“Yupela i no ken i go askim ol man i save toktok wantaim tewel bilong ol man i dai pinis . . . Sapos yupela i mekim olsem bai yupela i kamap doti tru long ai bilong mi.”—Wok Pris 19:31.

TOK OL MAN I MEKIM

Ol man i laik save olsem ol famili bilong ol i dai pinis i no karim pen na hevi. Olsem na ol i tok: “Yumi ken traim toktok wantaim ol long rot bilong wanpela spirit, o glasman. Ating dispela glasman i ken bekim ol askim bilong yumi na yumi ken i stap bel isi.”

TOK BAIBEL I MEKIM

Baibel i tokaut klia olsem ol man i no ken traim toktok wantaim ol man i dai pinis, em wanpela pasin planti man long bipo i save mekim. Olsem, Lo em God Jehova i givim long lain Israel i tok: “Yupela i no ken larim ol manmeri bilong yupela i mekim olkain pasin bilong glasman . . . Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.” (Lo 18:10-12) Baibel i tok tu olsem ol man i mekim wok bilong ol spirit nogut “ol i no inap kisim kingdom bilong God.” —Galesia 5:19-21.

“Ol man i gat laip. . . . Ol i save bai ol i dai. Tasol ol man i dai pinis, ol i no inap save long wanpela samting.”—Saveman 9:4, 5.

TOK OL MAN I MEKIM

Planti man i tok ol man i dai pinis i stap laip gen long narapela bodi. Olsem na ating ol i traim long toktok wantaim ol daiman bilong kisim save long sampela samting, o bilong amamasim ol bambai ol daiman i no ken nogutim ol.

TOK BAIBEL I MEKIM

“Ol man i gat laip . . . Ol i save bai ol i dai. Tasol ol man i dai pinis, ol i no inap save long wanpela samting . . . laik na kros na mangal bilong ol [em ol samting ol i save pilim taim ol i stap laip] i pinis olgeta.” (Saveman 9:4-6) Tru tumas, Baibel i tok ol man i dai pinis ol i no stap laip moa! Ol i no inap tingting, mekim wanpela samting, o lotuim God. Song 115:17 i tok: “Ol man i dai pinis i save go long ples bilong ol, na ol i no save litimapim nem bilong Bikpela.”

“Ol manmeri i dai pinis, ol i no inap givim tingting long ol manmeri i stap yet. Olsem na bilong wanem ol [manmeri] i save ran i go long ol manmeri i dai pinis long kisim tingting bilong ol?”—Aisaia 8:19.

TOK OL MAN I MEKIM

Sampela man i tok ol glasman inap tokaut long ol samting em daiman na ol famili na pren bilong em tasol i save long en.

TOK BAIBEL I MEKIM

Buk 1 Samuel sapta 28 i stori long hau bikhet King Sol i bin brukim lo bilong God long no ken toktok wantaim ol glasman. Em i go lukim wanpela glasmeri na tokim em long toktok wantaim Samuel em wanpela wokman bilong God husat i dai pinis! Tasol yu ting meri i bin toktok wantaim Samuel? Nogat! Em i toktok wantaim wanpela spirit nogut, husat i kisim nek bilong Samuel na i toktok.

Dispela spirit nogut em wokman bilong “papa bilong pasin giaman” em Satan. (Jon 8:44) Wai na ol spirit nogut i save kirapim ol man long ting olsem ol man i dai pinis i stap laip yet? Ol i mekim olsem bilong nogutim nem bilong God na daunim ol tok bilong Baibel.—2 Timoti 3:16.

Yu ting dispela i makim olsem i no gat gutpela samting bai painim ol man i dai pinis? Nogat tru! Baibel i tok promis olsem ol man i dai pinis i olsem ol i ‘slip’ long matmat, na bihain ol bai kirap bek. a (Jon 11:11-13; Aposel 24:15) Nau yumi kisim save olsem ol famili bilong yumi i dai pinis ol i no karim pen na hevi i stap.