Manatu‘i ke Lea Mālō!

KO FĒ ‘a e taimi fakamuimui na‘á ke ma‘u ai ha ki‘i tohi fakamālō? Ko fē ‘a e taimi fakamuimui na‘á ke ‘ave ai ha tohi fakamālō?

‘I he māmani ko eni ‘o e fetu‘utaki fakakomipiutá, ko e ngaahi pōpoaki tohi-nima ‘o e hounga‘iá kuo hoko ia ko ha me‘a ‘oku tātātaha. Neongo ia, ko e lea “mālō” ‘i he faitohí ko ha founga makehe ia ke ‘ai ai ke ‘ilo‘i ‘e he kakaí ‘okú ke hounga‘ia ‘i he‘enau anga-leleí. ‘Oku hoko heni ‘a e ngaahi fokotu‘u ‘e ni‘ihi ki he founga ke fai ai iá.

1. Tohi-nima ha nouti ke ‘ai ke maongo fakafo‘ituitui.

2. Ngāue‘aki ‘a e hingoa ‘o e tokotaha ‘okú ke fai ki ai ‘a e fakamāloó.

3. Kapau na‘á ke ma‘u ha me‘a‘ofa, lave ki he me‘a‘ofá pea tala ange ‘a e founga ‘okú ke palani ke ngāue‘aki ai iá.

4. Toe fai ha fakamālō ‘i he ngata‘anga ‘o e tohí.

Ko ha tohi fakamālō ‘okú ne ‘ai ke ongo‘i lelei ‘a e tokotaha ‘oku fai ki aí.

Ko ia ko e taimi hoko mai ‘oku anga-talitali kakai atu ai ha taha kiate koe, fai ha ngāue ‘ofa, pe ‘oatu kiate koe ha me‘a‘ofá, fakahaa‘i ‘oku ‘ikai te ke fakasi‘isi‘i ‘a e mahu‘inga ‘o e ngaahi feinga ‘a e tokotahá. Manatu‘i ke lea mālō!

[Puha/Fakatātā ‘i he peesi 22, 23]

 Si‘i Mehikitanga Mele, (2)

‘Oku ou fakamālō lahi atu ki he uasi fafangú! (3) Koe‘uhi ‘oku ou fa‘a mohe ma‘u pē, kuó u ‘osi ngāue‘aki lelei ia. Na‘e fakafiefia ‘a e sio kiate koe he uike kuo ‘osí, pea ‘oku ou fakatau ange pē te ke a‘u lelei ki ‘api. ‘Oku mau fakatu‘otu‘a atu ke sio kiate koe ‘i he kaha‘u vavé ni maí.

‘Oku ou toe fakamālō atu ‘i ho‘o me‘a‘ofa ‘aongá! (4)

Mei ho fakafotú,

Sione

[Fakatātā]

(1)

[Puha ‘i he peesi 23]

NGAAHI TOKONI

● Lave ‘o ‘ikai fakahangatonu ki he ngaahi me‘a‘ofa pa‘angá. Ko e fakatātaá, ‘i he ‘ikai fakahaa‘i pau ‘a e lahi ‘o e me‘a na‘á ke ma‘ú, ‘e lava ke ke pehē: “ ‘Oku ou fakamālō atu ‘i ho‘o me‘a‘ofa loto-fiefoakí. ‘Oku ou palani ke ngāue‘aki ia ki he . . .”

● Fakakau ai ‘a e fakamatala pē ‘oku felāve‘i mo e me‘a‘ofá mo ho‘o hounga‘ia aí. ‘Oku ‘ikai ko ha taimi eni ke ‘oatu ai ha fakamatala fakaikiiki ki ho‘o mālōlō ‘eve‘evá pe ko ho‘o fononga fakamuimui ki he falemahakí.

● ‘Oua ‘e lāunga fekau‘aki mo ha fa‘ahinga palopalema pē na‘e hoko kiate koe ‘i he me‘a‘ofá. Ko e fakatātaá, ko ha ta‘e‘ofa ia ke tohi, “ ‘Oku ou fakamālō atu ki he me‘a tunu tousí—ka ‘oku ‘ikai ke hao ia ‘i he funga laupapa ‘i hoku peitó!”

[Puha ‘i he peesi 23]

‘Oku pouaki ‘e he Tohi Tapú ha laumālie ‘o e fakamālō. (Luke 17:​11-​19) ‘Oku ekinaki mai ai kiate kitautolu ke tau “lotu ma‘u pē” ki he ‘Otuá, pea hoko atu: “Fai ‘a e fakafeta‘i ‘i he me‘a kotoa pē.”​—1 Tesalonaika 5:​17, 18.