L-Aħħar tad-Dinja Jbeżżaʼ lil Ħafna
MINBARRA t-teoriji mhux realistiċi dwar l-aħħar tad-dinja msemmijin fl-artiklu taʼ qabel, hemm xi tħassib li jistħoqqlu konsiderazzjoni serja. Bosta nies jinkwetaw li minħabba li l-popolazzjoni qed tikber wisq jistaʼ jkun hawn nuqqas taʼ ilma u ikel. Oħrajn jitħassbu dwar il-konsegwenzi taʼ kollass finanzjarju globali. Xi ngħidu għad-diżastri naturali, il-mard li jittieħed, jew il-gwerer nukleari? Jistgħu ġrajjiet bħal dawn jikkaġunaw katastrofi globali?
Ejja niddiskutu fil-qosor xi sitwazzjonijiet li wħud jaħsbu li jistgħu jwasslu għall-aħħar tad-dinja. Mhux kollha jheddu li joqtlu lill-bnedmin kollha fid-dinja, imma żgur jidhru li għandhom il-potenzjal li jeqirdu l-ħajja fuq l-art kif nafuha issa. Fosthom hemm dawn li ġejjin.
Vulkani Qerrieda Ħafna
Fl-1991 żbroffat il-Muntanja Pinatubo fil-Filippini. Din qatlet iktar minn 700 ruħ u ħalliet madwar 100,000 persuna bla dar. Sħaba kbira taʼ rmied telgħet xi 30 kilometru fl-ajru u mbagħad niżlet fuq l-art, fejn ksiet l-uċuħ tar-rabaʼ u ġarrfet il-bjut tal-bini. Pinatubo u vulkani oħrajn bħalu jikkaġunaw bidliet fil-klima għal diversi snin wara li jiżbroffaw.
Żbroffi enormi, bħal dawk li seħħew fil-passat imbiegħed, kieku jkunu mijiet taʼ drabi akbar u iktar devastanti minn kwalunkwe żbroff fl-istorja dokumentata u kieku jagħmlu ħafna iktar ħsara. Minbarra l-qawwa qerrieda immedjata, it-taqlib fil-klima globali kieku jikkaġuna ħsara lill-ħsad, tfixkil fil-provvisti tal-ikel, u jwassal għal ġuħ fuq skala kbira.
“Il-vulkani joqtlu l-pjanti u l-annimali madwarhom għal kilometri sħaħ; vulkani qerrieda ħafna jheddu speċi sħaħ bl-estinzjoni billi jbiddlu l-klima mad-dinja kollha.”—“National Geographic.”
Asterojdijiet
Kmieni għodwa waħda fl-1908, raġel kien bilqiegħda fil-veranda taʼ ħanut fl-imwarrab f’Vanavara, is-Siberja, meta splużjoni tajritu mis-siġġu tiegħu. Is-sħana tant kienet qawwija li ħass bħallikieku l-qmis tiegħu kienet qed taqbad. Il-post tal-isplużjoni kien xi 60 kilometru ’l bogħod. L-isplużjoni kienet kaġunata minn asterojde li kellu dijametru taʼ xi 35 metru u li kien jiżen madwar 100 miljun kilogramma. L-asterojde sploda minħabba l-pressjoni u t-temperatura għolja li kienu riżultat tal-veloċità mgħaġġla li beda għaddej biha mill-atmosfera. L-isplużjoni ħarġet enerġija ekwivalenti għal 1,000 bomba daqs dik taʼ Hiroshima u qerdet xi 2,000 kilometru kwadru taʼ foresta Siberjana. M’għandniex xi ngħidu, asterojde akbar kieku jagħmel ħafna iktar ħsara, għax jikkaġuna nirien enormi u mbagħad it-temperatura titbaxxa b’mod drastiku madwar id-dinja kollha u jinqerdu ħafna speċi.
“Matul l-istorja tad-dinja, ġejna bombardjati minn kometi u asterojdijiet mill-ispazju. Fil-passat, il-kolliżjonijiet kienu iktar spissi, imma se jerġgħu jseħħu. Hija biss kwistjoni taʼ meta.”—Chris Palma, lekċerer tal-astronomija u l-astrofiżika f’Penn State University.
Taqlib fil-Klima
It-temperatura medja tad-dinja qed tiżdied u qed ikun hemm estremi fit-temp. Il-glaċieri kif ukoll is-silġ minn fuq il-muntanji qed jinħallu, u s-sikek tal-qroll u speċi importanti qed imutu. Xi xjenzati jemmnu li dawn kollha jindikaw li l-klima globali qed tinbidel. Għalkemm hemm opinjonijiet differenti, ħafna jsostnu li dan hu minħabba li l-karozzi u l-industrija qed jaħarqu l-faħam, iż-żejt, u l-gass naturali—fjuwils tal-fossili li jitfgħu ammonti għoljin taʼ dijossidu karboniku fl-atmosfera.
Xi esperti jemmnu li dawn l-emissjonijiet jaġixxu bħal serra, billi jnaqqsu l-pass li bih is-sħana toħroġ mill-art għal ġol-ispazju, u b’hekk jikkaġunaw żieda fit-temperaturi. Peress li s-siġar jassorbu d-dijossidu karboniku, il-qtugħ taʼ siġar fuq skala kbira jistaʼ jeffettwa wkoll it-taqlib fil-klima.
