Biapi deuh ah chiah dingmi thil hna kha rikhiak. Baibal nih “a biapi deuhmi thil hna kha hngalh i zuam u” tiah ruahnak a kan cheuh. (Filipi 1:10, NW) Zei hi dah a biapi, zei hi dah khulrang in tuah a herh, zei hi dah a biapi i khulrang in tuah a herh ti kha cazin tuah. Tahchunhnak ah, zanriah ca a herhmi va cawk cu a biapi ko nain zokzok in tuah a herhmi a si theng men lai lo. Kan duh tukmi TV program a rat ahcun zoh colh a hau men lai nain zoh hrimhrim a herhmi a si lo. *

A hlankan in i timchung. “Na hreitlung cu a hnawl i na tat lo ahcun tha tam deuh chuah na hau lai. A hlankan in rak i timhtuah hi a ṭha deuh.” (Phungchimtu 10:10) Zeidah kan cawn khawh? Hreitlung tat timi cu i timhtuah chung bantuk a si i a caan kha hmualngei bik in hman khawh awkah aan bawmh lai. A caan a ei i thazaang a lami, tuah a herh theng lomi thil hna kha cazin chungin chuah. Rian teima tein na ṭuan caah a caan a hleih ahcun um sawhsawh hlah. A hnuah tuah dingin naa timhmi rian kha atu ah ṭuan colh. Hreitlung aa tatciami, a fimmi rianṭuantu bantukin a hlankan in i timhchungnak nih rian tampi liim khawh awk le hlawhtlinnak hmuh awkah aan bawmh lai.

A herh lomi thil kha tuah hlah. A biapi lomi le a caan a eimi thil hna tuah an in sawm ahcun al thiam i zuam. Thil tam tuk na tuah ahcun na lungre a thei lai i naa nuam kho ti lai lo.

A caan thawn lengmangnak le lung i thleh khawh lonak. “Thlitu le nikhua an ṭhat tiang na ngan peng ko ahcun, thlaici zeihmanh na tuh bal lai lo i zeihmanh na zun bal pek fawn lai lo.” (Phungchimtu 11:4) Zeidah kan cawn khawh? A caan thawn lengmang timi cu a caan le rian liimnak a firmi mifir a si. Nikhua ṭhat a hngakmi lothlo nih cun zeitikhmanh ah thlaici a tuh lai lo i a zun lai lo. Cu bantukin a fiang lomi thil hna ruangah biakhiahnak tuah khawh loin kan um kho. Asiloah biakhiahnak tuah hlanah zeipaoh a tlamtlin dih a hau tiah kan ruah ca zongah a si kho. A biapimi biakhiahnak tuah khawh awkah ṭha tein hlathlai le ruah a hau ti cu a hmaan ko. Phungthlukbia 14:15 ah “mifim nih cun a lamh ding kha ṭha tein a zoh” tiah a ti. Asinain a taktak ahcun biakhiahnak tampi cu ṭha tein tuaktan le ruah hnu hmanhah a fiang lomi thil sining cheukhat ah tuahmi an si.​—Phungchimtu 11:6.

A tlingmi si duhnak. “Cunglei in [asiloah Pathian sinin] a rami fimnak cu . . . dai te le nem tein a um,” tiah Jeim 3:​17 nih a ti. A ṭha bikmi si duhnak lungput cu thangṭhat awk a tlakmi a si. Asinain a caan ah i ruahchanmi le hmuhmi aa khah lo tikah kan lung a dong kho. Tahchunhnak ah, holh thar a cawngmi pakhat nih ka palh lai lo tiah aa ruahchan awk a si lo. A palhnak tu in a cawn awk a si. Tlinnak aa ruahchanmi nih cun palh ding kha a duh lo caah a chim ti lai lo. Mah bantuk lungput nih a ṭhanchonak kha a donh khawh. Kan tuah khawhmi zat lawng i ruahchannak cu a ṭha. Phungthlukbia 11:2 ah “toidorte i um [cu fim a si, NW] a ṭha deuh” tiah a ti. Aa toidor i tuah khawhmi zatte ah aa lungsimi cu lungdaihnak le nuamhnak a hmu lai.

Rian le hrimhnak ah a tlarimi si. “Tlawmte lawng hmanh ngeih ko i lung dai tein um khi kut a pahnih hnih in rian ṭuan zungzal ko i thlitu tlaih i zuamnak nak cun a ṭha deuh.” (Phungchimtu 4:6) Rian lawng a ṭuan pengmi cu an ṭuan tlukin ṭhatnak an hmu lo. A caan le thazaang an ngei lo. A tha a thumi zong zei rian hmanh an ṭuan lo caah a caan kha an sawksam. Baibal nih a tlarimi si awkah tha a kan pek. Cucaah rian fakpi in i zuam law dinhnak caan zong kawl. A tlarimi si i zuam. Cutin na tuah ruangah na hmuhmi lawmhnak cu ‘Pathian laksawng’ a si.​—Phungchimtu 5:​19.

