BÍBLIA NIA HANORIN
Jesus
Jesus mak Maromak ka lae?
“Ema ida seidauk haree Maromak.”—Joao 1:18.
BUAT NEʼEBÉ EMA HANOIN
Ema barak fiar katak Jesus laʼós Maromak. Maibé ema seluk dehan katak eskritura sira hatudu Jesus no Maromak mak hanesan deʼit.
BUAT NEʼEBÉ BÍBLIA HANORIN
Bíblia nunka dehan katak Jesus mak Maromak neʼebé Aas Liu Hotu ka hanesan ho Maromak. Tuir loloos, Bíblia hatudu ho klaru katak Maromak mak boot liu fali Jesus. Porezemplu, Bíblia hakerek kona-ba Jesus nia liafuan rasik hodi dehan: “Aman boot liu fali haʼu.” (Joao 14:28) Bíblia mós dehan: “Ema ida seidauk haree Maromak.” (Joao 1:18) Entaun, Jesus laʼós Maromak tanba ema barak haree ona nia.
Jesus nia dixípulu sira iha tempu uluk nunka dehan katak Jesus mak Maromak. Porezemplu, apóstolu João neʼebé hakerek evanjellu ida, konta kona-ba buat neʼebé nia hakerek hodi dehan: “Sira-neʼe hakerek atu imi fiar katak Jesus mak Mesias, Maromak [nia] Oan-Mane.”—Joao 20:31. *
Horibainhira mak Jesus moris?
“Iha fatin neʼebá iha bibi-atan balun, neʼebé kalan-kalan hein sira-nia bibi iha rai luan.”—Lucas 2:8.
BUAT NEʼEBÉ EMA HANOIN
Ema balu selebra Natál iha loron 25 Dezembru tanba sira hanoin katak neʼe mak loron neʼebé Jesus moris. Ema balu selebra Jesus nia moris iha fulan-Janeiru.
BUAT NEʼEBÉ BÍBLIA HANORIN
Bíblia la fó sai kona-ba loron neʼebé Jesus moris. Maski nuneʼe, Bíblia dehan katak iha tempu neʼebé Jesus moris, “iha bibi-atan balun, neʼebé kalan-kalan hein sira-nia bibi iha rai luan”. (Lucas 2:8) Tuir loloos, la iha bibi-atan neʼebé hein sira-nia bibi iha liʼur durante fulan-Dezembru no Janeiru. Tanbasá?
Tanba fatin neʼebé Jesus moris bele sai malirin loos iha fulan-Dezembru no Janeiru. Kona-ba tempu neʼe, Bíblia dehan katak ema “nakdedar . . . tanba udan tau”. (Esdras [Ezra] 10:9, 13; Jeremias [Yeremia] 36:22) Entaun ida-neʼe hatudu katak tempu neʼe mak laʼós tempu neʼebé bibi-atan sira ‘hein bibi iha rai luan’.
Jesus moris hiʼas duni husi mate ka lae?
“Maromak halo nia moris hiʼas husi mate sira leet,”—Apostolu 3:15.
BUAT NEʼEBÉ EMA HANOIN
Ema balu fiar katak la iha ema ida bele moris fali, ida-neʼe inklui mós Jesus.
BUAT NEʼEBÉ BÍBLIA HANORIN
Jesus hanorin ninia dixípulu sira katak nia sei “hetan terus barak . . . ema sei oho nia, hafoin, liutiha loron tolu, nia sei moris hiʼas fali”. (Mateus 16:21) Bíblia fó sai katak kuandu ema oho tiha Jesus no tuirmai moris hiʼas fali, Jesus mosu ba ema naʼin-500 liu. (1 Korinto 15:6) Sira neʼebé sai sasin kona-ba neʼe, fiar duni katak Jesus moris hiʼas ona husi mate. Sira mós prontu atu mate tanba sira-nia fiar neʼe!—Apostolu 7:51-60; 12:1, 2.
TANBASÁ MAK IDA-NEʼE IMPORTANTE?
Bíblia hanorin katak Jesus nia mate no moris-hiʼas loke dalan ba ema hotu atu simu Bíblia nia promesa kona-ba paraízu ka mundu foun iha rai. (Salmo [Mazmur] 37:11, 29; Apokalipse 21:3, 4) Sin, ita iha esperansa atu moris kontente, moris neʼebé laiha rohan iha paraízu iha rai. Ita bele hetan ida-neʼe tanba domin neʼebé Jesus no ninia Aman Jeová, Ida neʼebé Aas Liu Hotu, hatudu mai ita. Entaun, mai ita hotu hatudu agradese ba sira.—Joao 3:16; Roma 6:23.
^ par. 7 Bíblia la hanorin katak Maromak iha feen atu nia bele iha oan. Maibé, Bíblia bolu Jesus nuʼudar “Maromak nia Oan” tanba Maromak mak kria Jesus, no Jesus iha hahalok hanesan nia Aman nian.
Karik Ita sei gosta
HANORIN IMPORTANTE SIRA HUSI BÍBLIA
Tanbasá mak Jesus mate?
Karik Ita rona ona katak nia mate atu kasu ita-nia sala. Maibé ema ida nia sakrifísiu bele duni lori benefísiu ba ema millaun ba millaun ka lae?
PERGUNTA KONA-BA BÍBLIA
Jesus nia oin no isin haree oinsá?
Bíblia hakerek buat neʼebé jerál kona-ba Jesus nia oin no isin.