“Jekk ir-rati preżenti tat-tisħin globali jkomplu kif inhuma u l-produzzjoni tad-dijossidu karboniku ma tonqosx, ħafna xjenzati jemmnu li t-temperatura medja tal-Art se tkompli tiżdied, u dan se jwassal għal taqlib eħrex u li jkun iktar diffiċli biex tbassru u għal livelli ogħla tal-oċeani li jistgħu jheddu l-inħawi baxxi taʼ mal-kosta fejn jgħixu ħafna nies.”—“A Mind for Tomorrow: Facts, Values, and the Future.”
Mard li Jinxtered
Fis-seklu 14, il-Pesta qerdet terz tal-popolazzjoni fl-Ewropa f’sentejn biss. Bejn l-1918 u l-1920, l-influwenza Spanjola qatlet minn tal-inqas 50 miljun ruħ. Peress li l-ivvjaġġar kien jieħu fit-tul, il-mard ma kienx jinxtered malajr. Madankollu, minħabba li llum il-bliet kibru u l-ivvjaġġar internazzjonali sar faċli, f’kemm ilna ngħidu marda simili tistaʼ tinfirex mal-kontinenti kollha.
Marda bħal din li tinxtered tistaʼ sseħħ b’mod naturali. Imma hemm ukoll biżaʼ li qed jikber minħabba l-armi bijoloġiċi, mard li joħloq il-bniedem. Esperti f’dan il-qasam jgħidu li grupp żgħir taʼ nies bl-għarfien neċessarju jistgħu jixtru tagħmir minn fuq l-Internet u jipproduċu armi bijoloġiċi qattiela.
“Mard kaġunat b’mod naturali għadu taʼ theddida bijoloġika serja; madankollu, nies għedewwa armati b’dawn l-istess organiżmi li jikkawżaw il-mard—jew b’organiżmi [li jirreżistu diversi mediċini] jew li jinħolqu b’mod sintetiku—jistgħu jipproduċu konsegwenzi katastrofiċi.”—The Bipartisan WMD Terrorism Research Center.
L-Estinzjoni taʼ Speċi Essenzjali
Matul l-aħħar ħames snin, uħud li jrabbu n-naħal fl-Istati Uniti tilfu madwar 30 fil-mija tan-naħal tagħhom kull sena minħabba fenomenu globali li fih kolonji sħaħ taʼ naħal f’daqqa waħda u b’mod misterjuż jisparixxu mid-doqqajs, jew il-bejta, tagħhom. In-naħal ma jagħtiniex l-għasel biss. Idakkar prodotti importanti, fosthom l-għeneb, it-tuffieħ, is-soyabeans, u l-qoton. Aħna niddependu min-naħal.
Aħna niddependu wkoll mill-fitoplankton (jiġifieri, il-ħxejjex tal-baħar bħall-alka). Mingħajru ma jkollniex ħut. Mingħajr id-dud biex jagħti l-arja lill-ħamrija, ikollna ferm inqas prodotti tal-ikel. L-estinzjoni taʼ speċi importanti bħal dawn kieku tirriżulta f’nuqqas taʼ ikel u f’ġuħ, li mbagħad iwasslu għal vjolenza u rewwixti. It-tinġis, il-popolazzjoni li qed tikber wisq, il-ħsad żejjed, il-qerda tal-ambjent naturali tal-annimali u l-pjanti, u t-taqlib fil-klima kollha jikkontribwixxu għall-estinzjoni taʼ xi annimali forsi sa 1,000 darba iktar mir-rati naturali.
“Kull sena, bejn 18,000 u 55,000 speċi jsiru estinti. Il-kaġun: l-attivitajiet tal-bnedmin.”—United Nations Development Program.
Gwerra Nukleari
Splużjoni nukleari tistaʼ teqred belt f’ħakka t’għajn—fatt tal-biki li ntwera darbtejn f’Awwissu tal-1945. Hi tal-biżaʼ l-qawwa li għandha splużjoni nukleari, għaliex teqred u toqtol permezz taʼ mewġa għal għarrieda taʼ pressjoni tal-arja, ir-riħ, is-sħana, in-nar, u r-radjazzjoni. Ir-radjazzjoni tikkontamina wkoll l-ikel u l-ilma. Gwerra nukleari kieku tikkaġuna ammonti kbar taʼ trab biex jitilgħu fl-ajru, u b’hekk id-dawl tax-xemx ma jkunx jidher u t-temperaturi madwar il-globu jitbaxxew ħafna. Prodotti tal-ikel u pjanti oħrajn kieku jmutu. Mingħajr l-ikel x’jieklu, il-bnedmin u l-annimali kieku jmutu bil-ġuħ. Jingħad li xi disaʼ pajjiżi għandhom il-kapaċità li jagħmlu attakki nukleari. Ftit nazzjonijiet oħrajn jidhru li qegħdin fil-proċess li jiżviluppaw l-armi nukleari tagħhom stess. U organizzazzjonijiet tat-terroristi huma ħerqanin ħafna biex jakkwistawhom.
“L-armi nukleari għadhom l-iktar theddida serja u immedjata għaċ-ċivilizzazzjoni umana. . . . Għad hemm xi 25,000 arma nukleari madwar id-dinja . . . Eventwalment, it-terroristi se jiksbu arma nukleari.”—Union of Concerned Scientists.