Bohle re Kwešwa Bohloko ke Bošoro

 KE MANG yo a sa kago a kgongwa ke bošoro? Re dula re bo bona ditabeng. Re dula re tšhogile gore bo ka re diragalela ditarateng le mošomong gomme bana ba kopana le bjona go bomphenyašilo sekolong. Gaešita le ka gae, moo gantši batho ba ikwago ba šireletšegile ge mejako e notletšwe, ba dimilione—kudukudu basadi—ba ikwa ba sa šireletšega. Ge e le gabotse, dinageng tše dingwe, 70 lekgolong ya basadi ba bega gore ba kile ba katwa ke wa leloko la kgauswi kudu.

Dinageng tše dintši, batho ba boifa borabele bja dipolitiki goba bja leago goba gaešita le botšhošetši. Dipoifo tše di bonagatšwa ke koketšego ya didirišwa tša elektroniki tša go hlapetša tše di hwetšagalago dinageng tše dingwe, kudukudu tšeo di ilego tša tšhošetšwa.

Go a kwagala ge intaseteri ya didirišwa tša go hlapetša ka bidio e atlega kudu—go sa šetšwe go phuhlama ga maemo a boiphedišo lefaseng ka bophara. Ke mang yo a lefelelago dilo tše? Ge e le gabotse, di lefša ke rena bohle ka mokgwa wa motšhelo le ditefišo tše dingwe. E bile ditshenyagalelo tše bjalo di ka oketšega ge dikgopolo mabapi le tšhireletšego di thoma go ata, go katologa le go bitša kudu.

Ditlamorago tše di tšhošago tša bošoro di swanetše go dira gore re naganišiše ka rena—mekgwa ya rena le ditumelo tša rena. Dihlogo tše di latelago di tla ahlaahla dipotšišo tše: Mokero wa ditaba o kgatha tema efe tabeng ya go ata ga bošoro? Ke dilo dife tše di ka huetšago pono ya rena mabapi le bošoro? Re ka itšhireletša bjang dikhuetšong tše di fošagetšego?