QARANPI KAQ YACHACHIKUY | ¿ALLINCHU HINALLA KAWSAKUYQA?
Tariwaqmi yanapakuytaqa
“Tukuy afannikichiktaqa Diosmanyá qoychik, paymi qamkunamanta nanachikuqqa.” (1 PEDRO 5:7)
Ichapas piensawaq sasachakuynikita allichanaykipaqqa wañuyllaña kasqanta. Ichaqa kanmi chaypaq yanapakuyqa hinaspapas makillaykipim kachkan.
Diosta mañakuy. Kayqa manam allin tarikunallaykipaqchu nitaq sasachakuynikimanta lloqsinaykipaqtaqchu. Aswanqa qanmanta nanachikuq Dioswan parlanaykipaqmi. Payqa munanmi sasachakuynikikunata willanaykita. Bibliapas ninmi Diosman sasachakuynikikunata saqenaykipaq, paymi yanapasunki (Salmo 55:22).
¿Mañakuwaqchu Diosta kunallan? Sutinta servichikuspayá sonqomanta rimapayay, paypa sutinqa Jehova Diosmi (Salmo 62:8). Payqa amistadninta hina qawanaykitam munan (Isaias 55:6; Santiago 2:23). Diostaqa mañakuwaqmi maypipas hinaspa munasqayki horapipas.
“Estudiokuna ruwasqankupim yacharunku pachak runakunamanta 90 masnin runakuna umankuwan onqosqankurayku wañuchikuy munasqankuta, ichaqa achkam chaywan onqosqankuta mana yacharqakuchu, manataqmi hospitalmanpas rirqakuchu otaq mana allin atiendesqam karqaku”, chaytam nin Fundación Americana para la Prevención del Suicidio nisqa
Kuyasuqniki runakuna. Familiaykiwan amistadnikikunaqa kuyasusqaykitam qawachisunki. Kantaqmi allinnikita munaq mana reqsisqayki runakunapas. Huk kaqninmi kanku Jehova Diospa testigonkuna, paykunaqa wasin-wasin Diosmanta willakuspankum sasachakuyniyoq runakunata tarinku. Wakinkum ninku sasachakuypi tarikusqankurayku yanapakuyta necesitasqankumanta, mana chayna kaptinqa wañuchikuyta piensasqankuta. Jehova Diospa testigonkunaqa yanapasunkimanmi. Paykunaqa Jesucristopa ejemplontam qatipakunku, munachkankum runamasinkuta chaynataq qamtapas yanapayta (Juan 13:35).
Doctorkunapa yanapakuynin. Yaqa llapanpim wañuchikuytaqa munanku llumpay llakisqa onqoywan tarikusqankurayku. Chay onqoywan ñakarispaykiqa manam penqakunaykichu. Kayqa chulli onqoy hinam lliw runakunata hapiruwachwan hinaspapas atichwanmi hampikuytaqa. *
AMA QONQAYCHU: Llumpay llakikuywan onqoyqa rikchakunmanmi ukullay-uku uchkumanta sapallayki mana lloqsiy atisqaykiman, ichaqa hukkunapa yanapakuyninwanqa atiwaqmi lloqsiyta.
IMATAM RUWAWAQ: Llumpay llakikuywan onqoq runakunata yanapaq doctorkunata maskay, chaynapi paykuna yanapasunaykipaq.
^ par. 8 Wañuchikuyllapiña llumpayta piensaspaykiqa, yanapakuyta maskay: qayay chay onqoyniyoqkunata yanapaq runakunata otaq hospitalman riy. Chaypim tarinki yanapakuyta.
Kaykunatapas leeykuy
¡RIKCHARIY!
¿Allinchu hinalla kawsakuyqa? Kanmi suyakuy
Suyakuymi yanapasunki hinalla kawsakunaykipaq.
