“E sega ni dua na tamata e se bau raica na Kalou.”—Joni 1:18.

KA ERA TUKUNA ESO

Era vakabauta e levu ni sega ni Kalou o Jisu. Ia eso tale era vakayagataka eso na tikinivolatabu mera vakaraitaka kina ni o Jisu e tautauvata kei na Kalou.

KA E KAYA NA IVOLATABU

E sega ni bau tukuna na iVolatabu ni Kalou Kaukaua Duadua o Jisu se tautauvata kei na Kalou. Ia e tukuna vakamatata ni Kalou o Jiova e cecere sara vua. Me kena ivakaraitaki, a cavuta sara ga o Jisu ena iVolatabu: “[Sa] cecere sara vei au o koya [Tamaqu].” (Joni 14:28) E tukuna tale ga: “E sega ni dua na tamata e se bau raica na Kalou.” (Joni 1:18) E sega gona ni rawa ni Kalou o Jisu ni levu na tamata era raici koya.

O ira na imuri taumada i Jisu era sega ni tukuna ni Kalou o Jisu. Kena ivakaraitaki, e vola na dauvola Kosipeli o Joni ena nona ivola: “Era volai qo moni vakabauta kina ni o Jisu na Karisito na Luve ni Kalou.”—Joni 20:31. *

“Eratou tu e tautuba ena bogi eso na ivakatawanisipi eratou veisau yadra tiko ena kena vakatawai na nodratou qelenisipi.”—Luke 2:8.

KA ERA TUKUNA ESO

Eso era solevutaka na Kirisimasi ena 25 Tiseba nira nanuma ni oya na tikinisiga a sucu kina o Jisu. So tale era solevutaka ena itekitekivu ni Janueri.

KA E KAYA NA IVOLATABU

Na tikinisiga a sucu kina o Jisu e sega ni volai ena iVolatabu. Ia e tukuna ga ni siga a sucu kina, “eratou tu e tautuba ena bogi eso na ivakatawanisipi eratou veisau yadra tiko ena kena vakatawai na nodratou qelenisipi.” (Luke 2:8) Era na sega gona ni biuta tu e tautuba na qelenisipi na kena ivakatawa ena Tiseba kei na Janueri. Cava na vuna?

Na vula qori e dau sivia sara na batabata ena vanua e sucu kina o Jisu. Ena loma ni gauna ya e tukuna na iVolatabu nira “sautaninini ena vuku . . . ni uca levu.” (Esera 10:9, 13; Jeremaia 36:22) Qori e sega ni gauna era na “tu kina e tautuba” na ivakatawa.

“E qai vakaturi koya [Jisu] mai na mate na Kalou.”—Cakacaka 3:15.

WHAT PEOPLE SAY

KA ERA TUKUNA ESO Era vakabauta eso ni dredre me bula tale e dua sa mate, wili kina o Jisu.

KA E KAYA NA IVOLATABU

A tukuna o Jisu vei ratou na nona imuri ni na “sotava . . . e levu na ka rarawa . . . ena vakamatei, ia ena vakaturi ena ikatolu ni siga.” (Maciu 16:21) E volaitukutukutaki ena iVolatabu ni vakaturi mai na mate o Jisu qai rairai vei ira na le 500 vakacaca. (1 Korinica 15:6) O ira era raici koya era vakadeitaka ni sa vakaturi. Era solibula sara ga ena ka era vakabauta!—Cakacaka 7:51-60; 12:1, 2.

VUNA MO KAUAI KINA

Na nona mate kei na nona vakaturi o Jisu e rawa kina nira bula na tamata kece ena vuravura Parataisi e yalataki tu ena iVolatabu. (Same 37:11, 29; Vakatakila 21:3, 4) Na nodrau loloma o Jisu kei Tamana, na Kalou Kaukaua Duadua o Jiova, eda na rawa ni marautaka kina na inuinui ni bula tawamudu ena vuravura Parataisi.—Joni 3:16; Roma 6:23.