Në këtë artikull, do të mësosh

PSE ke nevojë për shembuj

KU t’i gjesh

SI t’i imitosh

PSE KE NEVOJË PËR TA

FAKT: Prirja e njeriut është të bëhet si ata që admiron. Kjo mund të jetë gjë e mirë ose e keqe​—varet kë admiron.

Çfarë të duhet: Shembuj që ia vlen t’i imitosh.​—Filipianëve 3:17.

Problemi: Shumë veta i mbajnë sytë te njerëzit e famshëm​—muzikantë, sportistë me emër ose yje të kinemasë—​madje edhe kur kanë reputacion të fëlliqur.

Për të menduar: Bibla i krahason tiparet e personalitetit me një veshje. (Kolosianëve 3:9, 10) Nëse del të blesh rroba, a do të lejoje që një shitës i veshur si mos më keq të të tregonte si të visheshe ti? Atëherë, pse të lejosh që një i famshëm me reputacion të keq të të diktojë ç’lloj njeriu duhet të jesh ti? Nëse ke shembuj të mirë në jetë, nuk do ta lejosh këtë e as do të ndjekësh turmën, por (1) do të zgjedhësh cilësitë që dëshiron të kesh dhe (2) do të imitosh njerëzit që shkëlqejnë në këto cilësi.

 KU T’I GJESH

Shëno nëse pohimi i mëposhtëm është i vërtetë apo i rremë.

1. Një model duhet të jetë dikush që e ke takuar.

□E vërtetë □E rreme

2. Një model duhet të jetë i përsosur.

□E vërtetë □E rreme

3. Mund të kesh shumë modele në jetë.

□E vërtetë □E rreme

Përgjigjet

1. E rreme. Shembujt e mirë mund t’i zgjedhësh edhe nga kohët e lashta. Më të shkëlqyerit nga këta i gjen në Bibël. Për shembull, po të lexosh kapitullin 11 në librin biblik të Hebrenjve, do të vëresh se apostulli Pavël përmend 16 burra e gra që kishin një besim shembullor. Ç’është më e rëndësishmja, në kapitullin vijues Pavli na nxit ‘ta mbajmë shikimin të ngulur’ te Jezui dhe ta imitojmë. (Hebrenjve 12:2) Jezui është modeli më i mirë që kemi.​—Gjoni 13:15. *

2. E rreme. Përveç Jezuit, Adami nuk ka pasur asnjë pasardhës të përsosur. (Romakëve 3:23) Madje, edhe profeti heroik Elija ishte «njeri si të gjithë ne». (Jakovi 5:17, ECM) E njëjta gjë mund të thuhet për personazhe, si Miriami, Davidi, Jonai, Marta dhe Pjetri. Bibla flet haptas për gabimet e këtyre burrave dhe grave. Prapëseprapë, ata ishin shembullorë në shumë aspekte të jetës, ndaj mund të jenë shembuj të mirë për ne.

3. E vërtetë. Modele mund të zgjedhësh sa të duash. Dikush mbase shquhet si punëtor, një tjetër mund të dallohet për durimin. Një i tretë ndoshta ruan pikëpamjen pozitive përballë problemeve. (1 Korintasve 12:28; Efesianëve 4:11, 12) Kërko anët e mira te të tjerët dhe do të zbulosh se kanë cilësi që ia vlen t’i imitosh.​—Filipianëve 2:3.

 SI T’I IMITOSH

1. Vëzhgoji ata që i sheh si shembuj. Apostulli Pavël u tha të krishterëve të shekullit të parë: «Vëreni ata që jetojnë simbas shembullit që keni në ne.»​—Filipianëve 3:17, Simon Filipaj.

2. Lidhu me ta. Nëse është e mundur, kalo ca kohë me ata që ke zgjedhur si shembuj nga ditët tona. Bibla thotë: «Kush ecën me të mençurit, do të bëhet i mençur.»​—Proverbat 13:20.

3. Pasqyro cilësitë e admirueshme të shembujve të tu. Te Hebrenjve 13:7 thuhet: «Ndërsa shqyrtoni me kujdes rezultatin e sjelljes së tyre, imitoni besimin e tyre.»

Je gati të fillosh? Shiko hapat e mëposhtëm se si të imitosh shembujt e mirë, pastaj plotëso hapësirat boshe.

Hapa konkretë

Zgjidh një cilësi që do të të pëlqente ta kishe. (A do të doje të ishe më i shoqërueshëm? Më bujar? Më punëtor? Më i besueshëm? Të mos dorëzoheshe kollaj?)

․․․․․

Zgjidh dikë që shfaq cilësinë që do të të pëlqente të zhvilloje. *

․․․․․

Kur zgjedh një shembull të mirë, qëllimi nuk është të bëhesh fiks si ai njeri. Prapë do të kesh cilësitë e tua të bukura unike. Megjithatë, shembujt e mirë do të të ndihmojnë të nxjerrësh në pah anët e tua më të mira ndërsa rritesh. Jo vetëm kaq, por duke imituar shembullin e tyre, ti vetë do të bëhesh shembull i mirë për të tjerët.

Për më shumë artikuj nga rubrika «Të rinjtë pyesin», mund të shkarkoni numra të tjerë të revistës Zgjohuni! nga adresa e Internetit www.pr418.com

[Shënimet]

[Diçitura në faqen 21]

Pse të lejosh që një i famshëm me reputacion të keq të të diktojë ç’lloj njeriu duhet të jesh ti?

[Kutia dhe figurat në faqet 22, 23]

JA Ç’THONË MOSHATARËT E TU

Lejla​—Shoqja ime Sandra sheh anën pozitive të gjërave. Gjithashtu, e njeh Biblën në pëllëmbë të dorës, prandaj duket se gjithnjë u gjen zgjidhje tak-fak problemeve. Mund t’i hapem sa herë kam ndonjë problem, të madh a të vogël.

Terensi​—Shokët e mi, Kajli dhe Davidi, nuk i shpërfillin kurrë ndjenjat e të tjerëve. Po të ketë probleme dikush, tregohen përherë të gjindshëm, duke i lënë mënjanë shqetësimet e veta. Janë shembuj të mrekullueshëm për mua.

Emalina​—Modeli që dua të imitoj është mami. Ajo e njeh Biblën në majë të gishtave dhe gjithmonë kërkon raste që t’u flasë të tjerëve për besimin e saj. Beson me gjithë zemër se shërbimi është një privilegj, jo një barrë. E admiroj për këtë.

[Kutia në faqen 23]

LEXO MË SHUMË PËR KËTË

A ke nevojë për ndihmë që të gjesh shembuj të mirë? Lexo kapitullin 11 të Hebrenjve dhe zgjidh një nga burrat a gratë që përmenden atje. Fillo një projekt studimi me synimin që të imitosh cilësitë e tij të admirueshme.

Shembuj të tjerë biblikë mund t’i gjesh në vëllimet 1 dhe 2 të librit Të rinjtë pyesin . . . Përgjigje praktike, botuar nga Dëshmitarët e Jehovait. Shih treguesin e «ja një model» në pjesën e brendshme të kapakut të pasmë të secilit libër.

[Kutia në faqen 23]

PSE TË MOS PYESËSH PRINDËRIT?

Bisedo me prindërit për shembujt e tyre në jetë​—shembujt që kishin kur ishin sa ti dhe ata që kanë sot. Si kanë nxjerrë dobi duke pasur shembuj të mirë në jetë?