Bayolente Ko

Sumala sa giasoy ni Salvador Garza

SA BATA pa ko, bayolente ko ug makig-away sa tanang makapasuko nako. Namatikdan kini sa usa ka kampeyon nga boksingero ug busa iya kong gitudloan sa pagboksing. Dayon, nahimo kong propesyonal nga boksingero ug nakigsangka diha sa lainlaing bahin sa United States. Sa ulahi, nahimo akong badigard sa usa ka lider sa gang.

Bayolente gihapon ko bisag naminyo na ug nakabaton ug unom ka anak. Nianang panahona, nagdumala kog naytklab. Daghang beses nga may misulay sa pagpatay nako, apan ganahan kaayo ko niining matanga sa kinabuhi. Nakapusil kog duha ka tawo, ug diriyot nako silang mapatay. Ako ug ang akong mga higala nagplano sa pagkidnap ug iladong politiko. Pero nahibaloan kini sa kapolisan ug gidakop ako. Sa dihang gigukod nila ang akong mga kauban, dihay nahitabong pinusilay, ug silang tanan nangamatay. Busa nagpasalamat ko nga wala ko maapil kay niadtong higayona napriso na ko!

Paglabayg pila ka tuig, gibuhian ko ug nakakitag trabaho. Usa ka adlaw niana, sa akong pagpauli sa balay gikan sa trabahoan, mikalit pagsakit ang akong ulo. Nabalaka kaayo ko, busa nag-ampo ko sa Diyos. Gisultihan ko sa akong asawa nga si Dolores, kinsa nagtuon sa Bibliya uban sa mga Saksi ni Jehova, nga ang ngalan sa Diyos mao si Jehova. (Salmo 83:18) Busa nag-ampo ko kaniya.

Sa naulian ko, gidasig ko ni Dolores sa pagtambong sa mga tigom sa mga Saksi ni Jehova diha sa ilang Kingdom Hall. Milugmaw ang akong mga luha tungod sa kabuotan ug sa kinasingkasing nga pagtagad sa mga Saksi. Tungod niini, ako usab nagsugod sa pagtuon sa Bibliya ug ang akong tinamdan nabag-o. Nalipay kaayo ko sa akong nakat-onan.

Apan naglisod gihapon ko sa pagpugong sa akong kasuko. Pananglitan, samtang nagsangyaw sa kabalayan uban sa akong amigong si Antonio, gikasab-an mi sa usa ka lalaki. Nasuko ko pag-ayo, busa ako siyang gihanaag sumbag. Maayo gani kay gipugngan ko ni Antonio. Dayon, iya kong gisultihan kon giunsa pag-antos ni Jesus ang pagbiaybiay ug pagdaogdaog. Si apostol Pedro, kinsa nag-alagad kauban ni Jesus, misulat: “Sa gisultihan siya ug pasipala, wala siya mobalos sa pagsultig pasipala.” (1 Pedro 2:23) Natandog ako niini.

Sa mamalandong ko sa mga kausaban nga akong nahimo, mapasalamaton gyod ko kang Jehova sa iyang balaang espiritu, nga makatabang kanato sa pagpugong sa kaugalingon ug sa pagkahimong makigdaiton. (Galacia 5:22, 23) Ang akong pamilya nagkahiusa ug malipayon, ug ang among kinabuhi malinawon. Dugang pa, nakapribilehiyo ako sa pag-alagad ingong bug-os-panahong ministro, nga nagatabang sa uban nga mahimong makigdaiton sa Diyos.

[Hulagway sa panid 9]

Ang pagtuon sa Bibliya nakatabang kang Salvador sa pagkahimong makigdaiton