod nga mga solusyon, dili puro lang saad o minantinil nga mga paningkamot.”—UNITED NATIONS SECRETARY-GENERAL BAN KI-MOON.

NAGKINABUHI na kita nianang gitawag sa Bibliya nga “makuyaw nga mga panahong lisod sagubangon.” (2 Timoteo 3:1) Ang balita nga atong madungog pulos lang gubat, terorismo, problema sa ekonomiya, ug pagkadaot sa kalikopan.

May paglaom pa ba nga moarang-arang ang kahimtang? Ang kagamhanan sa tawo makasulbad ba sa mga problema sa kalibotan? O kinahanglan bang mangita kitag laing kadangpan?

Kon Unsay Gipangangkon sa mga Nasod

Ang mga nasod nangangkon nga gipaluyohan sa Diyos. Pananglitan, diha sa Pledge of Allegiance niini, ang United States of America nag-ingon nga kini maoy “usa ka nasod ilalom sa Diyos,” ug makita diha sa mga sensilyo ug papel de bangko nianang nasora ang mga pulong “In God We Trust.”

Hinunoa, daghang molupyo sa United States dili gani motuo nga dunay Diyos—ug tinuod usab kini sa ubang nasod nga nangangkon nga gipaluyohan sa Diyos. Bisan kadtong mga tawo nga nagtuo ug Diyos lahig mga panglantaw may kalabotan sa pagpangilabot sa Diyos sa tawhanong kalihokan.

● Ang uban moingon nga ang Diyos dili mahingawaon sa tawo ug nga ang tawo gipasagdan sa pagmando sa kaugalingon.

● Ang uban usab moingon nga gipaluyohan sa Diyos ang gobyerno sa tawo ug nga iyang palamposon ang mga paningkamot niini sa pag-usab sa atong kalibotan.

Hain niini ang imong gituohan?

Hunahunaa: Kon tinuod ang unang mga pahayag, alaot kaayo kita. Kon ang ikaduha maoy tinuod, nan kinahanglang pangutan-on nato ang atong kaugalingon: ‘Duna bay nasod nga gipaboran sa Diyos? Kon ang duha ka nasod maggubatay ug ang duha sinserong mag-ampo nga makadaog, kinsa kahay dapigan sa Diyos?’ Mahimo bang wala siyay dapigan niining duha?

Kon Unsay Gitudlo sa Bibliya

1. Ang tawo wala lalanga nga maoy magmando sa kaugalingon. Ang Bibliya nag-ingon: “Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Napamatud-an sa kasaysayan nga tinuod kining mga pulonga. Ang pagmando sa tawo wala makapatunghag maayong kalibotan, bisan pag ang mga magmamando dagko kaayog mga tinguha ug maayo kaayog mga intensiyon. Hinunoa, “ang tawo nagmando sa tawo alang sa iyang kadaotan.”—Ecclesiastes 8:9.

2. Ang Diyos mahingawaon kanato. Siya nakasabot ug nahibalo sa atong kahimtang. Dugang pa, siya molihok sa pagtabang kanato. Sa unsang paagi? Pinaagi sa iyang Gingharian, nga “dili gayod malumpag.”—Daniel 2:44.

3. Ang Gingharian maoy usa ka tinuod nga kagamhanan. Kini nga Gingharian ang ginapangayo sa minilyong sinserong mga tawo diha sa pag-ampo nga Amahan Namo. Niana nga pag-ampo,  ang mga tawo nangaliyupo sa Diyos: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Matikdi nga ipatuman sa Gingharian sa Diyos ang iyang kabubut-on dili lang sa langit kondili sa yuta usab.

4. Pinaagi sa iyang Gingharian, ang Diyos makahimo sa pag-usab sa atong kalibotan ug iya gayod kining usbon. Kon nagduhaduha ka niini, palandonga ang gitudlo sa Bibliya.

● Gihatagan sa Diyos ang tawo ug hingpit nga sinugdanan diha sa malinawon nga palibot.—Genesis 1:27-31.

● Bisan pa sa mga problema nga atong ginasagubang, wala malimot ang Diyos sa iyang katuyoan alang sa atong Yuta.—Salmo 37:11, 29.

● Ang Diyos duna nay gihimo aron ang atong Yuta ug ang tawo mapasig-uli sa kanhing kahimtang nga maoy iyang katuyoan sa sinugdan.—Juan 3:16.

Buot ka bang mahibalo pag dugang bahin sa Gingharian sa Diyos ug kon sa unsang paagi usbon niini ang atong kalibotan? Ang mga Saksi ni Jehova, nga maoy nagaimprenta niining magasina, malipay sa pagtabang kanimo. Amo kang gidapit sa pagpangutana kanila bahin sa mga ulohan sa ubos sa sunod higayong moduaw sila kanimo.

● Unsa ang Gingharian sa Diyos?

● Unsang mga kausaban ang ipatungha niini?

● Kanus-a ug sa unsang paagi ipahinabo sa Gingharian sa Diyos kini nga mga kausaban?

NAKAPAMALANDONG KA BA?

● Nganong ang kagamhanan sa tawo dili makahimo sa pagpauswag sa kahimtang sa kalibotan?—Jeremias 10:23.

● Sa unsang paagi gipakita sa Diyos nga siya mahingawaon kanato?—Juan 3:16.

● Unsay himoon sa Gingharian sa Diyos alang sa atong Yuta ug sa magpuyo niini?—Salmo 37:11, 29.

[Blurb sa panid 27]

Ang kagamhanan sa tawo makasulbad ba sa mga problema sa kalibotan? O kinahanglan bang mangita kitag laing kadangpan?