ILYASHI LIKALAMBA | NO KUFWA KWAWAMA!
Kwaliba Abengamwafwa
“Mulepoosa amasakamika yenu yonse pali [Lesa], pantu asakamana imwe.”—1 PETRO 5:7.
Ilingi icilenga umuntu ukulafwaya ukuipaya kutontonkanya ukuti ubwafya akwete bukulu sana ica kuti te kuti abupwishe. Natulande pa fingamwafwa.
Ipepo. Ico tupepela kuli Lesa te kutila kufwaya fye ukuti tumfweko bwino nga twakwata ubwafya. Ipepo kulanshanya na Yehova Lesa. Yehova alimutemwa icine cine, afwaya ukuti mulemweba fyonse ifilemusakamika. Na kuba, Baibolo itweba ukuti: “Poosa icisendo cobe pali Yehova, na o akakukosha.”—Amalumbo 55:22.
Kanshi pepeni kuli Lesa lelo line, kabili ilyo mulepepa bomfyeni ishina lyakwe, Yehova. Mwebeni fyonse ifili mu mutima wenu. (Amalumbo 62:8) Yehova afwaya ukuti mumwishibe no kuba icibusa cakwe. (Esaya 55:6; Yakobo 2:23) Kuti mwapepa kuli Yehova ukuli konse uko muli kabili pa nshita fye iili yonse.
Akabungwe ka American Foundation for Suicide Prevention kalandile ukuti, ilyo bafwailishe ukuti beshibe icilenga abantu ukuipaya, basangile ukuti “abengi abaipeye balikwete amalwele ya ku muntontonkanya. E lyo abengi tacaishibikwe no ukuti balilwala kabili abalwele nabo tabaile ku cipatala pa kuti babafwe.”
Abantu abamutemwa. Pa bantu abashifwaya mwafwa paba balupwa lwenu e lyo ne fibusa abalanga ukuti balimubikako amano. E lyo kwaliba na bantu bambi abamubikako amano abo mushamonapo no kumonapo. Ku ca kumwenako, Inte sha kwa Yehova nga baleshimikila balasanga abantu abalepita mu mafya ayakalamba, kabili bamo pali aba balitontonkanyapo na pa kuipaya. Ifi ba Nte bashimikila ku ng’anda ne ng’anda fyalilenga baafwa abantu abengi. Inte sha kwa Yehova balibika sana amano ku bantu banabo nga filya fine Yesu alecita. Na imwe bene, ba Nte balimubikako sana amano.—Yohane 13:35.
Badokota. Ilingi umuntu nga aletontonkanya sana pa kuipaya, ninshi kulwala kulelenga. Kuti nalimo uyo muntu alilwala ubulwele bwa kuba sana no bulanda. Nga ca kuti mwaliba sana no bulanda pa nshita ntali, mufwile ukwishiba ukuti bulwele e lyo tamufwile no kumfwa insoni sha kuya ku cipatala. Na kuba, ubu bulwele bwaba fye nga malwele yonse, kanshi umuntu fye uuli onse kuti alwala e lyo kuti bwaundapwa no kundapwa. *
MULEIBUKISHA ICI: Pa kuti umuntu uuponene mu cilindi icitali afume, alakabila abantu abali kunse aba kumwafwa. E fyo no muntu uuli sana no bulanda akabila aba kumwafwa. Kanshi nga mwaebako aba kumwafwa, kuti mwapola.
IFYO MWINGACITA: Esheni ukufwailisha icipatala icakwata badokota abaishiba bwino ifya kwafwa abantu ababa sana no bulanda pa nshita ntali.
^ para. 8 Nga mwasanga ukuti muletontonkanya pa kuipaya, ebeni abali bonse abengamwafwa. Ku ca kumwenako, nga mwaya ku cipatala kuti mwayasanga abantu abengamwafwa pamo nga badokota e lyo na bambi abasambilila ifya kwafwa abakwete ubwafya mukweteko.
Nalimo Kuti Mwatemwako ne fi
LOLENI!
Tamufwile Ukulafwaya Ukufwa—Kwaliba Isubilo
Isubilo kuti lyamwafwa ukwishiba ukuti nangu ifinti fimubipile shani, kasuba kamo fikasuka fikawame.
AMASUKO KU MEPUSHO YA MU BAIBOLO
Bushe Lesa Kuti Angafwa Nga Napepa?
Bushe Lesa alabikako amano ku fyo tucula?
