Ka me liu. E vakarota na iVolatabu: “Moni vakadeitaka . . . na veika era bibi sara.” (Filipai 1:10) O rawa ni vola na veika e bibi kei na kena e vakatotolotaki. Kena ivakaraitaki, e bibi na samaki ni lomanibai, ia e sega ni vakatotolotaki. De dua o nanuma mo sarava ena kena gauna na porokaramu ni tivi o dau taleitaka, ke o sarava se sega qori e sega ni bibi. *

Lalawa. E tukuna na Dauvunau 10:10: “Ke sa mucu na matau, ka sa sega ni solota [“vagatara,” NW] na batina ko koya, ke sa qai tavaka vakaukauwa: ia sa yaga na vuku e na lewa.” Na cava eda vulica eke? Ke mucu na matau ena maumau wale na igu, ena sega tale ga ni vinaka na cakacaka. O na rawa gona ni vakayagataka vinaka nomu gauna ke o lalawataka na ka mo cakava. Kua ni cakava eso na ka e sega ni yaga, e vakaoti gauna, e veivakaocai ga. Ke sa oti totolo na cakacaka o tuvanaka mo cakava, vakacava mo tekivu ena kena o tuvanaka tu me na caka ena dua tale na gauna? Ena levu sara na ka o rawa ni cakava ke o dau lalawa me vakataki koya na turaga vuku dau cakacaka e vagatara na nona matau ni bera ni vakayagataka.

Bula rawarawa. Saga mo vulica mo kua ni oga ena veika e sega ni bibi se vakaoti gauna. Ni sivia tale na cakacaka kei na so tale na ka o ogaoga kina e rawa ni vakavuna na nuiqawaqawa kei na rarawa.

Lokuyara kei na lomalomarua. “Ko koya sa nanuma na cagi ena sega ni kaburaka na sila; kei koya sa vakaraica na o ena sega ni tamusuka.” (Dauvunau 11:4) Na cava eda vulica eke? Na lokuyara e vakalusi gauna qai sega ni rawati kina e dua na ka. Sa na sega tu ga ni kakaburaki se tatamusuki na dauteitei e waraka tiko me vinaka na draki. Na dredre tale ga ni bula eda na lomalomarua kina ni vakatulewataka na ka meda cakava. De dua eda nanuma meda kila na itukutuku matailalai kece meda qai vakatulewa. Io, meda vakasama sara vakavinaka da qai kerea na nodra veivuke eso tale ena so na ka bibi meda vakatulewa kina. E tukuna na Vosa Vakaibalebale 14:15 “na tamata yalomatua sa daulewa vakavinaka na nonai lakolako.” Ia na kena dina, e levu na vakatulewa eda dau lomalomaruataka.​—Dauvunau 11:6.

Namaka vakasivia na ka. “Na vuku mai cake [se vuku vakalou] . . . me yalorawarawa,” e tukuna na Jemesa 3:17. E totoka nida saga meda cakava vinaka e dua na ka! Ia ena so na gauna ni sega ni yaco na ka eda vinakata e vakavuna na yalolailai kei na rarawa. Kena ivakaraitaki, ni dua e vulica e dua na vosa vou me namaka ni na cala eso na vosa e cavuta, qori ena vuli tale ga kina. Ia o koya e namaka vakasivia na ka ena rere ni vosa de na cala na ka e tukuna​—qori ena vakaberaberataka nona vosataka na vosa vou e vulica tiko. E vinaka meda yalomalumalumu da qai kua ni namaka vakasivia na ka! Na Vosa Vakaibalebale 11:2 e kaya ni “tu vei ira na yalomalumalumu na vuku.” O koya e yalomalumalumu ena sega ni taura tu ga vakabibi na ka kece, ena so na gauna ena dredrevaka mada ga eso na ka e cakava.

