Ua Mafatia i Tatou uma Ona o Faiga Sauā

 O AI se isi e leʻi aafia i faiga sauā? Po o fea lava e tatou te i ai, po o luga o auala tetele, galuega ma aʻoga, e tatou te vāai ma faalogo lava i lipoti e uiga i faiga sauā. E oo lava i totonu o aiga e manatu i ai o se nofoaga e saogalemu, e faitau miliona ua lē o toe lagona le saogalemu, aemaise lava i fafine. E fua lava i le tulaga o le atunuu, ae e oo atu i le 70 pasene le aofaʻi o fafine ua lipotia mai ua sauāina e a latou paaga.

I le tele o atunuu, ua fefefe tagata i faiga sauā faapolotiki, feteenaʻiga i le va o tagata ma faiga faatupu faalavelave. E faamaonia ona o le tele o meapuʻeata vitiō ua faaaogā i nisi o atunuu, aemaise lava i atunuu o loo taulaʻi i ai le ʻau faatupu faalavelave.

E ui o loo paʻū maulalo le tulaga tau tamaoaiga o le lalolagi, ae ua matuā olaola pisinisi o loo gaosia nei meapuʻeata vitiō. O ai e totogia nei mea uma? O i tatou e ala i lafoga. E ui ina taugatā, ae ua matuā manaʻomia nei mea mo le puipuiga o le saogalemu.

Ona o aafiaga mataʻutia o faiga sauā, e tatau ai ona toe iloilo o tatou tulaga e faatatau i tapulaa ma talitonuga. O le a talanoaina i mataupu o mulimuli mai fesili nei: O le ā le vaega a tala fou i le faateteleina o faiga sauā? O ā mea e mafai ona taaʻina ai o tatou uiga ma manatu e uiga i faiga sauā? E faapefea ona puipuia i tatou mai i taaʻiga leaga?