RUNAKUNAQA nacesqanchikmantapacham weqeyoq kanchik. Kaymanta yachaq huk runam willakun wawakuna mamanpa wiksanpiraq kaspanqa puputintakama alimentakusqanta, naceruspam ichaqa imatapas munaspanqa waqaspan mañakun. Tiempo pasasqanman hina mañakuyta yachaspaqa, ¿imanasqataq hinalla waqanchik?

Wakinpiqa waqanchik llakisqa kaspa, ima ruway munasqanchikta mana ruwayta atispa, hukmanyasqa kaspa otaq imanchikpas nanaptinmi. Waqanchiktaqmi kusikuymanta, consuelasqa kaspa otaq munasqanchikta haypaspapas. Hukkunapa waqasqanta qawaspapas waqanchikmi. Maria sutiyoq warmim nin: “Pitapas waqaqta qawaptiyqa ñoqatapas waqanayawanmi, ñawiyman weqey huntaptinmi mana aguantanichu”, nispa. Wakinpiqa peliculata qawaspapas otaq librota leespapas waqachwanmi.

Imakunarayku waqaspanchikpas, mana rimaspallam qawachinchik imapas necesitasqanchikta. Huk libropa nisqanman hinaqa “pisi tiempollapim qawachinchik imayna tarikusqanchikta” (Adult Crying). Waqasqanchikta pipas qawaspaqa yanapaytam munawasun. Piensariy kaypi, pipas llakikuymanta waqaptinqa, chayllam musyanchik ñakarisqanmanta. Chaymi yanapayta munanchik.

Kaymanta yachaq wakin runakunam ninku sapa kutilla waqanayawaptinchik mana waqaptinchikqa onqorunanchikmanta. Wakinkuñataqmi ninku waqayninchik otaq mana waqayninchik imapi yanapawasqanchikmantaqa manaraq allinta yachasqankumanta. Ichaqa, runakunata tapuptinkum pachak warmikunamanta 85 ninku imamantapas waqaruspaqa allin sientekusqankumanta, qarikunapas pachakmantam 73 chaynata ninku. Noemí sutiyoq warmim nin: “Wakinpiqa aminaykama waqaruspaymi allin sientekuni,  hinaspañam imatapas allinta tanteani”, nispa.

Manam waqasqallanchikwanchu allinqa sientekunchik, waqaptinchik pipas consuelaykuwaptinchikqa allinmi sientekunchik, mana chayqa hukmanyasqa otaq penqaypim tarikuchwan.

Weqenchikmantaqa manaraqmi allintaqa yachankuraqchu. Ichaqa Jehova Diosmi unanchawarqanchik imayna sientekusqanchikta qawachinanchikpaq.