Faatulaga mea e tāua: Ua fautua mai le Tusi Paia: “Ia outou faamautinoa o mea e sili ona tāua.” (Filipi 1:10) Ia fai se lisi o mea e sili ona tāua ma manaʻomia vave. Ia manatua, o nisi o mea e tāua atonu e lē o manaʻomia vave, e pei o le faatauina o se meaʻai mo le afiafi. E lē gata i lea, atonu foʻi o nisi mea e foliga mai e manaʻomia vave, ae e lē tāua tele, e pei o le tuliloaina o le taimi e amata ai se polokalame o le TV e te fiafia i ai. *

Fuafua mamao. Ua faapea mai le Failauga 10:10: “Afai e matatupa se toʻi ma e leʻi faamaʻaia e se tasi le mata, e ao ona ia faaaogā lona malosi atoa. O le faaaogā tatau o le atamai e maua ai iʻuga lelei.” O le ā le uiga o lenā manatu? O lona uiga, e pei le faamaʻaiina o lau toʻi o lou fuafua mamao e faaaogā tatau lou taimi. Ia aveese pe faamulimuli nisi o mea e lē tāua tele, lea e alu uma ai le taimi ma le malosi. Pe a vave māeʻa nisi au galuega, ia vave ona galue e faia isi mea o loo sosoo ane i lau lisi. O lou fuafua mamao, e mafai ai ona e faia le tele o mea, e pei lava o se tagata galue atamai e na te faamaʻai lana toʻi.

Faafaigofie lou olaga. Ia ʻalofia mea e lē tāua e alu uma ai lou taimi. O le tele naʻuā o mea e fai, e iʻu ai i le popole ma e lē maua ai se fiafia.

Faifaiaga ma le lē mautonu. “O lē e matamata i le matagi e lē lūlū fatu o ia; o lē foʻi e vaavaai i ao e lē selesele lava o ia.” (Failauga 11:4) O le ā le lesona? O le faifaiga e maʻimau ai le taimi, ma e lē uma ai ona faia se mea. O se faifaatoʻaga e faatalitali seʻia lelei le tau, e iʻu ina lē lūlū ma e lē selesele foʻi. I se tulaga taitutusa, o popolega o le olaga e iʻu ai i lo tatou lē mautonu i le mea e tatau ona fai. Atonu foʻi e tatou te faatalitali seʻi maua uma mai faamatalaga e manaʻomia, ona faatoʻā fai lea o sa tatou faaiʻuga i se mataupu. E moni e tāua le faaalu o le taimi ma faia ni saʻiliʻiliga ina ia faia ai se faaiʻuga, auā o loo faapea mai le Faataoto 14:15: “O le tagata e iai le utaga mamao, e na te iloilo lelei ona laasaga.” Peitaʻi o le mea moni, o le tele o faaiʻuga ua faia, na faia lava e aunoa ma le maua uma mai o faamatalaga sa manaʻomia.​—Failauga 11:6.

Manaʻo e lelei atoatoa mea uma. Ua faapea mai le Iakopo 3:17: ʻO le atamai mai i lugā e magafagafa.’ E moni e tāua le faia o se mea ia lelei, peitaʻi o nisi taimi e tatou te lē taulau pe a tatou mananaʻo ia lelei atoatoa mea uma e tatou te faia. O se faataʻitaʻiga, o se tagata e aʻoaʻoina se gagana fou, e tatau ona ia faatalitalia o le a ia faia le tele o mea sesē, ma aʻoaʻoina mai ai ni lesona. Peitaʻi, o sē e manaʻo e lelei atoatoa mea uma e na te faia, e musu e faia se mea sesē ma o le a tuai ai foʻi ona ia aʻoaʻoina le gagana. O lea la, e tāua tele ona tatou lotomaulalo! Ua faapea mai le Faataoto 11:2: “E iai le atamai i ē e faamaulalo.” E sili atu i lenā, o se tagata e lotomaulalo ma faamaulalo, e na te lē soona faatāua naʻuā lona tulaga.

Ia paleni galuega ma mālōlōga. “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” (Failauga 4:6) O tagata e galulue faasoloatoa, e tele ina lē maua se taimi ma se malosi e olioli ai i fua o “luuga e lua” o a latou galuega mamafa. A o ē paiē, e mananaʻo i “luuga e lua” o le mālōlō, ma e latou te faamaʻimau le taimi. O loo faalaeiauina i tatou e le Tusi Paia ina ia paleni: Ia galue mamafa ma ia olioli i fua o a tatou galuega. O lenā olioli o se “meaalofa lea mai i le Atua.”​—Failauga 5:19.

