Phi obo re ma ghanre phiyọ ẹdia rẹsosuọ. Baibol na vuẹ avwanre nẹ e, “vughe obo ri yovwiri.” (Filipae 1:10) Muegbe rẹ erọnvwọn ru wọ guọnọ ru re pha ghanghanre yẹrẹ re guọnọ okpakpa, o muẹro nẹ erọnvwọn re pha ghanghanre, kerẹ udje a vwọ dẹ emuọre ra cha re vwẹ ovwọnvwọn ghwa dia emu rẹ okpakpa-a. Orọnvwọn re ji se ni kerẹ emu rẹ okpakpa, kerẹ a vwọ mrẹ ọtonphiyọ rẹ ughe ro me je avwanre vwẹ TV, sa dia obo re ghwa ghanre-e. *

Jiroro phiyotọ. Aghwoghwo 10:10 tare nẹ, “Utehru da epha moromoro ra nọrọ-ọ, ẹgba ọgangan kọye e vwo ruiruo; ẹkẹvuọvo aghwanre kọye nẹrhẹ ohwo kparobọ.” Die yen ẹkpo nana yono avwanre? Nabọ nọ utehru wẹn, womarẹ wọ vwọ jiroro rẹ obo wo che ru phiyotọ rọ sa nẹrhẹ wọ reyọ ọke wẹn vwo ruiruo vọnvọn. Si erọnvwọn re ghwa ghanre-e re cha de ghwọrọ ọke vẹ ẹgba wẹn kufia vwo nẹ ọrhuẹrẹphiyotọ wẹn. Wọ da mrẹvughe nẹ wo vwo ọke kidie nẹ wọ fobọ ruiruo ri rhe we obọ re, diesorọ wo vwo jẹ iruo ru wọ rhuẹrẹ phiyọ ọke ọfa eruo? Wọ da nabọ jiroro phiyotọ, ku wo che ruiruo vrẹ obo ri jovwo, kerẹ ọwiowian ro vwo aghwanre rọ nọ utehru rọyen.

Ru akpeyeren wẹn lọhọ. Yono obo ra sen erọnvwọn re ghwa ghanre-e re cha de ghwọrọ ọke wẹn kufia. Irueru vẹ ọke re bru phiyotọ vwọ kẹ erọnvwọn re pha buebun sa nẹrhẹ oma bru avwanre ku ji mie avwanre aghọghọ.

Re vwo gbeghẹrẹ ji vwo ẹwẹn ivivẹ. “Ohwo rọ rhẹrẹ odju sa kọ-ọn; kugbe ohwo ro nẹ aruọke se vuẹ-ẹ.” (Aghwoghwo 11:4) Die yen ẹkpo na yono avwanre? Re vwo gbeghẹrẹ cho ọke vẹ iruo re ruẹ. Ọghwẹrẹ ro nẹ aruọke cha sa kọn yẹrẹ vun ekankọ-ọn. Ọtiọyen ọ je hepha, avwanre sa vwẹ uphẹn kẹ ekuakua akpeyeren ri fiemu-u re da nẹrhẹ avwanre vwo ẹwẹn ivivẹ. Yẹrẹ avwanre se roro nẹ a sa hẹrhẹ te ọke re vwo vwo evuẹ ra sa vwẹroso eje tavwen e ki brorhiẹn. Vwọrẹ uyota, orhiẹn-ebro eghanghanre ghene guọnọ ehiahiẹ vẹ erorokodo. Isẹ 14:15 tare nẹ, “Ohwo ro vwo iroro obo rọ ra ọye o nẹ.” Ẹkẹvuọvo, uyota na yen, orhiẹn-ebro buebun churobọ si erọnvwọn ri fiemu-u.—Aghwoghwo 11:6.