Veiraurau na cakacaka kei na vakacegu. “Sa vinaka ni tawa tu e dua bau na liga ni sa tu vata kei na vakacegu, ka ca ni sa tawa tu na liga ruarua ka tu vata kei na oca kei na yalorarawa.” (Dauvunau 4:6) O ira era bobula ena cakacaka e ‘tawa tu na ligadra ruarua’ ena oca kei na rarawa. Sa sega na gauna mera vakacegu kina. Ia o ira na vucesa, e ‘tawa tu na ligadra ruarua’ na vakacegu ra qai vakaoti gauna. E uqeti keda gona na iVolatabu me veiraurau na ka eda cakava: Meda cakacaka vakaukaua, me tiko tale ga na gauna meda marautaka na vua ni noda cakacaka. Qori “nai solisoli ni Kalou.”​—Dauvunau 5:19.

Moce vinaka. E dua na dauvola iVolatabu e kaya, “au na davo no e na vakacegu, ka moce talega.” (Same 4:8) Ke ra dau moce e levu na uabula me walu na aua era na bulabula, vinaka na ivakarau ni yalodra kei na ivakarau ni nodra vakasama. Na moce e dua na sala e vakayagataki vinaka kina na gauna ni na dei na vakasama, qai nanumi vinaka na ka e vulici. Ni lailai na moce e vakavuna na cudrucudru, yaco na vakacalaka, levu na cala, e berabera tale ga me kilai na ka e vulici.

iSausau o rawa ni sauva. “Sa vinaka ni sa rai na matada ka ca ni sa lako sese na lomada.” (Dauvunau 6:9) Na cava na kena ibalebale? Ena sega ni vakalaiva na nona gagadre na tamata vuku me lewai koya, vakabibi na gagadre e sega na betena se sega ni veivakacegui. Ena sega gona ni rawai na tamata vuku ena kacivaki ivoli e qaseqasetaki se na volivoli vakadinau. Ia e lomavakacegu ga ena ka e rawa ni volia​—e ‘raica na matana.’

Dikeva nomu itovo. Na itovo o mareqeta o na kila kina na ka e vinaka, bibi, e yaga tale ga. O na kila tale ga na ka mo cakava ena nomu bula. Ena vukei iko na itovo vinaka ena ka mo vakaliuca qai vakayagataka vinaka sara na nomu gauna e veisiga. O na vulica e vei na itovo qori? E levu era rai ena iVolatabu ni tu kina na vuku e cecere duadua.​—Vosa Vakaibalebale 2:6, 7.

Vulica mo dauloloma. E kaya na Kolosa 3:14, na loloma e “ivau vinaka duadua ni duavata.” Ke sega na loloma eda na sega ni marau se lomavakacegu, vakabibi ena vuvale. O ira era sega ni dauloloma era na rairai vakaliuca na qarai ni iyau se cakacaka, era na sega ni marau. Io, e vakabibitaki ena iVolatabu na loloma, ni cavuti sara ga vakadrau vakacaca.​—1 Korinica 13:1-3; 1 Joni 4:8.

Vakayagataka nomu gauna ena veika vakayalo. O Geoff e vakawati, e rua na luvena, era tu na nona itokani vinaka, qai vuniwai veivuke, na cakacaka e taleitaka. Ia ena gauna e cakacaka voli kina e dau raica vakalevu na rarawa kei na mate. E mani taroga, “Qo na inaki ni bula?” Ena dua na siga a wilika eso na ivola vakaivolatabu e tabaka na iVakadinadina i Jiova qai kunea kina eso na isaunitaro e veivakacegui.

E vakamacalataka sara o Geoff na veika e wilika vei ratou na nona veitinani, eratou taleitaka tale ga. Tekivu me ratou vulica vakavuvale na iVolatabu, e vukei ratou qori ena vakayagataki vakavuku ni nodratou gauna. Na nodratou vulica na iVolatabu e rawa tale ga ni ratou nuitaka kina na bula tawamudu ena vuravura sa na taucoko kina na bula qai sega na rarawa.​—Vakatakila 21:3, 4.

Na ka e yaco qori vei Geoff eda vakasamataka kina na vosa i Jisu Karisito e kaya: “Era marau o ira na kila nira gadreva na Kalou.” (Maciu 5:3) O na tu vakarau mo vakatikitikitaka e dua na gauna mo vulica kina na veika me baleta na Kalou? Qori ga na ka ena vakavukui iko mo vakayagataka vinaka na nomu bula ena gauna qo, kei na veigauna se bera mai.