INew York Times ithi: “Umqeshi ulahlekelwa . . . yi-R57 520 ngonyaka ngenxa yomqeshwa otshayayo xa kuthelekiswa nomqeshwa ongatshayiyo.” Abaphandi beYunivesithi yaseOhio bathi, le lahleko ibangelwa kukumane bephuma besiya kutshaya, iindleko zezonyango, nokungayi emsebenzini. Esinye isizathu kukwehla kwengeniso, ekusenokwenzeka ukuba kubangelwa kukungakwazi ukusebenza kakuhle kuba bezama ukwahlukana nomkhwa wokutshaya.

“Abefundisi kunye namanye amakholwa bathetha le, benze leya, nto leyo ebangela ukuba iCawa ingathenjwa.”—UPopu Francis.

Abasemagunyeni baseMalaysia babhaqe iimpondo zendlovu ezingaphezu kwe-1 000, ezinobunzima obuziitoni eziyi-24. Ziye zathutyeleziswa ngondlela-mnyama kwelo lizwe, zifihlwe kwizibonda zomthi ezibini. Abantu abalwela ukhuseleko lwendalo bathi yayikokokuqala ngqa ukuba kubhaqwe iimpondo zendlovu ezininzi ngolo hlobo. Zazisuka eTogo zisingise eTshayina.

IWorld Health Organization ngo-2012 ikhuphe ingxelo yokuba, i-63 pesenti yabantu abafayo kweli ibulawa zizifo ezosulelayo, ingakumbi iHIV/AIDS, isifo sotyatyazo, imalariya, iTB, nezifo zabantwana.

Iya ixhaphaka into yokubona abantwana beqolozele efowunini nakwamanye amajelo e-elektroniki, bedlala imidlalo yokungcakaza. Eminye yale midlalo ide ibe ngathi yeyokoqobo, kodwa nje umahluko kukuba kuyo kulula ukuphumelela. Ingxelo yaseburhulumenteni ilumkisa ngelithi le midlalo isenokwenza ukungcakaza kubonakale kuyinto eyamkelekileyo ebantwaneni, “nto leyo esenokubangela ukuba babe nengxaki yokungcakaza xa bebadala.”