OL SAVE long en blong wol we yumi tokbaot finis i no leftemap tingting blong yumi. Be i gat tri samting long saed blong ol save ya we oli sem mak nomo. Faswan, ol save ya i stanap long tingting blong man nomo, mo ol man oli soemaot finis se oli no save talemaot gud samting we bambae i hapen. Nambatu, sipos ol samting we yumi tokbaot oli hapen, man we i laef i stap, i laki nomo. Namba tri, ol man we oli laef i stap afta long en blong wol, bambae oli hadwok blong stap laef.

Save we Baebol i givim long fiuja i leftemap tingting blong yumi. Baebol i talem se yes, bambae i gat wan bigfala jenis i kamaot. Be ol man we bambae oli laef i stap, hemia olgeta nomo we oli stap mekem samting we God i wantem. Mo tu, Baebol i no talem se wol bambae i bosta from we i kam hot tumas, mo i no talem se bambae evri samting i kam aes from we wol i kam kolkol tumas. Baebol i talem se wol ya bambae i kam Paradaes.

Be i had blong plante man oli bilif long ol tok blong Baebol. Baebol i talem se wan bigfala trabol bambae i kamaot, nao Amagedon, nao rul blong Kraes blong wan taosen yia, mo Paradaes. Ol man we bilif blong olgeta i hafhaf nomo, oli ting se ol tijing ya oli kastom stori nomo. Ol man we oli stadi long ol tijing blong jos, oli tokbaot ol tijing ya plante, oli raorao from, mo oli putum ol defdefren mining long ol tok blong Baebol. Oli no save agri long wan tingting. Wan man blong raetem buk, nem blong hem Bruce A. Robinson, i talem se: “Ol man we oli gat save long ol tijing blong jos oli raetem moa buk long bisnes ya, i bitim ol buk we oli raetem long ol narafala bilif blong ol skul we oli talem se oli Kristin. Be ol save we oli raetem i no klia nating.” ?Wanem i kamaot from? Tingting blong ol man i fasfas.

Ol save we Baebol i givim i klia nomo. Baebol i talemaot tingting blong God. God i no wantem we tingting blong yumi i fasfas long samting we bambae i hapen yet. Bambae yumi luk sam kwestin we plante man oli askem, mo ansa we Baebol i givim. Sipos yu yu wantem save moa, yu save kasem buk ya ?Wanem Samting We Baebol i Rili Tijim? we ol Witnes blong Jehova oli wokem.

“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.

“Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God . . . i rutumaot olgeta, olsem we man i stap rutumaot ol smosmol tri long garen.”—Ol Proveb 2:21, 22.

God “i sevem Noa we i wan prija we i stap talemaot stret fasin, wetem seven narafala man tu, be i letem wota i kam bigwan, i draonem ol narafala man ya we oli no obei long hem. God i jajem tufala taon ya Sodom mo Gomora, nao i bonem tufala long faea, tufala i kam olsem asis nomo. Hem i mekem olsem, blong soemaot fasin we hem i save mekem long ol man we oli kam biaen, we oli no obei long hem.”—2 Pita 2:5, 6.

“Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save. Long taem ya we mi, mi Pikinini blong Man mi kamtru, bambae i olsem taem blong Noa bifo, we ol man oli no rere. Long taem ya, . . . ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong Man mi kamtru, bambae i sem mak nomo.”—Matiu 24:36-39.

‘Long taem blong ol las dei, laef long wol ya bambae i kam strong tumas. Bambae ol man oli save tingbaot olgeta nomo, oli wantem mane tumas, oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no gat sore long man, mo oli mekem i strong tumas oltaem long ol narafala man. Bambae oli spolem nem blong narafala man, mo oli lusum hed, mo oli wael olgeta. Bambae oli no wantem ol fasin ya we i gud, oli agens long hem. Bambae oli spolem ol fren blong olgeta, mo oli man we oli no kea, mo oli praod tumas. Bambae oli wantem tumas ol samting we oli stap harem gud long hem, i winim we oli stap lavem God. Long fes blong ol man, bambae oli stap folem fasin blong Kristin man, be oli no wantem paoa blong God nating long laef blong olgeta.’—2 Timoti 3:1-5.

God “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

Baebol i no givim save long evri samting we bambae i kamaot long fiuja. Be Baebol i mekem i klia se ol man bambae oli no lus evriwan. Fiuja bambae i gud we i gud, i bitim samting we yumi save tingbaot. Yu save bilif strong long samting ya. Yu save trastem Jehova God, se ol promes blong hem bambae oli kamtru.