Ohwo ro rhẹro rẹ ogbagba ọkieje. Jems 3:17 tare nẹ, “Ẹkẹvuọvo aghwanre ro nẹ obenu [yẹrẹ obọ rẹ Ọghẹnẹ] rhe ka dia . . . dẹndẹn.” Vwọrẹ uyota, e vwo rhẹro rẹ erhuvwu fo obo re jiri dẹn! Ọkiọvo, avwanre da vwẹ ẹro ri gegerege vwo nẹ erọnvwọn ọ sa so ofudjevwe. Kerẹ udje, ofori ohwo ro yono ejajẹ ọfa vwo rhẹro rọyen nẹ ọyen cha ta chọ, o ji che yono norhe. Ẹkẹvuọvo, oma cha vwerhen ohwo ro rhẹro rẹ ogbagba ọkieje siẹrẹ ọ da jẹ ejajẹ na chọ-ọ, uruemu nana sa nẹrhẹ ẹyan-obaro rọyen siuko. Ọyena yen sorọ avwanre vwo vwo ẹro abavo kpahen obo re rhẹro rọyen. Isẹ 11:2 tare nẹ, “Omaevwokpotọ ọ vẹ aghwanre gba yan.” Ẹkẹvuọvo, ihwo re vwomakpotọ nẹ akpọ gegerege-e, ukperẹ ọtiọyen ayen yeren akpọ ri ghwologhwolo.

Ẹro abavo kpahen iruo vẹ ehẹha. “Oyovwi kẹ obọ ọvo rọ vọnre vẹ ufuoma nọ abọ ivẹ rọ vọnre vẹ owian vẹ odju re nene họnra.” (Aghwoghwo 4:6) Egbowian rẹ oma rhọ-ọ riavwerhen rẹ “abọ ivẹ rọ vọnre vẹ owian” rẹ ayen rure-e kidie ayen rhe vwo ọke yẹrẹ ẹgba vuọvo-o. Ẹkẹvuọvo, ọvwiẹrẹ rẹ ohwo mu “abọ ivẹ” phiyotọ ọ me je ghwọrọ ọke rọyen kufia. Baibol na jiriro nẹ a vwẹ ẹro abavo vwo ni owian a me je riavwerhen rẹ erere ro no cha. Avwerhen tiọyena ọyen “okẹ rẹ Ọghẹnẹ.”—Aghwoghwo 5:19.

Nabọ vwerhẹn. Ohwo ọvo usun rẹ ihwo ri si Baibol na tare nẹ, “Mi sherhẹ vwerhẹ vwẹ ufuoma.” (Une Rẹ Ejiro 4:8) Ofori nẹ imiragua vwerhẹn te omarẹ inọke ẹrenren vwẹ ason rere ayen se vwo vwo omakpokpọ vẹ iroro ro fiotọ. Ovwerhẹn ọyen omamọ rẹ idjerhe ra vwọ reyọ ọke vwo ruiruo kidie ọ chọn ohwo uko vwo mu ẹwẹn kpahen emu, o ji toroba ẹgba re vwo yono emu. Siẹrẹ ohwo rha nabọ vwerhẹ-ẹn, ọ cha nẹrhẹ ọ bẹn o vwo vwo ẹruọ rẹ obo re yono, ọ sa so omaẹkuọn kẹ, o se ru erọnvwọn chọ je nẹrhẹ ophu fobọ muo.

Vwo oboravwọtua wọ sa yanmu. “Orẹmrẹ rẹ ẹro yovwi nọ iroro ro titighi.” (Aghwoghwo 6:9) Ọrhọ yen ẹkpo na? Ọvwaghwanre ohwo vwẹ uphẹn kẹ ojevwe ghevweghe nẹ o sun akpeyeren rọye-en, ma rho ọ da dianẹ o che se ru obo ri je na-a. Ọtiọyena, ọ vwẹ uphẹn kẹ erọnvwọn re titẹ mamọ nẹ i mu ẹwẹn rọyen reyọ-ọ, ukperẹ ọtiọyen o vwo ẹwẹn rẹ otekẹvwẹ kpahen obo ro vwori, kọyen “orẹmrẹ rẹ ẹro [rọyen].”