Mitku vuai tein it. Salm caṭialtu pa nih “hnangam tein ka it lai i kaa hngilh fawn lai” tiah a ti. (Salm 4:8) A cuza cangmi mi pakhat cu pumsalei, thinlunglei le thluaklei ah hliphlau tein a um khawh nakhnga suimilam pariat hrawng a ih a hau. Ih cu a caan man ngei tein hman a si. Zeicahtiah mah nih thluaklei le cawn khawhnak lei kha a ṭhanter caah a si. Mitku vuai lonak nih cawn khawhnak a zorter, ruahlopi in i khawndennak, palhnak le thinhunnak hna a chuahter khawh.

Na phak khawhmi hmuitinh chia. “Ngeihmi chungah lungawi tein um hi ngeih chin lengmang duhnak nakin a ṭha deuh.” (Phungchimtu 6:9) Mah cu zei sullam dah a si? A fimmi nih cun a si kho lomi, aa tlak lomi duhnak le timhnak hna a ngei lai lo. Fakthanh le leiba in cawk awkah lemnak hna kha aa teiter lai lo. Mah canah a tuah khawhmi lawng tuah awk le a ngeihmi ah lungsi hnangam awkah a cawn lai.

Na chiahmi phunglam kha ṭha tein ruat. Zeidah a ṭha, zeidah a ṭhalo, zeidah a biapi i zeidah tuah awk a si ti kha na chiahmi phunglam hna in ṭha tein tuaktan. Nunnak cu thal a si ahcun na phunglam nih hmuitinh khen awkah aan bawmh lai. Cucaah a ṭhami phunglam nih na nunnak ah a biapi deuhmi thil kha pakhatnak ah chiah awk, na caan kha fimkhur tein hman awkah aan bawmh lai. Mah a ṭhami phunglam cu khoika ah dah na hmuh khawh lai? Mi tampi nih Baibal ah an kawl. Baibal ah a ṭhami phunglam hna a um.​—Phungthlukbia 2:6, 7.

Dawtnak kha phunglam ṭha bik ah ser. “Dawtnak cu zeizong vialte i rem ṭhipṭhep tein a funtomtu a si tiah” Kolose 3:​14 nih a ti. Dawtnak i tel loin cun a hmaanmi lawmhnak le thinlunglei himnak kan hmu kho lai lo, a hleiin chungkhar ah a si. Dawtnak man a ngeihzia a theithiam lomi hna cu tangka le rian lawng kha pakhatnak ah an chiah i a donghnak ah an i nuamhnak a tlau tawn. Baibal ah dawtnak kong a za lengin a um i dawtnak cu a ṭha bikmi phunglam in a langhter.​—1 Korin 13:​1-3; 1 Johan 4:​8.

Thlaraulei caah a caan pe. Geoff cu duh a nungmi nupi, fa pahnih a ngeih lengah a ṭha tukmi rian le hawikom tampi zong a ngei. A rian cu siilei he aa tlaimi a si caah a hmaiah mi an thihmi kha atu le atu a hmuh. Cucaah “minung nunnak hi hitin maw a si ko lai?” tiah biahalnak a tuah. Voikhat cu Jehovah Tehte Hna chuahmi cauk a rel i a phi a hmuh caah a lung a suk tuk.

Geoff nih a relmi kong kha a nupi le a fale kha a chimh hna i anmah zong nih hngalh an duh ve. Cucaah an chungkhar ningin Baibal kha an hun cawng. Mah tikah a caan kha fimkhur tein an hun hman thiam deuh i aa nuammi chungkhar an hung si. Sifah harnak a um lomi vawlei ah zungzal in kan nung lai timi a ṭha tukmi ruahchannak zong an hun ngei.​—Biathlam 21:​3, 4.

Geoff hmuhtonnak nih “thlarau ah michambau kan si ti aa hngalmi cu lunglawmmi nan va si dah” timi Jesuh bia kha a kan hngalhter ṭhan. (Matthai 5:3) Pathian kong hngalh awkah a caan tlawmpal tal na pe kho lai maw? Cutin na tuah ahcun chikkhat ca lawng si loin na nunchung dihlak caah a caan fimkhur tein na hmanmi a si.