IFYO BAIBOLO ISAMBILISHA
Ukumfwana ne mipashi
Bushe calibipa ukulanshanya na bafwa?
“Mwilaya ku bomfwana ne mipashi . . . epali bamukowesha.”—Ubwina Lebi 19:31.
IFYO ABANTU BALANDA Abantu abengi balafwaya sana ukwishiba ukuti abantu babo abafwa tabalecula.
E ico balatendeka ukufwaya ukulanshanya nabo ukupitila mu bomfwana ne mipashi. Bamona kwati nga baya ku bomfwana ne mipashi e lyo bengeshiba ifyo abatemwikwa babo abafwa bali kabili ici kuti calenga baleka ukulasakamana.
IFYO BAIBOLO ISAMBILISHA Baibolo taipita na mu mbali ilyo ilanda pa kumfwana ne mipashi.
Ku ca mwenako, Yehova aebele abena Israele ukuti: “Ekasangwa muli imwe onse. . . uwipusha ku umfwana ne mipashi . . . uwipusha ku bafwa. Pantu onse uucita ifi fintu wa bunani kuli Yehova.” (Amalango 18:10-12) Na kabili Baibolo ilanda ukuti abomfwana ne mipashi “tabakengile mu bufumu bwa kwa Lesa.”—Abena Galatia 5:19-21.
Bushe abafwa kuti ba-afwa aba mweo?
“Aba mweo balishiba ukuti bakafwa; lelo abafwa, tabaishiba akantu nangu kamo.”—Lukala Milandu 9:5.
IFYO BAIBOLO ILANDA Abantu abengi batila umuntu nga afwa, alatwalilila ukuba uwa mweo ku cifulo cimbi.
E ico balesha ukumfwana na bafwa no kulabacitilako fimo pa kuti belabacusha.
IFYO BAIBOLO ILANDA Baibolo itila: “Aba mweo balishiba ukuti bakafwa; lelo abafwa, tabaishiba akantu nangu kamo . . .
Ukutemwa kwabo no kupata kwabo no bufuba bwabo [ifyo bakwete ilyo bashilafwa] bafwila kumo na fyo.” (Lukala Milandu 9:5, 6) Kanshi Baibolo isambilisha ukuti abafwa tabeshiba nangu cimo, tapaba ifyo batontonkanya, tabacita akantu nangu kamo e lyo te kuti bapepe na Lesa. Pa Amalumbo 115:17 patila: “Abafwa bena tabalumbanya [Lesa]; nangu bonse abatentemukila ukwatalala tondolo.”
Bushe limo abomfwana ne mipashi tabalanda ifya cine?
“Bushe umuntu epushisheko aba mweo ku bafwa?”—Esaya 8:19.
IFYO ABANTU BALANDA Abantu bamo batila abomfwana ne mipashi balasokolola ifyebo ifingeshiba fye umuntu wine uwafwile, balupwa wakwe nelyo ifibusa fyakwe.
IFYO BAIBOLO ILANDA Mu cipandwa 28 ice buuku lya 1 Samwele mwaba ilyashi ililanda pa fyo imfumu Shauli yapulile mwi funde lya kwa Lesa no kuya ipusha ku muntu uwaleumfwana ne mipashi.
Shauli aile mu kwipusha ku mwanakashi uwaleumfwana ne mipashi, uwatendeke ukucita kwati alelanda no mubomfi wa kwa Lesa Samwele uwafwile kale! Nomba bushe cine cine uyu umwanakashi alelanshanya na Samwele? Iyo! Icishinka ca kuti, uyu mwanakashi alelanda ne cibanda icalecita kwati ni Samwele.
Ici cibanda cali ni umo uwa bamalaika babifi icalebomfiwa na Satana “wishi wa bufi.” (Yohane 8:44) Mulandu nshi bamalaika babifi nelyo ifibanda fifwaila abantu ukusumina ukuti umuntu nga afwa alatwalilila ukubako ku cifulo cimbi? Fifwaya abantu ukusuula Icebo ca kwa Lesa Baibolo no kusumina ukuti ifyo Lesa alanda pa bafwa fya bufi.—2 Timote 3:16.
Nomba bushe ifi twalandapo fyalola mu kuti umuntu nga afwa ninshi calala capwa tatwakamumonepo na kabili? Awe nakalya! Baibolo yalaya ukuti ‘abalaala mu tulo,’ e kutila abafwa bakabuuka. * (Yohane 11:11-13; Imilimo 24:15) Nomba pali ino nshita ico tufwile ukwishiba ca kuti abafwa besu tabalecula iyo.
^ para. 16 Icipandwa 7 ica citabo icitila Bushe Cinshi Baibolo Isambilisha? cakwata umutwe utila “Isubilo Line Line ku Batemwikwa Benu Abafwa.”
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Satana Kuti Akwata Amaka pa Bantu?
Finshi Satana abomfya pa kulufya abantu kabili kuti mwacita shani pa kuti muicingilile?
LOLENI!
Cinshi Baibolo Isambilisha pa Mipashi Yabipa?
Nangu ca kuti abantu abengi balatwishika nga ca kuti imipashi yabipa e ko yaba, Baibolo yena ilanda ukuti e ko yaba. Cinshi amalembo yalanda pali ili lyashi, kabili mulandu nshi?