Roro kpahen iwan wẹn. Iwan wẹn chọn wẹ uko vwọ riẹn obo ri yoma, obo re ghanre kugbe obo ro fori nẹ e roro kpahen. Akpeyeren wẹn da dia edada, kọyen iwan wẹn cha tẹnrovi edada na. Ọtiọyena, omamọ rẹ iwan chọn ohwo uko vwọ riẹn obo ri yovwirin ra vwọtua vwẹ akpeyeren, je vwọ riẹn idjerhe ro me yovwin ra vwọ vwẹ ọke vwo ruiruo nọke ra ruọke yẹrẹ kẹdẹ kẹdẹ. Tivọ yen wọ da sa mrẹ iwan tiọyena? Baibol na yen ihwo buebun da mrẹ iwan tiọyena, kidie ayen vwo oniso rẹ aghwanre rọhẹ evun rọyen.—Isẹ 2:6, 7. 

Jẹ ẹguọnọ dia uwan wẹn rọ ma kenu. Ẹguọnọ yen “ufi ro churu ihwo kugbe,” ọtiọyen Kọlose 3:14 tare. Avwanre rhe vwo ẹguọnọ-ọ, e che se vwo omavwerhovwẹn yẹrẹ iroro abavo-o, ma rho vwevunrẹ orua. Ihwo re kpairoro vrẹ uyota nana, re da vwọtua efe yẹrẹ ẹbe eyono ride, che se vwo omavwerhovwẹ-ẹn. O vwo oboresorọ rẹ Baibol na vwọ kanrunumu ẹguọnọ kerẹ uwan rọ ma kenu, ro vwo djunute abọ buebun.—1 Kọrẹnt 13:1-3; 1 Jọn 4:8.

Rhuẹrẹ ọke phiyotọ wọ vwọ riẹn Ọghẹnẹ. Ọshare ọvo rẹ se Geoff vwo omamọ rẹ aye, emọ ivẹ rẹ oma vwerhan, omamọ rẹ igbeyan kugbe omamọ rẹ iruo rọ vwọ vwẹrote ihwo re muọga yẹrẹ kuoma tavwen e ki mu ayen kpo họsipito. Dedena, iruo rọyen nẹrhẹ ọ mrẹ ihwo re rioja ji ghwẹ ọkieje. Ọ da nọ “Enẹ ofori nẹ akpeyeren dia?” Ẹdẹ ọvo o de se ẹbe evo rẹ Iseri ri Jihova teyenphia ọ da mrẹ ẹkpahọnphiyọ vwọ kẹ enọ rọyen.

Geoff de dje obo ro yono na fiotọ vwọ kẹ aye vẹ emọ rọyen, ayen de vwo omavwerhovwẹn kpahọn. Orua na da ton uyono ri Baibol phiyọ rọ chọn ayen uko vwẹ akpeyeren rayen rọ nẹrhẹ ayen sa vwẹ aghwanre vwọ rhuẹrẹ ọke rayen phiyọ. Uyono ri Baibol na je nẹrhẹ ayen vwo iphiẹrophiyọ rẹ arhọ ri bẹdẹ vwẹ akpọ rọ vrabọ rẹ oja vẹ ughwu.—Ẹvwọphia 21:3, 4.

Oborẹ Geoff rhiẹromrẹ na nẹrhẹ avwanre karophiyọ eta ri Jesu Kristi, rọ vwọ ta: “Omavwerhovwẹn dia kẹ ihwo ri vwo ọdavwẹ rẹ Ota rẹ Ọghẹne.” (Matiu 5:3, NW.) Wo vwo owenvwe wọ vwọ rhuẹrẹ ọke phiyọ vwọ kẹ eyono rẹ Ota rẹ Ọghẹnẹ? O muẹro nẹ o vwo orọnvwọn ọfa rọ sa kẹ wẹ aghwanre wo se vwo ruiruo vwẹ akpeyeren wẹn eje-e.