Pego ya New York Times ya re “motho yo o gogang motsoko o dira gore mothapi wa gagwe a latlhegelwe ke . . . $5 816 [R57 520] ka ngwaga go feta motho yo o sa gogeng.” Go ya ka tshedimosetso e e kgobokantsweng ke babatlisisi kwa Ohio State University, palogare ya madi a go fopholediwang gore a latlhegela mothapi a bakilwe ke nako e motho a iphang yone ya go goga, ditshenyegelo tse di kwa godimo tsa tlhokomelo ya kalafi le go sa tle tirong. Lebaka le lengwe e ne e le go se wetse tiro, mo go ka tswang go bakiwa ke diphelelo tse motho yo o tshwakgotsweng ke motsoko a nnang le tsone fa a sa goge.

“Baruti le badumedi ga ba dire se se tsamaisanang le se ba se buang mme seno se dira gore Kereke e se ka ya ikanngwa.”—Mopapa Francis.

Balaodi ba kwa Malaysia ba fitlhetse ditone di le 24 tsa dinaka tsa tlou tse di neng di tlisiwa ka bokukuntshwane mo nageng eno—dinaka tsa tlou di feta 1 000—di fitlhilwe mo merwalong e le mebedi ya logong lwa mahogany. Balwelatshireletsego ya tlhago ba re e ne e le la ntlha go gapiwa selekanyo se segolo jalo. Merwalo eno e ne e tswa kwa Togo mme e ya kwa China.

Go ya ka pego ya 2012 ya Mokgatlho wa Lefatshe Lotlhe wa Boitekanelo, diperesente di le 63 tsa dintsho di bakilwe ke malwetse a a tshelanwang, bogolo jang HIV/AIDS, malwetse a a amanang le letshololo, malaria, thiibi le malwetse a bana.

Metshameko ya go betšha e e mo difounong tsa di-smartphone le didirisiwa tse dingwe e setse e ratiwa thata ke bana. E mengwe e tshwana le metshameko ya mmatota ya casino mme yone e motlhofo go e fenya. Pego nngwe ya puso e tlhagisa gore metshameko e e ntseng jalo e ka dira gore bana ba tseye gore go betšha go siame fela “mme e ka dira gore fa ba gola ba tshwakgolwe ke go betšha.”