Ia lava lau moe. Na tusi se tusitala o le Tusi Paia: “Ou te taoto ma ou moe ma le filemu.” (Salamo 4:8) O le toʻatele o tagata e manaʻomia ona valu itula e momoe ai i le pō ina ia maua le malosi o le tino, faalogona, ma le mafaufau. E alu aogā lo tatou taimi pe a tatou momoe, auā e fesoasoani ai i o tatou mafaufau i le manatuaina o mea ma le auala e tatou te uaʻi atu ai i mea. Peitaʻi, o le lē lava o le moe e tuai ai lo tatou aʻoaʻoina o mea, iʻu atu ai i faalavelave faafuaseʻi, faia o mea sesē, ma le itaitagofie.

ʻAlofia le faanaunau i mea e lē mafai ona maua. “E sili ona vaai i ai mata nai lo o le manaʻonaʻo o le loto.” (Failauga 6:9) O le manatu tāua, o se tagata atamai, e na te lē faatagaina ona faanaunauga e pulea ai lona olaga, aemaise lava ni faanaunauga e na te iloa e lē mafai ona faataunuu. O lea, e lē faasesēina gofie o ia i faasalalauga po o tupe faaaitalafu e vave ona maua. Nai lo lea, e lotomalie o ia i mea ua ia maua ma o loo ʻvaai i ai ona mata.’

Iloilo mea o loo e faatāua: O mea e te faatāuaina e fesoasoani iā te oe e iloa ai le mea e lelei ma e umi ona aogā. E tai pei lou olaga o se aū, ma o mea e te faatāua e fesoasoani iā te oe ina ia saʻo ai le fagaina atu o lenā aū i le mea o loo e manaʻo e agaʻi i ai. O lea la, o mea e te faatāua e fesoasoani iā te oe e faatulaga ai mea e sili ona aogā i le olaga, ma mafai ai ona faaaogā tatau sekone uma o lou olaga. E faapefea ona e iloa mea e tatau ona faatāua? E toʻatele ua saʻili atu i le Tusi Paia, auā ua latou iloa o loo iai le atamai aogā.​—Faataoto 2:6, 7.

Ia avea le alofa o se mea e sili ona tāua iā te oe. Ua taʻua i le Kolose 3:14, o le alofa “o le fusi lea e atoatoa ona autasi ai.” E lē mafai ona tatou fiafia ma iai ni faalogona lelei pe a tatou lē alolofa, aemaise lava i o tatou aiga. O tagata e lē amanaʻiaina lenā mea ma e faamuamua le saʻilia o ʻoa ma se galuega lelei, e lē fiafia o latou olaga. E lētioa la a faatāua i le Tusi Paia le uiga o le alofa, ma taʻua ai i le faitau selau o taimi.​—1 Korinito 13:1-3; 1 Ioane 4:8.

Ia faaavanoa se taimi mo ou manaʻoga faaleagaga. O Geoff o se tamā e toʻalua lana fanau, e alofa lana avā, e iai ni ana uō lelei, ma e lelei foʻi lana galuega o se tausimaʻi. Peitaʻi, o le tele o taimi i lana galuega sa ia vaaia ai tagata o mafatia ma maliliu. O lea na ia fesili ai: “Po o le tulaga lea e tatau ona iai le olaga?” I se tasi aso, na faitau ai o ia i nisi o lomiga faale-Tusi Paia a Molimau a Ieova, ma maua ai le tali o lana fesili.

Na faamatala atu e Geoff i lona aiga mea na ia aʻoaʻoina ma na fiafia i ai lona aiga. O i inā na amata ai ona faia sa latou suʻesuʻega faale-Tusi Paia, lea ua latou maua ai se olaga fiafia ma ua faaaogā tatau ai lo latou taimi. O le suʻesuʻeina o le Tusi Paia, ua latou maua ai se faamoemoe matagofie o le ola e faavavau i le lumanaʻi e aunoa ma ni mafatiaga, ma maua ai se olaga aogā.​—Faaaliga 21:3, 4.

O le tala iā Geoff ua moni ai le fetalaiga a Iesu Keriso: “E fiafia o ē e naunau i mea faaleagaga.” (Mataio 5:3) Po o e lotomalie e faaavanoa sou taimi e faamalie ai ou manaʻoga faaleagaga? O le mea mautinoa, e pau lea o le auala e te maua ai le atamai aogā, ma faaaogā tatau ai lou olaga atoa.