I Gat Rod Blong Givhan Long Yu
“Yufala i mas putum ol trabol blong yufala long han blong God, from we oltaem hem i stap tingbaot yufala.” —1 PITA 5:7.
Taem i no gat rod blong winim wan problem we yu fesem, ating yu tingbaot se i moa gud yu ded nomo. Be i gud yu tingbaot sam rod we oli save givhan long yu.
Yu mas prea. Prea hem i no rod blong mekem yu harem gud nomo, mo hem i no mekem se ol wari oli godaon nomo. Taem yu prea, yu stap toktok wetem Jehova God. Hem i stap tingbaot yu tumas. Hem i wantem we yu talemaot ol wari blong yu long hem. Mo Baebol i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.”—Ol Sam 55:22.
I gud yu prea long God, mo yu yusum nem blong hem Jehova mo yu talem olgeta samting we i stap long hat blong yu. (Ol Sam 62:8) Jehova i wantem we yu tingbaot hem olsem wan fren. (Aesea 55:6; Jemes 2:23) Prea hem i wan rod blong toktok wetem God enitaem mo long eni ples.
Wan grup (American Foundation for Suicide Prevention) “i faenemaot se 90 pesen blong ol man we olgeta nomo oli kilim olgeta i ded, oli sik long tingting. Plante long olgeta oli no luksave samting ya, taswe oli no go luk dokta blong kasem tritmen”
I gat ol man we oli tingbaot yu. Trabol we yu fesem i mekem ol famle blong yu, mo ol fren blong yu tu oli harem nogud mo oli tingbaot yu. I gat sam man we yu neva mitim olgeta, be olgeta tu oli tingbaot yu. Wan eksampol, hemia ol Witnes blong Jehova. Taem oli stap prij long ol haos wanwan, oli faenem sam man we oli harem nogud tumas. Sam long ol man ya oli talem long ol Witnes se oli wantem tumas we wan man i kam givhan long olgeta, mo oli stap tingbaot blong kilim olgeta oli ded. Taem ol Witnes blong Jehova oli go prij long ol haos wanwan, hemia i givim janis long olgeta blong oli givhan long ol kaen man olsem. Ol Witnes blong Jehova oli folem eksampol blong Jisas blong tingbaot ol narafala man. Olgeta oli tingbaot yu tu.—Jon 13:35.
Ol man we oli gat spesel save blong givhan. Taem wan man i gat tingting ya blong kilim hem wan i ded, hemia i soemaot we hem i kasem wan sik long tingting blong hem, we i mekem se fasin blong hem i jenis oltaem. Yu no mas sem sipos yu harem nogud from yu sik long tingting no long bodi blong yu. Eni man nomo i save kasem sik ya we ol man oli talem se “sik long tingting” no tingting i foldaon. Sik ya man i save winim. *
TINGBAOT SAMTING YA: Wan man we i stap insaed long wan bigfala hol, i no save kamaot hem wan, hem i nidim narafala blong i givhan long hem. Long sem fasin, man we tingting blong hem i foldaon, i nidim we narafala i givhan long hem, blong hem i save kam gud bakegen.
?YU SAVE MEKEM WANEM?: I gud yu faenem wan gudfala dokta we i save givhan long man we tingting blong hem i foldaon.
^ par. 7 Sipos oltaem yu tingbaot blong kilim yu wan i ded, i gud yu faenemaot ol ofis no sam ples we oli save halpem yu. Ol man we oli wok long ol ples olsem, oli tren gud mo oli save givhan gud long yu.
Maet Yu Laekem Hemia Tu
WEKAP!
?From Wanem Mi Laef?—I Gat Wan Gudfala Fiuja
Ol promes blong God oli olsem wan laet we i givhan long yu blong yu lukluk rod blong yu long wan ples we i tudak.
ANSA WE BAEBOL I GIVIM
?Sipos Mi Prea, God i Save Givhan Long Mi?
?God i rili kea long ol problem blong yumi?
