TABA YA LETLAKALA LA KA NTLE | KE PHELELA ENG?
Ka Gobane o ka Hwetša Thušo
‘Lahlela dipelaelo tša gago ka moka go Modimo, gobane o a go hlokomela.’—1 PETRO 5:7.
Ge o ikwa eka ga gona seo o ka se dirago go kaonefatša boemo bja gago, o ka bona lehu e le tharollo. Eupša ela hloko dilo tše dingwe tšeo di ka go thušago.
Thapelo. Thapelo ga e fo ba selo sa go go dira gore o ikwe o le kaone; goba ga se ya swanela go ba selo sa mafelelo ge o tlaletšwe. Thapelo ke go boledišana ka tsela ya kgonthe le Jehofa Modimo yo a tshwenyegilego ka wena. Jehofa o nyaka gore o mmotše dilo tšeo di go tshwenyago. Ge e le gabotse, Beibele e re: “Lahlela maima a gago go Jehofa, gomme yena o tla go thekga.”—Psalme 55:22.
Gore’ng o sa boledišane le Modimo ka thapelo lehono? Diriša leina la gagwe la Jehofa, gomme o mmotše seo se lego pelong ya gago. (Psalme 62:8) Jehofa o nyaka gore o be mogwera wa gagwe. (Jesaya 55:6; Jakobo 2:23) Thapelo ke mokgwa wa poledišano woo o ka o dirišago ka nako le ge e le efe, lefelong le ge e le lefe.
Go ya ka American Foundation for Suicide Prevention, “di nyakišišo di hweditše ka makga a mantši gore palo ya batho bao ba hwago ka go ipolaya—90 lekgolong goba go feta moo—ba be ba na le bolwetši bja monagano ge ba e hwa. Lega go le bjalo, gantši malwetši a a be a sešo a lemogwa, a hwetšwa ke dingaka goba go alafša ka tshwanelo”
Batho bao ba tshwenyegilego ka wena. O bohlokwa go batho ba bangwe—go akaretša ditho tša lapa goba bagwera ba gago bao ba ka bago ba go boditše gore ba na le taba le wena. Batho bao ba tshwenyegilego ka wena ba ka akaretša le bao o sa kago wa kopana le bona. Ka mohlala, ka dinako tše dingwe ge Dihlatse tša Jehofa di le bodireding, di kopana le batho bao ba nyamilego, moo ba bangwe ba ipobotšego ka gore ba be ba tloga ba nyaka thušo e bile ba nagana go ipolaya. Modiro wa go bolela ka ntlo le ntlo o neile Dihlatse tša Jehofa sebaka sa moswananoši sa gore di thuše batho ba bjalo. Ka ge di latela mohlala wa Jesu, Dihlatse tša Jehofa di tshwenyegile ka batho ba bangwe. Di tshwenyegile le ka wena.—Johane 13:35.
Thušo ya ditsebi. Gantši megopolo ya go ipolaya ke bohlatse bjo bo bontšhago gore motho o na le bolwetši bja go fetofetoga ga maikwelo, go swana le kgateletšego ya monagano. Ga se wa swanela go lewa ke dihlong ge o na le bolwetši bja go fetofetoga ga maikwelo, ka ge go sa fapane le ge o babja mmeleng. Ge e le gabotse, kgateletšego ya monagano e bitšwa seo go thwego ke mpshikela o tlwaelegile wa monagano. Motho le ge e le ofe a ka ba le wona—e bile o ka alafša. *
GOPOLA SE: Ga se gantši go lego bonolo go lwantšha kgateletšego ya monagano e šoro o le tee. Lega go le bjalo, o ka atlega ka go hwetša thušo.
SEO O KA SE DIRAGO LEHONO: Nyaka thušo go ngaka yeo e tsebjago ka go alafa malwetši a go fetofetoga ga maikwelo a swanago le kgateletšego ya monagano.
^ ser. 8 Ge e ba dikgopolo tša go ipolaya di le matla goba di phegelela, nyaka thušo yeo e hwetšagalago lefelong la geno—mohlomongwe o ka leletša mokgatlo woo o thušago batho bao ba nyakago go ipolaya goba o ka ya phapošing ya balwetši ba tšhoganetšo ya sepetlele. Mafelo a bjalo a tletše ka batho bao ba tlwaeditšwego gore ba nee thušo.
You May Also Like
PHAFOGA!
Tšwela Pele o Phela
Go swana le seetša seo se lego kgojana, kholofelo e ka go thuša go bona ka kua ga leswiswi.
DIPOTŠIŠO TŠA BEIBELE DI A ARABJA
Na Modimo o tla Nthuša ge ke Rapela?
Na ruri Modimo o tshwenyegile ka mathata a rena?
